Baǵanashyldaǵy balalar úiindegi daýdan keiin qyzmetinen bosatylǵan Almaty oblysy Bilim basqarmasynyń burynǵy basshysy Saltanat Bespaeva jańa qyzmetke taǵaiyndaldy, dep habarlaidy Dalanews.kz.
Oblys ákimdiginiń baspasóz qyzmetiniń málimetinshe, Saltanat Bespaeva Almaty oblysynyń Tilderdi damytý basqarmasynyń basshysy qyzmetine taǵaiyndalǵan.
Eske salaiyq, buǵan deiin Saltanat Bespaevanyń jańa qyzmetke taǵaiyndalýy múmkin ekeni habarlanǵan edi. Bul týraly DALA INSIDE arnasy jazǵan.
“Taraptar Baǵanashyldaǵy balalar úiindegi aiqai-shý basylǵanyn kútken edi. Endi sol sát týyndap tur. Almaty oblysy Bilim basqarmasynyń burynǵy basshysy Saltanat Bespaevany jańa qyzmetke taǵaiyndaýǵa kedergi joq siiaqty”, – dep málimdegen bolatyn derekkóz.
Málimetke qaraǵanda, Saltanat Daýysbekqyzy basqarma basshysy qyzmetinen ketkenimen, ákimdik júiesinde qalǵan. Onyń ornyna buǵan deiin Eńbekshiqazaq, Ile aýdandary men Qonaev qalalyq bilim bólimderin basqarǵan Arailym Tóleýbekova kelgen edi. Sondai-aq tamyzdyń basynda Bespaevanyń Ile aýdandyq bilim bólimine jetekshi bolyp baratyny týraly da aqparat taraǵan.
Aita keteiik, 2025 jyldyń kókteminde Almaty qalasynyń biligi "Baǵanashyl" balalar úiiniń tárbielenýshilerin Qonaev qalasyna kóshirý týraly sheshim qabyldaǵandaryn málimdedi. Buǵan ǵimarattyń eskirýi túrtki degen sebepti alǵa tartqan. Balalarǵa jańa oryn aldyn-ala daiyndalyp qoiylǵany da aityldy. Alaida balalardyń aitýynsha, aidaladaǵy nysanda, tipti taza sý da bolmaǵan. Oqýshylardyń ózderi kóshýge qarsylyq tanytqan.
Soǵan qaramastan 21 shildede "Baǵanashyl" balalar úiiniń tárbielenýshilerin Almatydan Qonaevqa kóshirý bastaldy, onyń arty úlken daýmen tynǵany belgili. Jelide májbúrli kóshirý kezinde túsirilgen video jariialanǵan keiin prezident Qasym-Jomart Toqaev bul protsesti toqtatyp, balalar úiiniń ǵimaratyn jóndeýdi tapsyrdy. Qazir Prezident Ákimshiligi qyzmettik tergeý sharalaryn júrgizýde.
Daýly oqiǵadan keiin birden úsh sheneýnik qyzmetimen qosh aitysty.
Olardyń qatarynda Almaty oblysy bilim basqarmasynyń basshysy Saltanat Bespaeva, oblys ákiminiń orynbasary Bolat Kúrenbekov jáne ishki saiasat basqarmasynyń jetekshisi Erik Ábitov bar.
Buǵan qosa, Almaty oblysy ákiminiń birinshi orynbasaryna qatań sógis jariialandy.
