Sońǵy 10 aida elimizde ónerkásiptik óndiris kólemi 7,5 paiyzǵa ósken
El damýynyń áleýmettik ekonomikalyq kórsetkishin eseptep shyǵarǵan ministrliktiń málimetinshe, ónerkásiptiń ósimine kómir, lignit, munai, tabiǵi gaz, metall kenderi, munai óńdeý jáne metallýrgiia ónimderin óndirý aitarlyqtai áser etken.
Sondai-aq óńdeýshi ónerkásiptiń 5,2 paiyzǵa ulǵaiýy esebinen otandyq dári-dármek óndirisi, toqyma buiymdary, qaǵaz ónimderi, azyq-túlik jáne sýsyn óndirý salasynda qarqyndy ósim baiqalǵan. Budan syrt jihaz óndirisi, metallýrgiia ónerkásibi jáne mashina jasaý qaryshtap damyǵan.
Al respýblika boiynsha, ónerkásiptiń tamyryna qan júgirtken óńirlerdiń kósh basynda Atyraý oblysy tur. Budan keiin Batys Qazaqstan oblysy men Astana qalasy joǵarǵy kórsetkishti jalǵastyrady.
Budan basqa aýylsharýashylyǵynyń jalpy ónim kólemi de birshama artqan. Ásirese Pavlodar, Mańǵystaý jáne Qyzylorda oblystary mal sharýashylyǵy ónimderin óndirýge eleýli úles qosqan.
Aita ketelik, budan buryn Investitsiialar jáne damý ministri Jeńis Qasymbek
Qazaqstanda óndiriletin ónimder álemniń 110 eline eksporttalatynyn aitqan bolatyn. «Búgingi tańda óńdeýshi ónerkásiptiń qazaqstandyq ónimderi 110 elge eksporttalyp jatyr. Keibir taýar pozitsiiasy boiynsha ótkizýdiń tyń naryǵy ashylǵan. Alǵashqy alty aida «Aziia-avto» kompaniiasy óndiretin avtokóliktiń 672-i Qytai men BAÁ-ge jóneltildi. Qytailyq áriptestermen birlese qurastyrylǵan Qostanaidaǵy avtokólikter Tájikstanǵa eksporttala bastady. Aýylsharýashylyǵy tehnikasy tuńǵysh ret Resei naryǵyna jol tartty. Lokomotivter eksporty Tájikstan men Ázerbaijan eline de jolǵa qoiylyp, 40-qa jýyq lokomotivti ótkizdik. Bul tizimdi odan ary da jalǵastyra berýge bolady», – degen edi vedomstvo basshysy.
Jeńis Qasymbek sonymen birge indýstriialyq damý baǵdarlamasynyń arqasynda jalpy ekonomika men ónerkásiptiń qurylymy ózgerip kele jatqanyn da tilge tiek etken.
«Óńdeýshi sektordyń el ekonomikasynyń damýyndaǵy úlesi 2010 jyly 11,3 paiyzǵa, 2017 jyldyń 7 aiynyń kórsetkishi boiynsha 12 paiyzǵa jetti. Bul degenińiz, indýstrialandyrý baǵdarlamasy, shynynda da, Qazaqstannyń ekonomikasyna áserin tigizetinin kórsetip otyr. Óńdeýshi ónerkásiptiń úlesi 2010 jyly 30,5 paiyzǵa, 2017 jylydń 7-8 aiy boiynsha 41,1 paiyzǵa ósti», – degen edi ministr.
Aitpaqshy, Qazaqstan ekonomikanyń – shikizattyq emes sektoryn damytý jumystaryn barysyn tikelei «Nur Otan» partiia qatań baqylaýda. Elimizdiń jetekshi partiiasy óziniń sailaýaldy baǵdarlamasynda naqty kórsetilgen bazalyq salalar men innovatsiiany damytý mindetterin júzege asyrý baǵytyndaǵy jumystardy júrgizýde. Buǵan sai 2021 jyly elimizde túrli-tústi metallýrgiia eksporty 20 paiyzǵa ósedi dep kútilip otyr. Sondai-aq munai-gaz salasynda básekege qabilettilik artyp, energiiamen qamtamasyz etetin kásiporyndardyń aiasy keńeimek.
Partiia basshysy Muhtar Qul-Muhammedtiń aitýynsha, Elbasynyń tapsyrmasymen indýstriialyq-innovatsiialyq damý baǵdarlamasy aiasynda osy kúnge deiin 1000-nan astam jańa kásiporyn salynǵan. Ony júzege asyrýǵa 5 trillion teńgeden astam qarajat bólingen.
