Borodýliha aýdanynyń Dmitrievka aýylyndaǵy «VostokLesIndýstriia» JShS bazasynda órt sóndirý pýnkti ashyldy. Nysan Dmitrievka jáne Borovoe aýyldaryna qyzmet kórsetedi. Bul aýyldarda 1151 adam turady, 358 úi men birqatar áleýmettik nysandar ornalasqan, dep habarlaidy Dalanews.kz
Jańa pýnkt táýlik boiy jumys isteýge múmkindik beretin quraldarmen jabdyqtalǵan. Atap aitqanda, demalys bólmesi, as úi aimaǵy, sanitarlyq torap jáne jýynatyn bólme bar. Pýnkt turmystyq, dala jáne orman órtteri kezinde jedel áreket etýge baǵyttalǵan.
Nysannyń ashylýyna oblys ákiminiń orynbasary Serik Tólenbergenov pen Tótenshe jaǵdailar departamentiniń basshysy Manarbek Shapaǵatov qatysty.
Oblysta 72 órt sóndirý pýnkti bar, sonyń toǵyzy biyl ashylǵan. Bul nysandar 94 myńǵa jýyq turǵyndy qamtityn 165 eldi mekenniń qaýipsizdigin qamtamasyz etedi. Biyl Zenkovka, Petropavlovka jáne Mihailichenkovo aýyldarynda da jańa pýnktter iske qosyldy.
Sonymen qatar Aqsýat aýdanynda da órt qaýipsizdigi kúsheitilip, bólimshe zamanaýi tehnikamen tolyqty. Aýdan aýmaǵynda Qyzylkesik, Qumkól, Oishilik, Kindikti, Kókjyra, Sátbaev jáne Yrǵyzbai aýyldyq okrýgterinde ornalasqan 7 órt sóndirý beketi turaqty jumys isteidi. Munda 21 qyzmetker táýlik boiy qoǵamdyq qaýipsizdikti qamtamasyz etedi. Biyl aýdanda 30-dan astam órt der kezinde sóndirildi.
Búgingi kúni «Aýyl qutqarýshylary» baǵdarlamasy aiasynda Qyzylkesik jáne Kindikti aýyldarynda jańa órt pýnktteriniń qurylysy júrip jatyr.
