Qaraǵandy oblysynda politsiia beketindegi qyzdyń óliminen keiin birqatar basshy qyzmetterinen bosatyldy, dep habarlaidy Dalanews.kz.
Patriot telegram-arnasynyń málimetinshe, Qaraǵandy oblysy politsiia departamentiniń tártiptik komissiiasy politsiianyń tirek pýnktinde bolǵan rezonanstyq oqiǵaǵa bailanysty sheshim qabyldady. Qyzmettik tártipti baqylaýdyń jetkiliksizdigi úshin birneshe basshy qyzmetinen bosatylǵan.
Atap aitqanda:
- Mihailov politsiia bóliminiń bastyǵy Asqar Sádýaqasov;
- bólim bastyǵynyń qyzmet jónindegi orynbasary;
- ýchaskelik inspektorlardyń jumysyn qadaǵalaǵan bólim bastyǵynyń orynbasary qyzmetterinen bosatyldy.
Sonymen qatar Qaraǵandy qalalyq politsiia basqarmasyndaǵy birneshe jetekshige baqylaýdyń álsizdigi úshin sógis jariialanǵan.
Bul sheshim 30 qyrkúiekke qaraǵan túni bolǵan qaiǵyly oqiǵadan keiin qabyldanǵan. Aldyn ala derekterge sáikes, ýchaskelik inspektor 23 jastaǵy Almira esimdi qyzdy túngi kezekshilik kezinde politsiia beketine alyp kelgen. Buǵan deiin de ol qyzdy jumys ýaqyty kezinde alyp kelgeni belgili bolǵan.
Tańerteń aǵa ýchaskelik inspektor qyzdy divanda óli kúiinde, al 36 jastaǵy maior Daýren Dosovty jumys ústeliniń janynda es-tússiz kúide tapqan. Er adam aýrýhanaǵa jetkizilip, dárigerler onyń jaǵdaiyn turaqtandyrǵan.
Aldyn ala boljam boiynsha, olar belgisiz zattan ýlanǵan bolýy múmkin. Qazir tergeý jáne qyzmettik tekseris jalǵasyp jatyr.
