Sýbsidiialanatyn jumys oryndaryn qurǵysy keletin jumys berýshilerge qoiylatyn talaptar kúsheitiledi, dep habarlaidy Dalanews.kz.
"Sybailas jemqorlyq táýekelderin azaitý jáne adami faktordy boldyrmaý maqsatynda QR Eńbek jáne halyqty áleýmettik qorǵaý ministrligi sýbsidiialanatyn jumys oryndaryn (SJO) uiymdastyrýǵa ótinim beretin jumys berýshilerge qoiylatyn talaptardy qatańdatý boiynsha jumys júrgizýde. Jumys berýshilerdi irikteý protsesi 7 mindetti talaptarǵa negizdeledi jáne tolyq avtomattandyrylady. Bul rette memlekettik sýbsidiialar alǵan uiymdar aldaǵy ýaqytta jumysqa ornalastyrylǵan jumyssyzdardyń keminde 10%-yn turaqty jumyspen qamtýy tiis", dep habarlaidy Eńbek jáne halyqty áleýmettik qorǵaý ministrligi.
Eńbekmini halyqty jumyspen qamtý salasyndaǵy tásilderdi jetildirý boiynsha júrgizip jatqan jumys sheńberinde jumys berýshilerden ótinimderdi qabyldaý, jumys berýshilermen SJO uiymdastyrýǵa sharttar jasasý protsesteri tolyǵymen avtomattandyryldy, jumys ornyna barý tabeli engizildi, qatysýshynyń jumys ýaqyty esepke alyndy.
Alaida, SJO-nyń jeke quraldary odan ári jetildirýdi qajet etedi.
Mysaly, SJO uiymdastyratyn jumys berýshilerdiń tizbesin osy mansaptyq ortalyqtardyń negizinde tikelei eńbek mobildiliginiń ortalyqtary qalyptastyrady. Osylaisha, sheshim qabyldaý múmkindigi jeke adamdarǵa beriledi.
"Jumys berýshiler tizimin qalyptastyrý kezinde mansap ortalyqtarynyń qyzmetkerleri ózderiniń tanystary men jaqyn týystarynyń uiymdaryna artyqshylyq berip, jumys oryndaryn saýdalaityn jaǵdailar boldy. Osyndai faktiler anyqtalyp, olar boiynsha materialdar tiisti memlekettik organdarǵa beriledi", – dedi Eńbekmini Halyqty jumyspen qamtý departamentiniń direktory Qanat Abdýlla.
Ministrlik mundai jaǵdailarǵa jol bermeý úshin tiisti buiryqqa túzetýler daiyndaldy.
Ózgeristerge sáikes, jumys berýshiler kelesi talaptarǵa sai bolǵan jaǵdaida SJO uiymdastyrýǵa qatysa alady:
- Qazaqstan aýmaǵynda tirkelgen jumys istep turǵan zańdy tulǵa nemese dara kásipker mártebesiniń bolýy;
- sýbsidiialanatyn jumys oryndaryn uiymdastyrýǵa ótinim berilgen kúnge deiin 12 aidan astam qyzmetti júzege asyrý;
- ótinim berý sátinde jalaqy boiynsha merzimi ótken bereshektiń bolmaýy;
- sońǵy 12 ai ishinde jumyskerler úshin áleýmettik tólemderdi turaqty júrgizý;
- QR Qarjy ministrligi Memlekettik kirister komitetiniń senimsiz salyq tóleýshiler tiziminde bolmaýy;
- eńbek mobildiligi ortalyǵymen jasalǵan sýbsidiialanatyn jumys oryndaryn uiymdastyrý týraly aldyńǵy sharttar boiynsha barlyq mindettemelerdi oryndaý;
- bankrottyq nemese joiý rásimine jatpaidy.
Jumys berýshilerdiń kórsetilgen talaptarǵa sáikestigin tekserý Elektrondyq eńbek birjasyna ótinimder bergen kezde avtomatty rejimde júzege asyrylatyn bolady. Jumys oryndary qyzmetkerlerdiń tizimdik sanyn eskere otyryp bólinetin bolady.
SJO uiymdastyrý úshin memlekettik sýbsidiialar alǵan jumys berýshiler bolashaqta jumysqa ornalastyrylǵan jumyssyzdardyń keminde 10%-yn turaqty jumyspen qamtamasyz etýge tiis.
"Bul talapty engizý sýbsidiialanatyn jumys oryndarynda jumysyn aiaqtaǵan azamattardyń turaqty jumyspen qamtylýyn qamtamasyz etý qajettiligine bailanysty. Jumysqa ornalasý deńgeii obektivti sebeptermen jumysqa ornalasa almaityn adamdardy esepke almai esepteledi. Bul talap óz shtatynda 10 jáne odan da kóp qyzmetkeri bar jumys berýshilerge qoldanylady", – dep túsindirdi Qanat Abdýlla.
Sonymen qatar memleketten qosarlanǵan qarjylandyrýdy boldyrmaý jáne memlekettik qoldaý sharalarynyń ataýlylyǵyn arttyrý maqsatynda jumys berýshiler úshin shekteýler engiziledi.
Osylaisha, arnaýly áleýmettik qyzmetter kórsetýge litsenziiasy bar, infraqurylymdyq jobalar boiynsha memlekettik satyp alý sheńberinde qyzmetter kórsetetin nemese jumysty oryndaityn jumys berýshiler SJO uiymdastyrýǵa qatysýǵa jiberilmeidi.
Arnaýly áleýmettik qyzmetter kórsetetin ortalyqtardy (budan ári – AÁQKO) litsenziialaý sheńberinde EHÁQM sýbsidiialanatyn jumys oryndaryn uiymdastyrýǵa AÁQKO-nyń qatysýyna taldaý jasaldy.
2025 jyly AÁQKO-men eńbek utqyrlyǵy ortalyqtary jalpy somasy 519,8 mln teńgege 3,8 myń adamǵa arnalǵan SJO uiymdastyrýǵa sharttar jasasty. 189 arnaýly áleýmettik qyzmetter kórsetetin ortalyqtarda 919 adam jumysqa ornalastyryldy, olardyń jalaqysyn tóleýge biýdjetten 60,8 mln teńge jumsaldy.
EHÁQM jergilikti atqarýshy organdarmen birlesip, sýbsidiialanatyn jumys oryndaryna qatysýshylardy turaqty jumyspen qamtýdy qamtamasyz etý boiynsha AÁQKO-men jumys júrgizdi. Osylaisha, 212,6 mln teńge qarajat únemdeldi, ol halyqty jumyspen qamtýǵa járdemdesý sharalaryna qaita bólinetin bolady.
Budan basqa, memlekettik bilim berý tapsyrysy nemese tegin meditsinalyq kómektiń kepildik berilgen kólemi sheńberinde biýdjetten qarjy alatyn jumys berýshiler jastar praktikasyn uiymdastyrýǵa ǵana jiberiletin bolady.
Halyqtyń muqtaj sanattarynyń arasynan shyqqan adamdarǵa memlekettik qoldaý sharalaryn kórsetý, úmitkerlerdiń táýeldilik kóńil-kúiin tómendetý maqsatynda eki jyl ishinde bir ret SJO-ǵa jumysqa ornalastyrý usynylady.
Bul talap aýyldyq jerlerde nemese shaǵyn qalalarda turatyn adamdarǵa, monoqalalar men qalalarda turatyn halyqtyń áleýmettik osal toptaryna qoldanylmaidy.
Bul rette áleýmettik osal toptarǵa mynalar jatady:
- múgedektigi bar adamdar;
- ataýly áleýmettik kómek alýshylar;
- asyraýshysynan aiyrylý jaǵdaiy boiynsha áleýmettik tólem alýshylar;
- qonys aýdarýshylar;
- qandastar;
- múgedektigi bar balany (múgedektigi bar balalardy) tárbielep otyrǵan adamdar;
- ai saiyn kópbalaly otbasylarǵa beriletin memlekettik járdemaqyny alýshylar.
Sýbsidiialanatyn jumys oryndaryna jumysqa ornalasýǵa úmitkerlerden ótinish tek Elektrondyq eńbek birjasy arqyly qabyldanatyn bolady.
