Almaty qalasynyń ákimi Ahmetjan ESIMOV myrzanyń nazaryna!
Kúni keshe ǵana Uly Jeńistiń 70 jyldyǵyn dúrkiretip ótkizdik. Qan maidandan ot keshken ardagerlerge memleket tarapynan qurmet kórsetildi. Ákim-qaralar ózderine qarasty aimaqtardaǵy ardagerlerdiń bárin baspanamen qamtyp, qurmet kórsetkenin aityp joǵaryǵa esep bergenine kýá boldyq. Qazir jyl ótken saiyn ardagerlerdiń qatary sirep barady. Endi on jylda tolarsaqtan qan keshken batyrlardy qolymyzǵa sham alyp izdesek te tappai qalýymyz múmkin. Sondyqtan kózi tirisinde olarǵa qurmet kórsetýimiz oryndy.
Almatyda baspanaǵa qol jetkize almaǵan ardager bar desek, senbeýińiz múmkin. Sheneýnikter on jerden ardagerlerdiń jaǵdaiyn jasadyq desek te, Almatyda baspana zaryn tartyp júrgen bir qart jaýynger bar eken. Taiaýda redaktsiiamyzǵa toqsannyń tórteýine kelgen qart jaýynger Baiahmet Hýsainovtyń qyzy Gúlmira Hýsainova ákesine qatysty muń-muqtajyn aityp, basyndaǵy jaǵdaidy joǵaryǵa jetkizýge ótindi.
[caption id="attachment_10617" align="alignright" width="252"]
– Ákemiz Baiahmet Hýsainov Uly Otan soǵysyna bastan-aiaq qatysyp, Otan aldyndaǵy boryshyn abyroimen atqarǵan ardagerlerdiń biri. Ol 1941 jyly soǵysqa attanyp, №713 Leningrad atqyshtar polkynyń sapynda nemis basqynshylaryna qarsy jan aiamai kúresken. 1943 jyly ákemiz aýyr jaralanyp jarty jyldai áskeri gospitalda jatyp emdeledi. Jaraqaty jazylǵannan keiin qaitadan maidan dalasyna attanyp, soǵys aiaqtalǵansha surapyl soǵystyń bel ortasynda boldy. Meniń bul sózimdi ákemizge bergen Uly Otan soǵysynyń ekinshi dárejeli medali jáne Berlindi alý úshin berilgen medali aiqyn dálel bola alady. Budan basqa ár jyldary Úkimet tarapynan marapattar alyp turdy. Soǵys aiaqtalǵannan keiin ákemiz týǵan jeri Qostanai oblysy, Sarykól aýdany, Qaraoba aýylyna oralyp, túrli jumystardy atqaryp, óziniń soǵysqa qatysqanyn buldamai ómir súrdi. Shaý tartyp, eńbekke jaramai qalǵan sátinde Qostanai qalasynda turatyn sińlim Gúláiim Hýsainovanyń qolynda turdy. Keiinnen sińlim ómirden ótkennen keiin ákemdi óz qolyma aldym. Sodan beri ákem meniń qolymda turyp keledi. Ol kisi soǵys ardageri retinde memleketten eshqandai kómek alǵan adam emes. Ózge ardagerler úi alyp, kólik minip júrgende ákemiz dúniege qyzyqpai júre berdi. Qazir qartaiǵan shaǵynda Almaty qalasy, Medeý aýdanyndaǵy meniń shaǵyn úiimde turyp jatyr. Ákemiz qartaiyp, óz betinshe júrip-turýy qiyndap ketti. Soǵystyń bel ortasynda bolyp, túrli dene jaraqatyn alǵan ákemiz memleketten baspana ala almai keledi. Osydan jeti jyl buryn Almaty qalasy Turǵyn úi departamentine ákemiz úi surap barǵanynda basshylar «Almaty qalasynda keminde bes jyl turmaǵan ardagerge baspana bere almaimyz» dep shyǵaryp salǵan edi. Keiinnen bes jyl bolǵannan keiin de aryz jazyp, ótinish tastadyq. Biraq ótinishimizge qatysty mardymdy jaýap ala almadyq. Elbasy Nursultan Nazarbaevtyń atyna hat jazǵanymyzda Prezident Ákimshiliginiń qyzmetkerleri Almaty qalasy ákimdigi ótinishimizdi qarastyratynyn aityp hat jazǵan edi. Sol kezde úmitimiz oianǵandai boldy. Sol kezde Almaty qalasynyń ákimi bolǵan Imanǵali Tasmaǵambetov myrza Medeý aýdany ákimdigine bizdiń ótinishimizdi qarastyrýdy tapsyrǵan edi. Biraq budan eshqandai nátije bolǵan joq. Uly Jeńistiń 75 jyldyq qarsańynda Almaty qalasy Turǵyn úi departamenti basshysyna hat jazǵanymyzda departament basshysynyń orynbasary T.Izmaǵanbetov myrza Almaty qalasy boiynsha 19369 adam turǵyn úi kezeginde turǵanyn aita kele, ákemizdi áleýmettik turǵydan az qamtylǵan toptyń qataryna jatqyzyp, 8498-shi bolyp kezekke qoiǵandaryn habarlap, hat joldapty. Al qala basshysy Ahmetjan Esimov bolsa Jeńis merekesi qarsańynda Memleket basshysyna Almatydaǵy soǵys ardagerleriniń bári baspanamen qamtylǵanyn aitqanyn estidik. Jeńistiń 75 jyldyq merekesi jyl aiaǵyna deiin toilanatyny belgili. Osy rette qala basshysy Ahmetjan Smaǵululyna ákemizdiń máselesin oń baǵytta sheship berýi úshin «Qala men Dala» gazeti arqyly ótinish aitamyn. Búginde ákemizdiń densaýlyǵy kúnnen-kúnge nasharlap bara jatyr. Ómiriniń sońynda jeke úiinde kútim jasap, táýir jaǵdaida ómir súrgenin qalaidy, – dep qart maidangerdiń qyzy Gúlmira Hýsainova muńyn shaqty.
Ardager turyp jatqan shaǵyn ǵana úige barǵanymyzda ózdigimen júrip-turyp, sóileýden qalǵan aqsaqal bizge ymdap biraz dúnie aitqysy keldi. Biraq tutyǵyp, oiyn jetkize alǵan joq. Maidanger qarttyń soǵysqa qatysqany úshin alǵan medaldarymen ózge qujattarymen tanysyp, ardagerdiń hal-ahýaly óte qiyn ekenine kóz jete tústi. Osy rette Almaty qalasynyń ákimi Ahmetjan Esimov myrza Baiahmet Hýsainovqa qol ushyn berip, máselesin sheship beretinine senim bildiremiz.
Nurlan JUMAHAN.
