"Samuryq-Qazyna" AQ investorlar konsortsiýmymen "QAZAQ AIR" AQ-nyń aktsiialaryn satyp alý-satý shartyna qol qoidy, dep jazady Dalanews.kz.
"2024 jylǵy 24 jeltoqsanda "QAZAQ AIR" AQ-ny 2023 jyldyń sońyna 81 milliard AQSh dollaryn quraityn Qazaqstannyń "Samuryq-Qazyna" AQ ulttyq ál-aýqattyń egemendi qory jáne "Central Asia Aviation Holdings Limited" JK (Sovico Group JSC vetnamdyq konglomeratynyń tobyna kiredi) jáne "Kazasia Holdings Limited" JK quramyndaǵy konsortsiým arasynda básekeles ortaǵa berý sheńberinde mindetti tranzaktsiialyq qujattar paketine, onyń ishinde satyp alý-satý shartyna qol qoiyldy", delingen kompaniia baspasóz qyzmetiniń habarlamasynda.
Satyp alý-satý sharty 2024 jylǵy 27 jeltoqsanda "QAZAQ AIR" aktsionerlik qoǵamynyń aktsiialaryn básekeles ortaǵa berýdiń keibir máseleleri týraly" QR Úkimetiniń jeke qaýlysy qabyldanǵannan keiin zańdy kúshine endi.
"Bul rette mámile jabyq bolyp esepteledi, al aktsiialar taraptar kelisken barlyq aldyn ala sharttardy oryndaǵannan keiin investorlardyń menshigine beriledi. Mámileniń maqsaty – azamattyq aviatsiianyń otandyq naryǵyn odan ári damytý, onyń ishinde básekelestikti arttyrý, Qazaqstan Respýblikasynan/Respýblikasyna halyqaralyq turaqty reisterdi qarqyndatý, jumys oryndaryn qurý jáne t.b. esebinen damytý. Bul el ekonomikasynyń aralas sektorlaryna da oń áserin tigizedi dep kútilýde", delingen kompaniia habarlamasynda.
Buǵan deiin QAZAQ AIR vetnamdyq kompaniia aqyry satylatyn bolǵanyn, memlekettik komissiia kelisimdi maquldaǵanyn jazǵan bolatynbyz. Sondai-aq saitymyzda osy taqyrypta "Vetnamdaǵy tuńǵysh milliarder áiel jáne Qazaqstan" degen maqala jariialanǵan. Ngýen hanym - SOVICO-men bailanysty vetnamdyq Vietjet Air loýkosteriniń negizin qalaýshy.
