"Tuńǵyshbai? Óner adamy ańǵal bolady"
"Bilim ministri men Mádeniet ministrine jarymai-aq qoidyq. Tuńǵyshbai 69 million teńge jedi degenge óz basym senbeimin. Óner adamy ańǵal bolady. Aiyptamai turyp tekserip alýy kerek qoi. Múmkin Tuńǵyshbaidyń atyn jamylyp, basqa adamdar jegen shyǵar? Qazirgi Mádeniet ministrine ábden kóńilim qaldy. Qazaq handarynyń rólin somdaǵan Tuńǵyshbaidy halqy eshqashan umytpaidy. Al Mádeniet ministri qyzmetinen túsken kúni-aq umytylady"
deidi Áselhan Qalybekova.
Osy oiyn áleýmettik jelige jazypty. "Tuńǵyshbaiǵa qatysty jazbany nemereme tergizip, ózim salǵyzdym" deidi.
Júrsinniń oiy nede?
Kelesi kezekte Júrsin Ermandy da bir silkip alypty.
"Titteiimizden birge ósken Júrsin qymbat adamymyz edi, sońǵy ýaqytta bar oiy aqshaǵa aýyp ketti. Aitysty saýdaǵa salyp jiberdi... 2012 jyly retro-aitys ótip, Esenqulmen aitysatyn boldym. Aitys óterden birer kún buryn Júrsin telefon shalyp: «Ái, Áselhan, sender burynǵydai aitysyp júrmeńder! Esenqul ekeýiń kelisip alyńdar. Kelisip alsańdar, aitystaryń shymyr shyǵady» deidi. «Ái, Júrsin! Kelisip alyp shyqqan aitys bola ma?! Ne aityp tursyń! Esenqul ekeýmizdiń aitysymyz qashan jaman shyǵyp edi?!» dedim. «Durys shyqsyn degenim ǵoi» dep mińgirledi de, telefon tutqasyn qoia saldy" depti aqyn suhbatynda.
Aitýynsha, Júrsinder «aitysty shoý jasaimyz» dedi de, aitysqa satqyndyq jasaǵan.
"Munyń bárin eskerip, shamamyzdyń kelgeninshe shákirt tárbieleýdi qolǵa aldym. «El ishi – óner kenishi» degen bar, Bekarys Shoibekovtei shákirt tárbielei almasaq ta, el aýzynda júretin aqyn shyǵara alsaq, eńbegimizdiń janǵany. Shákirtterdi birneshe dúrkin tárbieledik. Bekjan Bazarbai degen bir shákirtim bar. Toǵyzynshy synypta oqidy. «Kenje balam» osy dep júrgem. Biyl Otyrar aýdanyna Erlan Aitahanov ákim bolyp, óner mektebin qaitadan ashyp berdi. Moiynǵa taǵy aýyr júk artyldy. Endi jas aqyndardy tárieleýdi qaitadan qolǵa alamyz. Oqýshylardyń jazǵy demalysyna da kóp qalǵan joq. Oǵan deiin el aralap, eki-úsh bala taýyp alsam ba dep otyrmyn" deidi Áselhan Qalybekova.
"Kimder esimde qaldy?"
"Baiaǵy Aibegimiz jaqsy, halyqtyń muńyn sol aityp júr.
Rinat shetteńkirep qaldy.
Balǵynbek, Ainurlar aitysty qoidy. Qazirgi jastardan Aitaqynnyń balasy Jandarbek bar, Syrym degen bala ájeptáýir kórinip keledi. Bolatbek, Meiirbek, Muhtar, Aspanbekterdi qazirgi aitystyń bolashaǵy dep bilemin...".
Dinshildik týraly
Suhbattyń sońynda jýrnalist «keibir aqyndardyń sahnadan ketýine ásiredinshildigi sebep boldy» degen pikir bar. Buǵan ne deisiz?" saýal qoiypty.
– Bul – aqiqat. Bekbolat Tileýhan men Muhamedjan Tazabek biraz aqynnyń obalyna qaldy. Aqynnyń qai-qaisysyn alsańyz da, bári kedei. Ne úige, ne kiimge jarymaidy. Solarǵa qamqor bolǵansyp, Mekkege aparady. Bekbolat pen Muhamedjanmen birge ýmra qajylyqqa barǵan aqyndardyń bári dinshil bolyp shyǵa keledi, áiteýir. Shákárimniń sózimen aitqanda, bular dinshil emes, pánshil
– degen eken bul rette Áselhan Qalybekova.
