Májilis depýtaty Erlan Saırov aýyl turǵyndaryna arnalǵan jeńildetilgen ıpoteka ashýdy usyndy, dep habarlaıdy Dalanews.kz.
Depýtat vıse-premer Serik Jumanǵarınge saýal joldady. Saırov Qazaqstan halqyna Joldaýynda Prezıdent Qasym-Jomart Toqaev "Otbasy banktiń" qyzmetin qaıta qaraý kerek. Basty nazardy oblys ortalyqtaryna emes, aýdandarǵa, monoqalalarǵa jáne aýyldarǵa aýdarǵan jón" dep naqty baǵdar bergenin eske saldy.
"Búginde aýyldyq aýdandar men monoqalalarda 8,7 mln adam turady, bul Qazaqstan halqynyń 43 %-y bolady. Al turǵyn úımen qamtamasyz etý deńgeıi qalalarda 26,9 sharshy metr bolsa, aýyldarda bir adamǵa shaqqanda nebári 20,7 sharshy metr bolyp otyr.2025 jyldyń basynda aýyldarda 9 myńnan astam adam turatyn 1200 avarıalyq úı, monoqalalarda 2,3 myń adam turatyn 76 avarıalyq úı boldy", - dedi depýtat.
2022-2024 jyldary jańa turǵyn úıdiń tek 20 %-y aýyldyq jerlerde paıdalanýǵa berilgen.
"Mundaı dısproporsıa eń aldymen aýyl turǵyndary úshin ıpotekalyq, Otbasy banki ónimderiniń qoljetimsizdigimen jáne halyqtyń habardar bolý deńgeıi tómen bolýyna baılanysty. Otbasy banktiń konsýltasıalyq ortalyqtary tek 4 monoqalada jáne 5 shaǵyn qalada jumys isteıdi, aýyldar men aýdandardyń kóp bóliginde múldem jumys istemeıdi", - dedi ol.
Depýtattyń pikirinshe, Otbasy banktiń qyzmetin "aýdan ortalyqtaryna, monoqalalarǵa, aýylǵa burý" týraly Prezıdenttiń tapsyrmasy naqty iske asyrý tetikterinsiz qalǵan.
Erlan Saırov aýylǵa beıimdelgen ıpotekalyq ónimderdi ázirleýdi usyndy:
"Aýyldar, monoqalalar jáne shaǵyn qalalar turǵyndary úshin tómendetilgen mólsherlemesi 5 %-ǵa deıin jáne eń tómengi bastapqy jarnasy 10%-dan bastap jeńildikti ıpotekalyq ónimder jasaý qajet. Halyqtyń áleýmettik jaǵynan osal sanattary úshin mólsherlemelerdi sýbsıdıalaýdy qamtamasyz etý kerek", - dedi ol.
