Sońǵy jyldary Qazaqstan halyqaralyq máni zor sporttyq sharalardy ótkizip, dúniejúziniń nazary elimizge aýdy. Qysqy Aziia oiyndaryn joǵary deńgeide uiymdastyrǵan Qazaqstan óziniń kúsh-qýatyn álemge pash etkeni barshaǵa málim. Ótken jyly kúzde aýyr atletikadan álem chempionatyn joǵary deńgeide uiymdastyrdyq. Alda Ýniversiada kele jatyr. Kópshilik qaýym osy sharalar elimizde buqaralyq sporttyń damýyna negiz bolady dep úmit artty. Biraq buqaralyq sport óz biigine shyqqan joq. Osy rette Qazaq sport jáne týrizm akademiiasynyń rektory, Stýdenttik sport federatsiiasynyń prezidenti Qairat Zakirianov myrzamen elimizdegi buqaralyq sporttyń aiaq alysy, Ýniversiadaǵa daiyndyq barysy jaiynda suhbattasýdyń sáti tústi.
Daiyndyq deńgeii joǵary
– Qairat Hairollauly, kúni keshe ǵana Slovakiia men Ispaniiada jalaýy jelbiregen 27-shi Qysqy Ýniversidaǵa qatysyp, bairaqty básekeniń Almatyda ótkizýi úshin arnaiy týdy qabyldap alyp, elge ákeldińiz. Siz óz ómirińizde kóptegen Olimpiadalar men Ýniversiadalarǵa qatysyp kelesiz, osy jolǵy jarystyń uiymdastyrylýy qalai boldy? Óz baǵańyzdy berseńiz?
– Ústimizdegi jyldyń 24 qańtary men 15 aqpany aralyǵynda Slovakiia men Ispaniiada stýdentter 27-shi Qysqy Ýniversiadasy bolyp, Qazaqstan komandasy jalpy esepte úshinshi orynǵa ie boldy. O basta aitýly doda Ispaniianyń Grnada qalasynda ǵana ótkizýdi josparlaǵan edi. Biraq Eýropany jailaǵan qarjy-ekonomikalyq daǵdarys Ispaniianyń jeke-dara halyqaralyq jarysty ótkizýine múmkindik bermegen soń, Ýniversiadanyń biraz baǵdarlamasyn Slovakiianyń Shtrebske Pleso qalasynda ótkizý týrasynda sheshim qabyldanǵan bolatyn. Osylaisha daǵdarys kezinde halyqaralyq deńgeidegi aýqymdy sharalardy uiymdastyrý isi damyǵan Eýropa elderiniń ózderine úlken qiyndyq týǵyzǵanyna kýá boldyq. Osy turǵydan alǵanda Memleket basshysy Nursultan Nazarbaevtyń bastamasymen táýelsiz Qazaqstannyń aýqymdy sharany ótkizýdi moinyna alyp otyrǵanyn úlken erlikke baǵalaýǵa bolady. Damý baǵytynan ainymaǵan elimiz ekonomikalyq qiynshylyqtarǵa qaramastan Qysqy Ýniversiadany uiymdastyrýǵa bel býyp, bilek sybana kirisip ketti. Osydan bir ai buryn shamasynda QR Úkimeti Tóraǵasynyń orynbasary Berdibek Saparbaev myrza Almatyǵa at basyn buryp, aitýly jarysty ótkizý úshin salynyp jatqan nysandardy aralap, qurylys jumystarymen tanysty. Ol jumys sapary barysynda daiyndyq jumystarynyń bári kestege sai, josparly túrde júzege asyp jatqanyn óz kózimen kórip, rizashylyǵyn bildirdi. Sol kezdesýde Berdibek Saparbaev Ýniversiadany joǵary deńgeide ótkizýdi Elbasy Nursultan Nazarbaevtyń ózi baqylap otyrǵanyn aitty. Sondyqtan aldaǵy ýaqytta Almatyda jalaýy jelbireitin Ýniversiada joǵary deńgeide ótip, elimizdiń abyroiyn asqaqtatatynyna senimdimin.
– Iá. 2016 jyldyń tamyz aiyna deiin Ýniversiada ótetin iri úsh nysannyń qurylysy aiaqtalmaqshy. Olar – Alataý aýdanynda salynyp jatqan on eki myń oryndyq muz aidyny, bes myń oryndy Olimpiada qalashyǵy jáne úsh myń oryndy shaibaly hokkei oiyndaryn ótkizýge arnalǵan muz aidyny. Ispaniia Ýniversiadany ótkizýdi moinyna alǵanda jańadan birde-bir sport nysanyn salǵan joq. Olar sport nysandaryna jóndeý jumystaryn júrgizdi. Ókinishke orai, olar jóndeý jumystaryn óz deńgeiinde júrgize almai, sońynda jarystyń jartysyn Slovakiiaǵa tapsyrýǵa májbúr boldy. Budan keiin uiymdastyrýshylar jedel túrde bas qosyp, sporttyq baǵdarlamalardyń biraz bóligin Slovakiianyń Shtrebske Pleso qalasynda ótkizýge sheshim qabyldady. Bul qalada birneshe jyl buryn Ýniversiada ótkendikten Slovakiia úkimeti jańa sport nysandaryn salyp, áýrege túspedi. Osy jaittardy saraptaǵan adam Qazaqstan Ýniversiadany ótkizý barysynda dúniejúzilik qaýymdastyq aldynda qandai jaýapkershilikti moinyna alǵanyn baiqaimyz. Slovakiiada shańǵyǵa qatysty sport túrleri joǵary deńgeide uiymdastyryldy. Ýniversiadanyń ashylýyna Slovakiia prezidenti Andrei Kiskanyń ózi qatysyp, airyqsha qoldaý kórsetti.
Balýan Sholaq atyndaǵy sport saraiy Qysqy Aziia oiyndary kezinde kúrdeli jóndeýden ótti. Bairaqty báseke aiaqtalǵannan keiin «Qazsportinvest» degen aktsionerlik qoǵamnyń qaraýyna tapsyryldy. Olar sport saraiyn bir kúnge milliondaǵan teńgege jalǵa beredi. Sarai Almaty qalasyndaǵy buqaralyq sporttyń damýyna tittei de úles qosyp otyrǵan joq. Qazir sport ǵimaraty itter men gúlderdiń kórmesi ótetin orynǵa ainalyp barady.
– Qairat myrza, Ýniversiadaǵa Qazaqstan komandasyn bastap baryp, jarysty bastan-aiaq tamashaladyńyz. Úshinshi orynǵa taban tiregen qazaqstandyq sportshylardyń oiyndary kóńilińizden shyqty ma?
– Birden aitaiyn. Bizdiń komanda Ýniversiadada sátti óner kórsetti. Jarys bastalǵan alǵashqy kúnderi ekinshi oryndy eshkimge bermedik. Tek sońǵy kúnderi ǵana kúmis medaldar boiynsha Ońtústik Koreiaǵa jol berip aldyq. Osylaisha Qazaqstan buryn-sońdy qol jetkizip kórmegen tarihi kórsetkishke ie bolyp, elimizdiń kók bairaǵyn biik jelbiretip qaitty. Qysqy sporttyń 12 túrinen baq synaityn bairaqty básekede 7 sport túrinen sportshylardy qatystyrǵan Qazaqstannyń úshinshi orynnan kórinýin úlken nátije dep baǵalaimyn. Bizder Slovakiiada eki, Ispaniiada eki altyn medalǵa ie boldyq. Bizdiń hokkeishiler aqtyq synda Resei komandasymen oinap, kúmis medaldy mise tutty. 2005 jyly Avstriianyń Insbrýk qalasynda bolǵan Ýniversiadada Qazaqstan komandalyq esepte jetinshi orynǵa taban tiregen edi. Mine, sodan beri bizdiń komandamyz joǵary nátije kórsetip, halyqtyń úmitin aqtady. Almatyda ótetin básekede bizdiń sportshylar budan da joǵary nátije kórsetetinine senimdimin.
– Ýniversiadada top jarǵan sańlaq sportshylarymyzǵa laiyqty qurmet kórsetilgen shyǵar?
– Árine, top jarǵan sportshylyr syi-siiapatsyz qalǵan joq. Olimpiadada altyn alǵan sportshylarǵa Úkimet 250 myń dollar kóleminde syiaqy berip kelgeni belgili. Al Aziia oiyndarynda altyn alǵandar 10 myń dollar, Ýniversiadada top jarǵan sportshylar 3 myń dollar alýshy edi. Aitýly jarys bastalmai turyp, Úkimetke Ýniversiadada altyn alǵan sportshylarǵa beriletin syiaqy mólsherin kóterý týrasynda usynys jasadym. Óitkeni, Ýniversiada Aziia oiyndarynan da tartysty ótetini jasyryn emes. Sondyqtan Úkimetke hat jazyp, óz usynysymdy aittym. Óz kezeginde bilik oryndary usynysymdy qabyl alyp, Ýniversiadada altynnan alqa taǵynǵan sportshylarǵa 15 myń dollar kóleminde syiaqy taǵaiyndady. Bul tek qana sportshynyń alatyn syiaqysy. 2015 jyldan bastap dál osy kólemdegi syiaqyny sportshylardyń jattyqtyrýshysy da alatyn boldy. Kúmis medal alǵan sportshy 10 myń dollar, al qolaǵa qol jetkizgen jastarymyz 5 myń dollar syiaqyǵa ie boldy. Osy rette «Qala men Dala» gazetiniń minbesin paidalanyp, usynysymyzdy qabyl alǵan Úkimet basshysy Kárim Másimovke alǵys aitamyn. Jarysqa qatysqan sportshylarymyzdy Astanada Úkimet basshysynyń orynbasary Berdibek Saparbaev arnaiy qabyldap, Elbasy Nursultan Ábishulynyń ystyq yqylasyn jetkizdi.
Sport sarailary el igiligine berilsin!
– Qairat myrza, siz elimizdegi buqaralyq sporttyń damýyn jaqtap, udaiy másele kóterip júresiz. Qalai oilaisyz, Ýniversiadaǵa arnap salynǵan sporttyq nysandar qarapaiym halyqtyń igiligine berile me?
– Oryndy suraq. Aziiada oiyndary kezinde elimizde birneshe sport nysandary salyndy. Búginde sol jerde qarapaiym halyqtyń sportpen ainalysýyna qaltasy kótermeidi. Bul durys emes. Aitalyq, Balýan Sholaq atyndaǵy sport saraiy Qysqy Aziia oiyndary kezinde kúrdeli jóndeýden ótti. Bairaqty báseke aiaqtalǵannan keiin «Qazsportinvest» degen aktsionerlik qoǵamnyń qaraýyna tapsyryldy. Olar sport saraiyn bir kúnge milliondaǵan teńgege jalǵa beredi. Sarai Almaty qalasyndaǵy buqaralyq sporttyń damýyna tittei de úles qosyp otyrǵan joq. Qazir sport ǵimaraty itter men gúlderdiń kórmesi ótetin orynǵa ainalyp barady. Sondyqtan iri jarystardy ótkizý úshin salynǵan nysandardy jergilikti bilik oryndarynyń qaraýyna bergen jón. Sol kezde ǵana elimizde buqaralyq sport damidy. Bizder osy sport nysandarynyń kommýnaldyq qyzmet aqysyna qinalyp, barlyq nysandy kommertsiialyq qurylymǵa ainaldyrýymyz úlken qatelik. Osy sport nysandarynyń azdaǵan shyǵyndaryn kóterip, jastardyń sportpen ainalysýyna jaǵdai jasasaq, buǵan ketken shyǵyndy densaýlyq saqtaý salasyna bólip otyrǵan milliardtaǵan qarjydan únemdeýge bolady. Sportpen ainalysqan adamnyń deni saý bolatyny belgili. Osyny eskerip, Elbasy Nursultan Nazarbaev qazaqstandyqtardyń salaýatty ómir saltyn ustanyp, buqaralyq sportpen ainalysýyna basa mán berip keledi. Ókinishke orai, áldekimder iske ortan joldan aralasyp, sport nysandaryn kommertsiialyq qurylymǵa ainaldyryp, buqaralyq sporttyń damýyna kedergi keltirip otyrǵany arqamyzǵa aiazdai batady.
– Qazir kez kelgen memleket úshin legioner máselesi ózekti bolyp turǵany jasyryn emes. Jalpy, bul úrdiske qalai qaraisyz?
– Dúniejúziniń barlyq elderinde legionerler bar. Bul álemde sońǵy jyldary qalyptasqan úrdis qoi. Sondyqtan buǵan basybútin qarsymyn dep aita almaimyn. Degenmende, bizder birinshi kezekte elimizdegi jastardy sporttyń túrli salasyna baýlysaq, legionerlerge kúnimiz qaramas edi. Shalǵaida jatqan aýyldarǵa baryp, talantty balalardy iriktep alyp, sportqa tartýymyz kerek. Qazaq sport jáne týrizm akademiiasy jas jetkinshekterdiń qandai sportqa beiimi bar ekenin anyqtap beretin arnaiy test jasap shyǵardy. Osy synaqtyń kómegimen talai balanyń talantyn tanyp bilýge bolady. 5-6 synypty oqyp júrgen jas jetkinshekterdiń osy synaqtan ótkizip, beiimin anyqtatýǵa bolady. Qazirgi tańda QR Bilim jáne ǵylym ministri Aslan Sarynjipovtyń bastamasymen Qazaqstandaǵy stýdentter men oqýshylar arasyndaǵy sportty damytýdyń kontseptsiiasyn daiyndadyq. Osydan birshama ýaqyt buryn atalǵan qujatty ministrliktegi mamandardyń nazaryna usynǵanymyzda, olar birshama ózgertýler jasaý kerektigin eskertti. Bizder eskertýlerdi basshylyqqa alyp, qujatqa tiisti ózgertýlerdi engizdik. Taiaý kúnderi bul qujat bekitilip, júzege asa bastaityn bolady. Bul qujat JOO men mektepterde sportty damytýdyń sham-shyraǵyna ainalatyn kún de alys emes.
Sport – densaýlyq kepili
– Kúni keshe ǵana ótken Ýniversiadada Qazaqstan 20 kún boiy komandalyq esepte ekinshi orynda turdy. Sol kezde álem halqynyń «bul qandai el» dep Qazaqstandy tanyp-bilýge umtyldy. Sport – eldi tanytatyn qural ekenin qazir bes jasar bala da biledi. Sport elimizdi tanytyp qoimai, halyqtyń densaýlyǵyn kóterýge kóp septesetin sala ekeni belgili. Dúniejúzilik densaýlyq saqtaý uiymynyń esebinshe meditsina arqyly halyqtyń densaýlyǵyn 10-12 paiyzǵa deiin kóterýge bolady. Budan ary qarai meditsinaǵa milliardtap qarjy quisańyz da jaǵdai jaqsarmaidy. Al buqaralyq sport halyqtyń densaýlyǵyn 55-60 paiyzǵa deiin kóteretin múmkindikke ie. Sondyqtan bizder buqaralyq sportty damytýǵa qarjy aiamaýymyz kerek. Munyń paidasy orasan zor. Álemde Ýniversiadanyń murasy degen qaǵida qalyptasqan. Tórtkúl dúnie kóz tikken is-sharalar memlekettiń damýyna paidasyn tigizetini tiis. Bairaqty báseke ótkennen keiin sporttyq nysandardy jastardyń paidalanýyna bergen jón. Qandaida bir aktsionerlik qoǵamdar enshilep ketpeý kerek. Sol kezde bizder Elbasy Nursultan Nazarbaev aitqandai, halyqtyń 30 paiyzy buqaralyq sportpen ainalysý múmkindigine ie bolady. 30 paiyz degenińiz 6 million adam. Sol 6 millionnyń 10 paiyzy sportpen kásibi túrde ainalyssa (bul degenińiz 600 myń adam) bizder shetelden sportshy shaqyrmas edik. Qazir bizder Qytaidan biraz aýyr atletterdi shaqyrdyq. Sol siiaqty Kavkazdan balýandar kelip, elimizdiń namysyn qorǵap júr. Buqaralyq sportty órkendetsek, legionerlerge kúnimiz qaramaidy.
London Olimpiadasynda Maia Maneza men Zýlfiia Chinshanlo altyn alyp bergende Batystyń basylymdary «Qazaqstan altyn medalǵa ie boldy» dep súiinshi suraǵan joq. Olar «Qytai óz azamattarynyń Qazaqstanǵa altyn medal alyp bergenine narazylyq bildirdi» degen maǵynada habar taratty. Osyndai jaittardy nazarǵa alsaq, legionerler abyroiymyzdy biz oilaǵandai asqaqtatpaitynyn baiqaimyz. Sondyqtan bizder buqaralyq sportty damytyp, talantty qazaqstandyq jastardyń jarqyrai kórinýine jol ashýymyz kerek.
– Ol úshin Ýniversiada úshin salynǵan ǵimarattar halyqtyń igiligine berilýi kerek qoi.
– Durys aitasyz. Qazir bul baǵytta jumys istep, Úkimetke tiisti usynystar jasap jatyrmyz. Sport nysandaryn halyqtyń paidalanýyna berý máselesin Almaty qalasynyń ákimi Ahmetjan Esimov te eki qolyn kóterip qoldap otyr. Aqyrǵy sheshimdi Úkimet qabyldaityny belgili. Ózińiz bilesiz toqsanynshy jyldardyń basynda Almatydaǵy ýniversitetterdiń sol kezdegi rektorlary jataqhanalardyń kópshiligin satyp jiberdi. Sonyń kesirinen qazir Almatydaǵy oqý oryndary arasynda jataqhana máselesi eń ózekti máselege ainaldy. Bizder bairaqty báseke aiaqtalǵannan keiin Ýniversiada qalashyǵyn stýdent jastarǵa jataqhana retinde berý týrasynda usynys jasap jatyrmyz. Meniń bul usynysymdy qala basshysy Ahmetjan Smaǵululy da qoldady. Biraq o bastaǵy jospar boiynsha sheteldik sportshylar úshin turǵynjai retinde salynǵan úiler «Qoljetimdi baspana» baǵdarlamasy boiynsha halyqqa úlestirilýi tiis eken. Menińshe, Ýniversiada qalashyǵyn halyqqa baspana retinde taratyp berý jón emes. Ony stýdentter qalashyǵyna ainaldyrýymyz kerek. Qazir Almatyda 600-700 myń stýdent bar. Solardyń tek 20 paiyzy ǵana jataqhanamen qamtylǵan. Eger osy nysandardy stýdentterge bersek, jastarymyz Elbasy Nursultan Nazarbaevtyń mundai qamqorlyǵyn jyldar boiy aityp, kókirekterin maqtanysh sezimi kernep júrer edi. Taiaýda Ýniversiadadan keiin el stýdentteri atynan Prezident Nursultan Ábishulyna osy máseleni aityp, hat jazdy. Qazaqstan stýdentteri 2022 jyly Memleket basshysynyń qoldaýymen elimizdiń Qysqy Olimpiadany ótkizetinine senim artyp otyr. Búginde aitýly jarysty ótkizý úshin Almaty men Beijiń ǵana talasýda. Bizdiń baǵymyz janatynyna senimdimin. Sondyqtan Ýniversiadaǵa arnap salǵan nysandardy memleket qaramaǵynda qaldyrǵan jón.
London Olimpiadasynda Maia Maneza men Zýlfiia Chinshanlo altyn alyp bergende Batystyń basylymdary «Qazaqstan altyn medalǵa ie boldy» dep súiinshi suraǵan joq. Olar «Qytai óz azamattarynyń Qazaqstanǵa altyn medal alyp bergenine narazylyq bildirdi» degen maǵynada habar taratty.
Ǵylymi-zertteý institýty qajet
– Qairat Hairollauly, búginde ózińiz basqaryp otyrǵan Qazaq sport jáne týrizm akademiiasy bilikti sportshylar daiyndaýmen qatar, sporttyq ǵylymdy da damytýǵa úles qosyp kele jatqanyn bilemiz. Qazaqstandaǵy sporttyq ǵylymnyń damýyna kóńilińiz tola ma?
– Sporttyq ǵylym bul bizdiń eń osal tusymyz. Qazirgi damyǵan zamanda sporttyq ǵylym damymaiynsha sport órkendemeidi. Ataqty sportshylarymyzdyń jattyqtyrýshylary sporttyq ǵylymǵa tiisti deńgeide mán bermeidi. Budan keiin babyna kelgen sportshylar jarys kezinde súrinip, jaisyz jaǵdailarǵa tap bolyp jatady. Aitalyq, Serik Sápiev Beijiń Olimpiadasy qarsańynda ol óz salmaǵynda top bastap turdy. Kópshiligimiz Seriktiń Olimpiadada top jaratynyna senimdi boldyq. Jalpy, sportshylar belgili bir ýaqyt aralyǵynda babyna keledi. Sol bapty iri jarystarǵa deiin saqtap turý úshin sporttyq ǵylymǵa júginý kerek. Beijiń Olimpiadasy qarsańynda Serik bizdiń akademiianyń janyndaǵy Sporttyq ǵylymi-zertteý institýtyna kelip tekserýden ótti. Sol kezde mamandar Seriktiń babynda ekenin aityp, ózin-ózi zoryqtyrmai babyn saqtaý týrasynda keńes berdi. Ókinishke orai, Serik mamandardyń sózine qulaq aspai ústi-ústine jattyǵý jasady. Nátijesinde ol Beijiń Olimpiadasynda zoryǵyp, chempion bola almai qaldy. Keiinnen Serik inimiz óziniń qateligin túsindi. London Olimpiadasynda bizdiń institýttyń ǵalymdarymen tyǵyz jumys istep, olardyń aitqandaryn eki etpei oryndap, nátijesinde London Olimpiadasynyń chempiony, Barker kýboginiń iegeri atandy. Dziýdoist Ashat Jitkeev pen shańǵyshy Aleksei Poltoranin Olimpiada oiyndary qarsańynda mamandar keńesine qulaq, opyq jep qalǵanyn bilemin. Sondyqtan bizder sporttyq ǵylymdy damytýǵa kóńil bólýimiz kerek.
– Bul baǵytta memleket tarapynan qandaida bir qoldaý qajet shyǵar?
– Árine, bir oqý orynnyń kúshimen sporttyq ǵylymdy damytý múmkin emes. Memlekettiń qoldaýy aýadai qajet. 2001 jyly Memleket basshysy Nursultan Nazarbaev «Qazaqstan Respýblikasynda dene shynyqtyrý men sportty damytýdyń 2011-2015 jyldarǵa arnalǵan salalyq baǵdarlamasyn» bekitken edi. Osy baǵdarlamada Qazaqstanda buqaralyq sport pen kásibi sportty damytý úshin elimizde ǵylymi-zertteý institýtyn qurý tapsyrylǵan edi. Ókinishke orai, Prezidenttiń sol tapsyrmasy oryndalmai qaldy. Qazir bizder akademiia janynan shaǵyn Sporttyq ǵylymi-zertteý institýtyn quryp, jumys istep jatyrmyz. Shaǵyn institýt otandyq sporttyń ózekti máselelerin ǵylymi turǵydan tolyqtai zerdeleitin múmkindigi joq. Ýniversiadanyń sheńberinde osy máseleni oń baǵytta sheshý týrasynda Úkimetke hat jazyp, másele kóterip jatyrmyz. Bairaqty básekeden keiin bosaǵan ǵimarattardyń bir buryshynan ǵylymi-zertteý institýtyn qurý týrasynda usynys jasadyq. Bul máseleniń qalai sheshiletini ýaqyttyń enshisinde. Eger usynysymyz Úkimet tarapynan qoldaý tapsa, bizder halyqaralyq uiymdardyń kómegine júginip, zaman talabyna sai ǵylymi-zertteý institýtyn quratyn múmkindigimiz bar. Bul baǵyttaǵy jumystardy akademiia ǵalymdary tolyqtai igerip ketetin múmkindigi bar.
– Áńgimeńizge rahmet!
Suhbattasqan Nurlan JUMAHAN.
