“Ózatom” basshysy Ázim Ahmedhojaev Resei ókilderimen Ózbekstanda atom elektr stantsiiasyn salý jónindegi kelissózder tek jalpylama málimdemeler ekenin jetkizdi, dep habarlaidy Dalanews.kz.
BAQ ókilderiniń qoiǵan suraǵyna ol bul másele boiynsha áli naqty sheshim qabyldanbaǵanyn atap ótti.
“Biz qazir jai ǵana kelissóz júrgizip jatyrmyz. Jalpylama málimdemelerden basqa naqty eshteńe joq. Resei jaǵy da jalpylama málimdeme jasap, biraq qosymsha málimet berip, basqasha astarlap júr. Biraq qazir naqty eshteńe joq. Jalpylama málimetter ǵana", - deidi Ózbekstan atom energetikasyn damytý jónindegi agenttik direktory.
Ótken aptada “Rosatom” korporatsiiasy bas direktorynyń birinshi orynbasary Kirill Komarovtyń aitýynsha, Ózbekstanmen AES qurylysyna qatysty kelissózder “ájeptáýir sátti” ótip jatyr.
“Biz osy jobany júzege asyrýǵa kez kelgen ýaqytta daiynbyz”, - deidi “Rosatom” ókili.
Ózbekstan energetika ministri Jýrabek Mirzahmýdov byltyr qarashada Tashkent AES qurylysyna qatysty Resei “tájiribesi men tehnologiiasyn” ǵana emes, basqa da elderdi de qarastyryp jatyr dep málimdegen.
Eske salaiyq, 2018 jyly qyrkúiekte Ózbekstan Reseimen atom elektr stantsiiasynyń qurylysy týraly áriptestik týraly kelisimge qol qoiǵan. Esh eskertýsiz qabyldanǵan sheshim Ózbekstanǵa kórshiles ornalasqan memleketterdiń alańdaýshylyǵyn týdyrǵan bolatyn.
Derekterge súiensek, AES Ózbekstan-Qazaqstan shekarasynan 40 kilometr jerde ornalasqan Jizaq oblysy Tuzqan kóliniń mańynda salynady degen jospar bar. Bul - Aidar-Arnasai kólder júiesiniń bóligi. Munda strategiialyq mańyzdy nysan Shardara sý qoimasy oryn tepken. Sonymen qatar zaýyt úsh million halyqty qamtyǵan Ózbekstan astanasy Tashkentten nebári 140 km qashyqta boi kórsetpek.
Sondyqtan joba Ortalyq Aziiadaǵy ekologiialyq tepe-teńdik pen investitsiialyq ahýalǵa qaýip tóndirip, aimaqtyq qaýipsizdik shielinisterin odan ári ýshyqtyrýy múmkin. Qala berdi Ózbekstannyń Reseige strategiialyq turǵydan táýeldi bolý kórsetkishi de artpaq.
Al sarapshylar munda magnitýdasy 6,0-6,5-ke deiin, tipti odan da joǵary jer silkinisi bolady dep dabyl qaǵýda. Rasymen de, Ózbekstannyń birneshe qalasynda seismikalyq belsendilik joǵary. Sonyń ishinde zaýytqa jaqyn jerde ornalasqan Jizaq eldi-mekeni jer silkinisine sezimtal aimaq ekenin atap ótken jón. Rihter shkalasy boiynsha bul jerde 9 balldyq apat bolýy múmkin.
