Almatynyń Qalalyq josparlaý jáne ýrbanıstıka basqarmasy "AsiaMax" JSHS qurylys kompanıasynyń lısenzıasyn toqtatty, dep habarlaıdy Dalanews.kz.
Bul kompanıa Ábish Kekilbaev kóshesinde káriz júıesi jelilerin qaıta jańartý jumystaryn júrgizgen.
"Lısenzıanyń kúshin joıýǵa jumys kestesi sozylýy ǵana emes, turǵyndardyń narazylyǵyn týǵyzǵan óreskel qateler de sebep boldy: jobalyq sheshimder aýytqyǵan; qurylys barysynda memlekettik normalar saqtalmaǵan", - dedi ákimdik ókilderi.
Jospardan tys tekseris nátıjesinde nusqaý berilip, kompanıa lısenzıasynan aıyryldy.
Eske salaıyq, buǵan deıin Almaty ákimi Darhan Satybaldy áleýmettik nysandardyń qurylysyna, jol ınfraqurylymy men qoǵamdyq keńistikterdi damytýǵa qatysyp júrgen merdiger uıymdardyń quryltaıshylarymen keńes ótkizip, qatań eskertý jasady.
