Tórtinshi jyl qatarynan ótkizilip keletin eske alý sharasynyń biylǵy formaty ómirde, ónerde izi qalǵan jetisýdyń segiz birdei tarlanynyń ómir joly týrasynda órbidi. Taǵylymdy keshti aqyn Jumatai Ospanuly júrgizdi.
Eske alý sharasynyń shymyldyǵy bala jasynan jetimdiktiń shekpenin kiip, alty jasynda sheshek aýrýy zardabyn tartyp, zaǵip bolǵan, ǵalamat dúnieni kózimen kórmese de júregimen sezinip ósken, 14 jasynda qazaqtyń qara dombyrasyn qolyna alyp, ótkir tildi aitysker atanǵan, tókpe jyrdyń qudiretti iesi Temirǵali Rústembekovtyń bala kezinde áke-sheshesin saǵynyp jazǵan óleńimen ashyldy. Ary qarai halyq aqynynyń ómir joly týraly oblystyq «Jetisý» telearnasy daiyndaǵan beinesiýjet kórsetildi. Tókpe jyrdyń qudiretti iesi týraly túsirilgen beinebaiannan soń ortaǵa tulpardyń tuiaǵy, Temesh atamyzdyń qyzy, oblysymyzdyń ardager jýrnalisi Kúnsaia Ospanova shyǵyp, ákesi týraly oramdy oilaryn ortaǵa saldy.
Mádeniet saraiyndaǵy óleńmen órnektelgen, áýezdi ánmen terbelgen, kesek sózben áspettelgen shara lirik aqyn, birneshe dramalyq shyǵarmalar men dastandardyń avtory Qudash Muqashtyń ómirimen órildi. Kieli sahna tórine taldyqorǵandyq Arshyn Aidynbekuly men Gúlnur Turarova shyǵyp, aqyn men onyń jary Aqjoltai apanyń jas kezindegi obrazyn somdaǵan shaǵyn kórinis kórsetti.
Ótken kúnde belgi bar demekshi, ǵalymnyń hatyndai ómirsheń mura qaldyrǵan aqynnyń qoltańbasy búgin ótkeninen syr sherte sairap tur. Osy tusta aqyn ómirin búginnen tereń, keshedei qanyq tani túsýde arnaiy beinesiýjet te tamashalandy.
Aqynyn eske alǵan shara barysynda Aqsý aýdandyq halyq teatry kvinteti «Aqsýdan ushqan aqqýlar» ánin oryndap, keshti odan ári jandandyra tústi.
Adam urpaǵymen baqytty degen emes pe?! Taǵylymdy sharaǵa arnaiy shaqyrtylǵan aqynnyń qyzy Kemen Qudaibergenqyzy sahna tórine shyǵyp, osyndai keshti ótkizýge uiytqy bolǵan Til basqarmasy ujymyna jáne jobanyń negizgi avtory aqyn Ahmetbek Kendirbekulyna alǵysyn bildirdi.
Jetisýlyq tarlandarǵa arnalǵan keshte qazaq jýrnalistikasynyń qos tarlany Baqyt Álimov pen Rafat Ábdiǵulovtyń ómiri men shyǵarmashylyǵy týraly da tamasha estelikter aityldy. Osy tusta júrgizýshi, aqyn Jumatai Ámireev qonaqtardyń árqaisysyna keiipkerdiń bolmysyn asha túsetin saýaldaryn qoidy. Sahna tórine shyqqan Baqyt Álimovtyń jary Jahan apamyz ben Rafat Ábdiǵulovtyń inisi Qairat aǵamyz ótken kúnderden estelik aityp, osyndai keshti uiymdastyrǵan jandarǵa alǵys aitty.
Dástúrli ótip keletin «Taǵzym» sharasynyń biylǵy keiipkerleri týraly daiyndalǵan beinesiýjet te árkimniń júregin terbedi, kóńil pernesin qozǵady, janarǵa eriksiz jas úiirdi.
Estelikter jyrtylmaityn kitaptai,
Synbaituǵyn butaqtai.
Esteliktiń gúli qýrap solmaidy,
Boiaýy da ońbaidy, - dep aqyn jyrlaǵandai, bul kesh bar ómirin telearna salasyna arnaǵan jetisýdyń úsh birdei tarlany Edil Tókenov, Natalia Borsenko jáne Tursynbek Ybyraiymbekulynyń júrip ótken parasatty ǵumyry týraly tamasha esteliktermen órildi. Shara barysynda tarlandardyń týystary sahna tórine shyǵyp, lebizderin arnady.
Osydan keiin tekti ónerdiń tóresin boiyna sińirip ósken, sahnanyń teńdesi joq sheberi Asan Isaev týraly tamasha beinesiýjet kórsetildi. Akterdiń jary Qarlyǵash Isaeva júrek tebirenterlik oilarymen bólisti.
Taǵylymdy sharada Almaty oblysynyń tilderdi damytý jónindegi basqarmasynyń basshysy Aidar Bashbaev sóz aldy.
«Ultymyzdyń rýhani, mádeni murasy – sóz óneriniń asyl qazynasyna ólsheýsiz úles qosqan Jetisý ólkesiniń mádeniet jáne ádebiet salasynyń qairatkerlerine qurmet kórsetý – bizdiń paryz. Osydan tórt jyl buryn aqyn aǵamyz Ahmetbek Kendirbekulynyń bastamasymen qolǵa alynǵan «Taǵzym» sharasy dástúrge ainalyp, búginge deiin jalǵasyn taýyp keledi. Jaqsynyń jaqsylyǵyn ait, nury tasysyn» demekshi, joba avtoryna sheksiz rizashylyǵymyzdy bildiremiz», - dei kele, máńgilikke baǵyt ustanǵan qazaq eli barda arystai azamattardyń esimi el esinde saqtalatynyn aitty.
Shara barysynda Til basqarmasy atynan «taý tulǵanyń jarqyn beinesi tórińizde tursyn» degen nietpen keiipkerlerdiń qylqalammen salynǵan sýreti týystaryna tartý etildi.
Osy ýaqytqa deiin «Taǵzym» sharasynyń shymyldyq jabar óz ánurany bolǵan. Biylǵy sharada arnaiy jazylǵan «Taǵzym» atty ánniń tusaýy kesildi. Keshte Danagúl Berekettiń sózine, kompozitor Gúlnur Nurasylovanyń áýenine jazylǵan án avtordyń óz oryndaýynda shyrqaldy.
