Jyl basynan beri Qazaqstanda esirtki qylmysyna qarsy qyzmet 35 myńnan astam bank kartasyn buǵattady, dep habarlaıdy Dalanews.kz.
Bul týraly Ortalyq komýnıkasıalar qyzmetinde ótken brıfıńte İİM Esirtki qylmysyna qarsy is-qımyl komıteti tóraǵasynyń orynbasary Qýanyshtyq Áljanov málimdedi.
"Jyl basynan beri 26 myń ınternet-resýrs anyqtalyp, buǵattaýǵa joldandy. Esirtki bıznesinde paıdalanylǵan 35 myńnan astam kart-shot buǵattaldy, olardyń esebinde 2,5 mlrd teńge kóleminde qarajat toqtatyldy. Bul baǵytta biz sıfrlyq platformalar men İT-kompanıalarmen ózara is-qımyldy jalǵastyryp kelemiz. Anonım abonentter anyqtalýda. 750 adam, sonyń ishinde 32 ákimshi ustaldy", – dedi ol.
İİM málimetinshe, jyl basynan beri esirtki aınalymy salasyndaǵy 16 uıymdasqan qylmystyq toptyń qyzmeti áshkerelengen.
«Olardyń úsheýi transulttyq sıpatta bolǵan. Barlyǵy 16 jetekshi men 60 belsendi qatysýshy ustaldy», – delingen habarlamada.
Sonymen qatar 170 esirtki jarnamasy men nasıhaty faktisi anyqtalǵan. Volonterlermen birlese 25 myńnan astam graffıtı jazbalar men esirtki saıttaryna siltemeler boıalyp joıylǵan.
