Túrkistan oblysynyń 13 aýdanynda investorlar ustazdarǵa arnap 31 turǵyn úi salyp jatyr
Ustaz bededi – memleket bedeli ekenin atap ótken ol bilikti maman, otanshyl azamat tárbieleý úshin muǵalimderdiń bilimi men qairaty mol bolý kerektigin aitty. Oblysta túlep ushyp, ózge óńirlerde qyzme etip júrgen bilikti mamandar men pedagogtardy týǵan jerge shaqyrý kerektigin jetkizdi.
Osy jiynda Janseiit Túimebaev Túrkistan oblysynda ustazdar qaýymyna memleket tarapynan áleýmettik qoldaý kúsheitiletinin atap ótti. Máselen, biylǵy qyrkúiek aiynan bastap ulttyq biliktilik testileýden ótken 4200 pedagogtyń ailyq jalaqysy sanattaryna qarai 30-50 paiyzǵa artady. Oǵan oblystyq biýdjetten 1 mlrd. 67 mln. teńge qaraldy. Biyl jańartylǵan bilim berý mazmunymen sabaq berip jatqan 32 myńnan astam ustazǵa 30 paiyz jalaqy qosyldy. Oǵan biýdjetten 10 mlrd. 290 mln. teńge qaralǵan.
– Oblysymyz Túrkistan oblysy bolyp atalyp, oblys ortalyǵynyń Túrkistan qalasyna kóshýi de ustazdarǵa oń áserin tigizip jatyr. Egerde, Sizder Túrkistan qalasyna kelgen jaǵdaida ailyq jalaqylaryńyzǵa 20 paiyz qosymsha aqy, eńbek demalystaryńyzǵa 7 qosymsha kún, eńbek demalystaryńyzǵa 1 ailyq qosymsha saýyqtyrý aqysy qosylady. Áleýmettik sala qyzmetkerleri men ustazdar qaýymy úshin Túrkistan oblysynyń 13 aýdanynda investorlar esebinen 14 myń sharshy metrli 31 turǵyn úi salynyp jatyr, – dedi oblys ákimi.
Búginde Túrkistan oblysynda kásiptik bilim sapasyn kóterý máselesine ákimdik tarapynan nazar aýdaryla bastady. Óńirimizdiń áleýmettik-ekonomikalyq damýy úshin mańyzdy salanyń biri – tehnikalyq jáne kásiptik bilim berý. Sebebi, kásiptik bilim mekemelerin bitirýshi túlekterdiń 25-30 paiyzy jumyspen qamtamasyz etilmei keledi. Ol memlekettik tapsyrysty durys qalyptastyrmaýdan. Qoǵamǵa naqty qandai mamandar qajet ekeni jiti zerttelmegendikten jastardyń birazy diplomǵa sai jumys tappai júr. Osy olqylyqty joiý maqsatynda biyl kásiptik maman daiarlaý baǵytynda memlekettik tapsyrysty júieleý úshin 7 jumysshy top qurylǵan. Jumysshy top qoǵamǵa asa qajetti mamandyqtardy saralaǵan. Osy jańa format boiynsha biyl óńirge qajetti mamandar daiarlanady, jumyssyzdar sany azaiyp, memleket qarjysy tiimdi maqsatta jumsalady. Biyl memlekettik tapsyrysqa respýblikadan 3 mlrd. 900 mln. teńge al, oblystan 17 mlrd. teńge qaraldy. Naqty qadam arqyly kásiptik bilimniń sapasy kóterilip, oblys ekonomikasyna qajetti mamandar tapshylyǵy máselesi de sheshilmek.
Túrkistan oblysynyń muǵalimderi úshin taǵy bir jaǵymdy jańalyq bar. Biyl birinshi ret óńir ustazdaryna M.Lomonosov atyndaǵy Máskeý memlekettik ýniversitetiniń magistratýrasyna 20 grant bólindi. Olar úsh mamandyq boiynsha álemdegi eń ataqty oqý oryndarynyń birinde bilimin jetildirip qaitady. Igi iske oblys biýdjetinen qarjy qarastyrylǵan. Sonymen qatar, Qazyǵurt aýdanynda ornalasqan J.Qapparov atyndaǵy fizika-matematika baǵytynda oqytatyn mamandandyrylǵan mektep-internatyna shetten kelgen muǵalimderi úshin 15 jeke úi qurylysyn salý úshin qujattar daiyndalyp jatyr. Atalǵan bastamalar Túrkistan oblysynda bilim salasyna serpilis ákeledi degen senim bar.
Túrkistan oblysy ákiminiń baspasóz qyzmeti
