Belgili fotograf Dmıtrıı Dosenko áleýmettik jelidegi paraqshasynda jańa jyldyq Almatynyń keremet jáne ásem sýretterimen bólisti. Onyń obektıvine túrli-tústi Arbat, Panfılov kóshesi, Abaı, Astana jáne Respýblıka alańdary, sondaı-aq jarqyraǵan Tuńǵysh Prezıdent saıabaǵynyń kórinisteri túsken.
Jańa jyl qarsańynda Almaty erekshe bezendirildi. Áýejaıdan bastap ortalyq alańdarǵa deıin qala tolyǵymen merekelik keıipke endi. Qalada 300-ge jýyq jarqyraǵan qurylym ornatyldy, olardyń arasynda ertegi keıipkerleri men merekelik áshekeıler beınelengen. Sonymen qatar, byltyr jóndeýden ótken 120 shaǵyn sáýlet nysandary qaıta paıdalanyldy. Magıstral boıyndaǵy aǵashtar jaryqdıodty shamdar men gırlándalarmen bezendirilgen.
Jalpy, qala boıynsha 1500 jaryq elementi ornatyldy, onyń ishinde 350-i – qalpyna keltirilgen ótken jylǵy kronshteın.
Aıta ketý kerek, Abaı alańynda bıiktigi 25 metr bolatyn megapolıstiń basty jańa jyldyq shyrshasy ornatyldy. Bıylǵy jyly shyrsha alǵash ret qańqaly emes, tabıǵı dińdi klasıkalyq stılde jasaldy. Ony bezendirý úshin alty shaqyrym gırlánda, túrli-tústi sharlar jáne shyrsha oıynshyqtary qoldanyldy.
Sonymen qatar, Abaı alańynda 5 qańtarǵa deıin jumys isteıtin jańa jyldyq jármeńke uıymdastyryldy. Munda kádesyılar, qolónershilerdiń buıymdary jáne merekelik áshekeılerdi tabýǵa bolady.
Esterińizge sala keteıik, búgin Almatyda estrada juldyzdarynyń qatysýymen 3 aýqymdy konsert ótedi: Abaı alańynda saǵat 19:00-den 21:00-ge deıin Búrkit, Aqbota-Nur, Ǵazızhan Shekerbek, Dıana Ismaıl, Kenjebek Janábilov jáne basqa da artıserdiń qatysýymen konsert ótedi.
Sondaı-aq, «Nurly Taý» bıznes ortalyǵynyń aldynda saǵat 18:00-den 21:00-ge deıin jastar konserti uıymdastyrylady. Onda DJ Slim, Altair&ABBi, 2RAR, Dakelot jáne «All Davaı» boız-bendiniń solısi ári prodúseri Shoqan Maratuly óner kórsetedi.
Astana alańynda jańa jyldyq konsert saǵat 21:00-de bastalyp, 2025 jyldyń 1 qańtaryna deıin jalǵasady. Saǵat túngi 00:00-de merekelik otshashý uıymdastyrylady.
Jańa 2025 jyldy toılaý qurmetine QBTÝ ǵımaratynyń aldynda Erseıit Álıev, Elbol Qýanbek, Uljan Aǵlaqova, Chingiz Typhoon, Makvin, Orynhan, 6ellucci, Marhaba Sábı, Moldanazar jáne RaiM óner kórsetedi.
https://www.instagram.com/p/DEPNU7gofog/?igsh=MTM4bzlqcG85eDR3Yw==
