Túrkistan oblysynyń ákimi Nuralhan Kósherov Eýropanyń 20-ǵa jýyq memleketiniń Qazaqstandaǵy elshilerimen kezdesti. «Dostyq úii» ǵimaratynda ótken kezdesý barysynda Túrkistan óńiriniń investitsiialyq, týristik áleýeti tanystyrylyp, bailanystardy nyǵaitý, áriptestik ornatý joldary talqylandy, dep habarlaidy Dalanews.kz
Óńir basshysy mártebeli meimandarǵa Túrkistannyń tarihi jáne ekonomikalyq róli týraly baiandady.
– Sizderdi Túrki dúniesiniń rýhani ordasy, Qazaq handyǵynyń astanasy bolǵan qasietti Túrkistan qalasynda qarsy alǵanyma qýanyshtymyn. Uly Jibek jolynyń boiynda ornalasqan Túrkistan – elimizdiń tarihi-mádeni ortalyǵy. Memleket basshysy Qasym-Jomart Kemelulynyń qoldaýymen aimaqty damytý jumystary qarqyndy júrýde. Batys pen shyǵys arasyndaǵy saýda qatynastary jáne kóptegen tarihi nysandar Túrkistannyń Ortalyq Aziiadaǵy investitsiialar men týrizmdi tartýdyń ortalyǵy bolý múmkindigin ulǵaitady. Qalanyń júregi – túrki halyqtarynyń rýhani kósemi Qoja Ahmet Iasaýi kesenesi. 2018 jyly qurylǵan Túrkistan oblysy saýda-ekonomikalyq bailanystar men ózara tiimdi yntymaqtastyqty keńeitýdiń úlken áleýetine ie. Halyq tyǵyz ornalasqandyqtan aimaqta jumys kúshi, kadrlar jetkilikti. Bizdiń oblys bizneske baǵyttalǵan. Aimaqta 210 myńnan astam shaǵyn jáne orta biznes ókilderi, onyń ishinde 160 sheteldik investor qatysatyn kompaniialar jumys isteidi. 2018 jyldan bastap oblysqa 9 mlrd. AQSh dollary kóleminde investitsiia tartyldy. Onyń 63 paiyzy – jeke investitsiialar. Investitsiialar ónerkásip, jyljymaityn múlik, aýyl sharýashylyǵy, týrizm, jáne jańartylatyn energiia kózderine baǵyttalýda. Qazirgi ýaqytta óńirdiń qorjynynda 110-ǵa jýyq investitsiialyq joba bar. 2025-2028 jyldary 19 myń jańa jumys ornyn qurý kózdelgen. Oblysta «TURAN» arnaiy ekonomikalyq aimaǵy jáne indýstrialdy aimaqtar, óndiristik park jumys isteidi. Eýropa kásipkerlerimen áriptestik ornatyp, jobalardy júzege asyrýǵa daiynbyz, – dedi Nuralhan Kósherov.
Kezdesýde Qazaqstan Respýblikasy Syrtqy ister ministriniń orynbasary Roman Vasilenko men Qazaqstan Respýblikasyndaǵy Eýropalyq Odaq elshisi Aleshka Simkich elshiler tobynyń óńirge saparynyń maqsatyna toqtaldy. Eýroodaq elshisi áriptestikti nyǵaitýǵa qoldaý kórsetiletinin jetkizdi. Túrkistan oblysynyń áleýeti joǵary ekenin atap ótti.
Júzdesý barysynda Ulybritaniianyń Qazaqstandaǵy elshisi Keti Lich jáne ózge de elshiler qonaqjai Túrkistan jurtshylyǵyna, iskerlik bailanys ornatýǵa niet bildirip, mazmundy kezdesý ótkizgen oblys basshylyǵyna rizashylyqtaryn bildirdi. Túrkistan oblysynyń birneshe týristik nysanyn aralaǵan olar aimaqtyń týristik áleýeti, bai tarihy men shejiresine qyzyǵýshylyq tanytyp, bul salany damytý múmkindigi joǵary ekenin atap ótti. Sonymen birge investitsiialyq alańdar, investorlarǵa jasalatyn múmkindikter týraly suraqtaryn qoiyp, tiisti maǵlumattar aldy.
Túrkistan oblystyq týrizm basqarmasynyń basshysy Nurdáýlet Medeýov pen «Turkistan Invest» JShS basqarma tóraǵasy Ómirzaq Iýsýpov aimaqtyń týristik, investittsiialyq múmkindikteri týraly keńinen baiandap berdi.
Eýropanyń Ulybritaniia, Polsha, Horvatiia, Avstriia, Bolgariia, Kipr, Estoniia, Germaniia, Grekiia, Vengriia, Shveitsariia, Latviia, Slovakiia jáne ózge de elderinen kelgen elshiler men diplomatiia salasynyń ókilderine Túrkistan oblysy týraly maǵlumat berilip, áriptestik ornatý joldary pysyqtaldy.
Kezdesýden keiin eýropalyq elshiler Túrkistan mańyndaǵy shaǵyn óndiristik park pen indýstrialdy alańdardy aralap, múmkindikterimen tanysty.
Aita keteiik, elshiler Túrkistan oblysyndaǵy tarihi jáne týristik oryndardy aralady. Osy sapar barysynda meimandarǵa Qoja Ahmet Iasaýi kesenesi men jańarǵan Túrkistan shahary da tanystyrylmaq.
