Alash ziialylary týraly iri jobalar túsirgen prodiýser Aisáýle Ábilda áleýmettik jelide Almaty politsiiasynyń áreketine kúiindi, - dep habarlaidy Dalanews.kz.
Tanymal prodiýser oqiǵanyń mán-jaiyn áleýmettik jelide túsindirdi. Onyń sózinshe, 5 qazanda Almaty qalasynda túsirilim jumystary ótken.
"Sahnanyń stsenariidegi ýaqyty - 2004 jyl. 3 kólikke sol jyldardaǵy nómirdi salyp, ál-Farabi-Dostyq kósheleriniń qiylysynda burylyp bara jatqan jerinen kólikterdi politsiia toqtatady. Kino túsirýge ruqsatymyzdy surap, biz Almaty qalalyq Politsiia departamentinen alǵan nazarǵa alyndy degen shablondy jaýaby bar hatymyzdy kórsetemiz. Almaty qalalyq mádeniet basqarmasynan alǵan ruqsatymyz da bar. Sonyń bárin qarap, bizdiń eshteńe búldire qoimaǵanymyzdy bilse de, qyraǵy politseiler túr jasap, aýyr qylmyskerlerdi áshkere qylǵandai qýana-qýana protokol toltyrdy. Sondaǵy ýájderi bul Ákimshilik quqyqbuzýshylyq týraly kodeksiniń 590-babynyń 4-pýnktine sáikes degen zańdy buzyp tur ekenbiz.
Alaida bul jalǵan nómirdi eshkim qasaqana taqpaǵanyn, 60 adam ystyq pen sýyqta kún-tún demei kino túsirip júrgenimizdi, ol úshin memlekettik organdardy eskertkenimizdi esepke de alǵan joq", - dep ashyndy ol.
Aisáýle Ábildanyń aitýynsha, osylaisha kólik aidap, kúnin kórip júrgen jigitterdi politsiia bir táýlikke qamaǵan.
"Ertesine bolǵan sotqa meni qatystyrmai, eshteńe túsindirýge múmkindik bermesten, sot hattamasyna bul jigitter kólikke jalǵan nómirdi qylmys jasaý úshin ádeii jabystyrǵandai toltyryp tastap, kóliktiń bárin 1 kúnge aiyp turaǵyna toǵytyp, júrgizýshilerdi 1 kúnge qamady. Sol jaǵdai úshin júrgizýshilerge biz ertesine 2 240 000 teńge syiaqy tólep berdik", - dedi prodiýser.
Dese de, onyń sózinshe, endi sol úsh kólik júrgizýshisiniń otbasy nápaqasyz qalyp otyr. Al júrgizýshiler 1 jyl kólik aidai almaityndyqtan 6 mln teńge suraǵan.
