Qyrǵyzstanda birneshe jyl boiy qyzdar men áielderge aýyr qylmys jasap kelgen kúdikti ustaldy. 41 jastaǵy Qumarbek Abdyrov 17 jastaǵy Aisulý Muhashevany qatygezdikpen óltirdi degen kúdikke ilingen. Tergeý barysynda ol keiingi 15 jyl ishinde jasaǵan basqa da qylmystaryn moiyndaǵan, dep habarlaidy Dalanews.kz 24.kg-ge silteme jasap.
15 qyrkúiekte ElTR telearnasy Qyrǵyzstan IIM ókilderi qatysqan arnaiy reportaj jariialady. Onda Abdyrovtyń qylmystyq isteri men olardyń mán-jaiy baiandalady.
Tergeý dereginshe, onyń alǵashqy qylmysy 2006 jyly "Kók-Jar" shaǵynaýdanynda bolǵan. Sol kezde 22 jastaǵy stýdent qyzdy temir zatpen uryp, telefonyn tartyp alyp, qashyp ketken. Kóp uzamai ustalǵanymen, ol jábirlenýshilerden keshirim surap, 5 myń som ótemaqy tólegen soń bosatylǵan.
2011 jylǵy 14 naýryzda Sokýlýk aýdanyndaǵy Kún-Týý aýylyna baratyn jol boiynan júkti áieldiń máiiti tabyldy. Keiin anyqtalǵandai, ol 1989 jyly týǵan A.J.J. esimdi Bishkek turǵyny bolyp shyqty. Áiel úiinen 12 aqpanda shyǵyp, oralmaǵan. Saraptama nátijesinde áieldiń zorlanyp, óltirilgeni, ári 8 ailyq júkti bolǵany belgili boldy.
2014 jyldyń naýryzynda taǵy bir áiel, 19 jastaǵy Kamila Dúishebaeva joǵalyp ketti. Birneshe kúnnen keiin onyń denesi Alamúdin aýdanyndaǵy jol jieginen tabyldy. Qyz óz oramalymen tunshyqtyrylǵan. Bul is qoǵamda úlken rezonans týdyrǵan edi. Tergeý kezinde onyń sońǵy sóilesken adamy — burynǵy bas prokýror Aida Salianovanyń týysy Qalybek Salianov ekeni anyqtalǵan. Keiin onyń sol kúni saýnada bolǵany anyqtalyp, beinejazbalar joiylǵan. Quqyq qorǵaý organdarynyń aitýynsha, dál osy derek sol kezde qylmyskerdi tabýǵa kedergi keltirgen. Endi tergeýshiler Kamilanyń ólimine Abdyrovtyń qatysy baryn dáleldep otyr.
Sol jyly, 13 naýryzda, Bishkektegi Razzakov kóshesinen taǵy bir qyzdyń máiiti tabylǵan. 22 jastaǵy M.S.N. esimdi qyz zorlanyp, keiin tunshyqtyryp óltirilgen. Onyń basyna paket kigizilip, qoly bailanǵan. Ol kezde de qylmysker tabylmaǵan, al qazir sol istiń de Qumarbek Abdyrovqa qatysy bar ekeni anyqtaldy.
2015 jyly ol taǵy bir qyzǵa shabýyl jasap, óltirmek bolǵan. Biraq jábirlenýshi tiri qalǵan.
"Ol meni aryqqa súirep aparyp, úlken taspen urmaq boldy. Basqa tigize almai, qolymdy jaralady. Keiin biraz qarap turdy da ketip qaldy. Men qozǵalýǵa qorqyp jattym, ol qaita orala ma dep qoryqtym. Sálden soń óz kúshimmen aryqtan shyqtym da, joldyń arǵy jaǵyndaǵy janarmai beketine júgirip bardym. Sol jerde adamdar kómektesip, aýrýhanaǵa jetkizdi", — deidi aman qalǵan jábirlenýshilerdiń biri.
Keiin ol militsiiaǵa aryz túsirgen. Sol kezde Abdyrov ustalyp, adam óltirýge oqtalý babymen aiyptalǵan. 2016 jyly aýdandyq sot ony 12 jylǵa sottaǵanymen, apelliatsiialyq sot merzimdi 7 jylǵa qysqartqan. Al 2018 jyly shartty túrde merziminen buryn bosap shyqqan.
Biyl 27 qyrkúiekte Ystyqkól oblysynda 2008 jylǵy qyz joǵaldy degen habar túsken. 17 jastaǵy qyz túski ýaqytta úiden shyǵyp, qurbysyna baramyn dep ketken, biraq qaityp oralmaǵan. Keiin onyń zorlanyp, qaza tapqany belgili boldy.
Kamera jazbalary boiynsha, qyz Barskoon aýylyndaǵy janarmai beketinde Abdyrov mingen Honda Stream kóligine otyrǵany anyqtalǵan. Osy derek arqyly kúdikti ustalǵan.
Tergeý barysynda onyń buryn jasaǵan qylmystary birtindep áshkere bolyp, 2006 jyldan beri birneshe adam óltirgeni anyqtaldy.
Kúdikti tergeý kezinde taǵy bir qyzdy zorlaǵanyn, biraq óltirmegenin moiyndaǵan. Alaida sol oqiǵaǵa qatysty resmi is tirkelmegen, bálkim jábirlenýshi aryz jazbaǵan bolýy múmkin. Qazir tergeýshiler naqty qansha áiel onyń qurbany bolǵanyn anyqtap jatyr.
Abdyrov tergeý kezinde anasymen jáne áielimen kezdesýdi suraǵan.
"Bolǵannyń bárin olar óz aýzymnan estigenin qalaimyn", — degen ol.
Kezdesý kezinde kúdikti jasaǵan barlyq qylmysyn týystaryna moiyndaǵan.
