Aqtóbe qalasynyń mansap ortalyǵy filialynyń uiymdastyrýymen bos jumys oryndarynyń jármeńkesi ótti, dep habarlaidy Dalanews.kz.
Jármeńkege túrli sala boiynsha 15 mekeme men kásiporyn suranysqa ie mamandyqtar boiynsha 100-den astam bos jumys ornyn usyndy. Jumys berýshilerdiń arasynda «Dina market» JShS, «Áigerim» klinikasy, «Aqjan» JK, «Jbi-25» JShS, «Aziia munai servis» JShS, «Meiirim» jastardy áleýmettik beiimdeý ortalyǵy, áleýmettik qyzmet kórsetý ortalyqtary, balabaqshalar, t.b. boldy. Negizinen, túrli maqsattaǵy jumysshy, júrgizýshi, aspaz, eden jýýshy, tárbieshi, pedagog-uiymdastyrýshy, medbike, feldsher, esepshi, t.b. mamandar jumysqa shaqyryldy.
Jármeńkege jumys izdep kelgender qatary da kóp boldy, olardyń arasynda orta jastaǵylarbasymyraq sekildi kórindi, zeinet jasyna jaqyndaǵan jandar da bar. Ózine qajetti málimetterdimekemeniń qyzmetkerinen anyqtap alǵan soń, jumysqa ornalasýǵa qujattaryn tapsyrý úshin asyǵys shyǵa jónelgender de boldy. Er-azamattar jaǵy túrli maqsattaǵy jumysshy kerek degen aqparattyń tusyna kóbirek aialdasa, qyz-kelinshekterdiń birqatary jumys berýshilermen eden jýýshy, ydys jýýshy bolyp ornalasý jaiyn sóilesip jatty. Bul jármeńkege kelgender arasynda naqty bir mamandyq almaǵan jandardyń az emes ekenin kórsetti.
— Jyl basynan beri osyndai 10 jármeńke uiymdastyrylyp, nátijesinde 237 adamdy jumysqa ornalastyrýdyń sáti tústi. Sonymen qatar eńbek birjasy portalyna da bos jumys orny týraly málimetter jariialanady. Búginde portalda bizdiń oblystan tirkelgen bos jumys oryndarynyń sany — 1556, — dedi mansap ortalyǵy filialynyń mamany Valentina Otarbaeva.
Uiymdastyrýshylar jármeńkege kelip, biraq jumysqa ornalasa almaǵan jandar arasynda saýalnama júrgizdi. Alynǵan málimetterdiń bolashaqta olardy jumysqa ornalastyrýǵa septigi tiiýi múmkin.
