Túrkistan qalasynda rejıser Qanaǵat Mustafınniń «Qajymuqan» kórkem fılminiń kórsetilimi ótti. Tarıhı týyndynyń tanystyrylymyna Túrkistan oblysy ákiminiń orynbasary Ertaı Altaev, fılmniń avtorlary men akterlyq quramy, jergilikti zıaly qaýym men BAQ ókilderi arnaıy qatysty,  dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

– Shyǵarmashylyq topty tarıhı týyndymen shyn júrekten quttyqtaımyn! Osydan tórt jyl buryn túsirilimi bastalǵan fılm búgin elimizdiń barlyq kınoteatrynan kórermenge jol taýyp otyr. Biz osylaısha Qajymuqannyń ómirimen óskeleń urpaqty tanystyra alamyz. Onyń jetistikterin ulyqtaı otyryp, úlgi alýymyz qajet, – dedi oblys ákiminiń orynbasary.

«Turan mall» saýda ortalyǵynyń «Prime Sinema» kınoteatrynda ótken kórsetilim aldynda fılmniń qoıýshy rejısery Qanaǵat Mustafın, Qajymuqan rólin somdaǵan Erbol Tólepbergen, Qajymuqanyń jary rólindegi Jazıra Erkin jáne fılmniń prodúserleri – Baýyrjan Qulmyrzaev, Nurjan Jumanov bastaǵan qonaqtar qyzyl kilemnen júrip ótti. Sodan soń shyǵarmashylyq top kórermenderge túsirilim barysy jaıly baıandap berdi.

Fılm rejıseri Qanaǵat Mustafın tarıhı fılm senarıine 2012 jyly kirisip, taqyrypty 10 jyldan astam ýaqyt zerttegen. Rejıserdiń aıtýynsha, Qajymuqan óziniń myqtylyǵyn óz zamanynyń eń jaqsy balýandaryn jeńip dáleldegen. Ol – Parıjde, Londonda, Berlınde, Ystambulda, Býenos-Aıreste jáne Chıkagoda qoshemetke bólengen alǵashqy qazaq sportshysy.

Aıta keteıik, «Qajymuqan» atty tarıhı kórkem fılmi QR Mádenıet jáne aqparat mınıstrliginiń jáne Ulttyq kınony qoldaý memlekettik ortalyǵynyń qoldaýymen qazaq halqynyń tarıhyndaǵy tuńǵysh kásipqoı balýan, fransýz kúresinen álem chempıony atanǵan tuńǵysh qazaq, álemdik, óńirlik, reseılik, keıin búkilodaqtyq chempıonattarynyń birneshe dúrkin jeńimpazy Qajymuqan Muńaıtpasuly jaıynda túsirilgen. Sonymen birge dala batyrynyń halqyna degen súıispenshiligi, sol zamandaǵy saıasat, eldiń aýyr jaǵdaıy da sýrettelgen.