Astana ákimdigi kópbalaly jáne az qamtylǵan otbasylardy áleýmettik qoldaýdyń qosymsha sharalary týraly jariialady.
Astana qalasynyń ákimdigi turǵyndardy áleýmettik qoldaý sharalaryn arttyrý boiynsha keshendi jospardy ázirleidi, dep habarlaidy elorda ákimdiginiń resmi saity.
Búgin qala ákimdiginde ákim Baqyt Sultanovtyń tóraǵalyǵymen kezekti keńes ótti, ondaǵy basty máselege turǵyndardyń ál-aýqatyn jáne turmys-tirshiliginiń sapasyn arttyrý boldy.
Qala ákimi, Elbasynyń turǵyndardyń ál-aýqatyn jáne turmys-tirshiliginiń sapasyn arttyrýǵa baǵyttalǵan sharalardy kúsheitý boiynsha tapsyrmalaryn ýaqytyly jáne sapaly oryndalý kerektigin eske saldy.
«Memleket basshysynyń tapsyrmalaryn ýaqyty jáne sapaly oryndaýǵa barlyǵymyz atsalysýymyz kerek», – dedi B. Sultanov.
Ákimniń orynbasary Nurlan Nurkenov atap ótýinshe, Elbasy tapsyrmasyn oryndaý turǵysynda ákimdik turǵyndardy qoldaý boiynsha áleýmettik qyzmetter jáne sharalar jiyntyǵyn qalyptastyrǵan.
«2 myń otbasy úshin turǵyn úi kómegi ortasha eseppen 18 % arttyryldy.
Az qamtylǵan otbasylar kommýnaldyq qyzmetterdi tóleý boiynsha kómekke ie bolady.
18 jastan asqan múmkindigi shekteýli tulǵalardy kútýshiler tegin jolaqysymen qamtamasyz etiledi. Úide bilim alatyn múmkindigi shekteýli balalarǵa kómek 25 myń teńgege deiin arttyryldy.
Memlekettik áleýmettik tapsyrys aiasynda tegin tehnikalyq jáne kásibi bilim alýǵa qoldaý kórsetiledi. Biýdjettik uiym qyzmetkerlerine 2 myń turǵyn úi sertifakatyn berý qarastyryldy», – dedi N Nurkenov.
Baqyt Sultanov atap ótkendei, atalǵan sharalar jiyntyǵy budan ári keńeitiletin bolady.
«Bul úshin biýdjetti ońtailandyryp, únemdelgen qarjyny áleýmettik salaǵa jumsaimyz. Aldaǵy biýdjetti naqtylaý aiasynda kópbalaly jáne az qamtylǵan otbasylardy qoldaýǵa jalpy somasy 3,2 mlrd. teńgeni quraityn 8 qosymsha áleýmettik shara qarastyrylady», – dedi ákim.
Kópbalaly otbasylardyń balalaryna, onyń ishinde mektep oqýshylary, joǵary oqý oryndary men kolledj stýdentterine qoǵamdyq kólikte tegin júrý múmkindigi beriledi. (Bul kómekti 36 myń adam alady. Osy qoldaýǵa biýdjetten 208 mln. teńge qarastyrylady).
1-11 synyptarda oqityn kópbalaly otbasylardyń balalary mektepte tegin ystyq tamaqpen qamtylady.
Osy sanattaǵy 32 myń balaǵa 971 mln. teńge bólinedi. Olar, sondai-aq, mektep formasymen jáne qajetti oqý quraldarmen tegin qamtamasyz etiledi (32 myń balaǵa 638 mln. teńge bólinedi).
Odan bólek, kópbalaly jáne az qamtylǵan otbasy balalaryna, jetim balalarǵa arnaiy saýyqtyrý demalysy uiymdastyrylady (10 myń balaǵa 500 mln. teńge bólinedi).
Kópbalaly jáne az qamtylǵan otbasy balalary, sondai-aq, múgedek balalar balabaqshaǵa tegin ornalastyrylady. Biýdjetten 3,8 myń balany qamtý úshin 513 mln. teńge qarastyrylady.
Sondai aq, kópbalaly otbasydan shyqqan 180 balaǵa elordalyq joǵary oqý ornynda suranysqa ie mamandyqtar boiynsha bilim alýǵa arnaiy granttar beriledi (25 mln. teńge, jylyna 500 myń teńge). Kópbalaly analarǵa tegin stomatologiialyq kómek kórsetiledi (sanatsiia, protezdeý). Bul kómekpen 10 myń adamdy qamtý úshin 404 mln. teńge bólinbek. Sonymen qatar, biýdjet naqtylanǵannan keiin kópbalaly otbasylar qatty otyn (kómir) alý úshin áleýmettik kómek alýshylar sanatyna qosylady (1000 otbasyna 26,3 mln. teńge bólinedi).
«Azamattardyń ál-aýqatyn arttyrý – qaladaǵy barlyq memlekettik organdardyń mindeti. Sondyqtan, turǵyndardy áleýmettik qoldaý sharalaryn arttyrý boiynsha Astana qalasy ákimdiginiń keshendi josparyn ázirleý qajet», – dedi Baqyt Sultanov.
