Tanymdyq sapar aiasynda sol jerlerdiń tarihy jaily túrli derekter jinap, geografiialyq, biologiialyq erekshelikterine de mán berdi.
«Nazarbaev Ziiatkerlik mektepteri arasyndaǵy «Týǵan elge taǵzym» jelilik jobasy oqýshylarymyzdyń qyzyǵýshylyǵyn erekshe týdyrdy desem artyq aitpaǵan bolar edim. Dástúrli jobaǵa qatysyp, ózderiniń túrli taqyryptardaǵy eńbekterimen tańǵaldyryp júrgen shákirtterimiz az emes. Degenmen, olardyń zertteýshilik daǵdylaryn damytýda bizdiń kómegimiz qajet. Osyny eskere otyryp kópshilikke tanymal «Qońyr Áýlie» úńgiri, «Baianbai ata» syndy jerlerge arnaiy atbasyn burdyq, - deidi tarih jáne geografiia ádistemelik birlestiginiń jetekshisi Janat Amanǵojin.
Oqýshylar óz zertteýlerimen sońǵy 1 jyldan beri ainalysyp keledi. Aldymen jalpylama aqparat jinaǵan olar óz zertteý nysandary boiynsha endi jan-jaqty qarastyrýǵa bel býyp otyr.
«Amina ekeýmizdiń zertteý jobamyz «Baianbai ata týristik marshrýtyn damytý» dep atalady. El arasynda emdik qasietimen tanylǵan bul meken jaily bilý kimge bolsyn qyzyqty dep oilaimyz. Halyqqa qajetti aqparatty berý úshin zertteý júrgizip jatyrmyz. Biz buǵan deiin bul oryn jaily kóptegen derekterdi estip bilsek, endi kózimizben kórip, ondaǵy sýdyń, topyraqtyń quramyn anyqtamaqpyz. Osy ólkede ósetin ósimdikterdi de zertteýdi umytpaimyz.» - deidi Nazarbaev Ziiatkerlik mektebiniń oqýshysy Alima Babakpaeva.
Sondai-aq jas zertteýshiler qazirdiń ózinde arnaiy sait jasap, onda Baianbai ataǵa jetý kartasy kórsetilgen.
Budan bólek, saitqa túrli fotolar, arnaiy ázirlengen qysqa metrajdy aqparattyq – tanymdyq film ornalastyrylǵan eken.
Shyǵys Qazaqstan oblysyndaǵy kieli mekenderdiń biri «Qońyr Áýlie» úńgiriniń qupiiasynyń syryn ashqysy kelgen zertteýshilerdiń ekinshi toby úńgirdegi aýa men sýdyń temperatýrasyn ólshep qana qoimai, sý men topyraqtyń himiialyq quramy jáne ósimdik álemin nazardan tys qaldyrmady. Úńgir jaily túrli ańyz, áńgimelerden bólek tarihi derekter jinady.
Joba jetekshileriniń biri Maqsat Qudageldin shákirtteriniń bul eńbekteri keshendi zertteý ekendigin aityp otyr. «Óitkeni, ústimizdegi jyldyń maýsym aiynda Aqbaýyr shatqalyndaǵy arheologiialyq zertteý jumystaryn kózimen kórip, Nazarbaev Ýniversiteti ǵalymdarynyń keńesine qulaq túrgen ziiatkerlerdiń izdenisi Baianbai ata, Qońyr áýlie úńgiri týraly zertteýmen jalǵasqan.
Josparda týristerdiń erekshe qyzyǵýshylyǵyn týdyryp otyrǵan – «Yrǵyzbai ata» kesenesine sapar shegý bar» deidi joba jetekshisi. Osy saparlardyń barlyǵy – óskeleń jas urpaqtyń ólke tarihyn tereńirek bilýine septigin tigizetin igi sharalar ekeni sózsiz.
