Atyraý óńirinde shikizattyq emes sektor damýda
Ázirgi kúni oblystaǵy birqatar óndiris oryndary qazirdiń ózinde ónim sapasyn AQSh pen eýropalyq standarttarǵa jetkizip úlgergen. Buǵan Atyraý oblysyna arnaiy is-saparmen barǵan «Nur Otan» partiiasynyń birinshi orynbasary Muhtar Qul-Muhammed kóz jetkizip qaitty.
Memlekettik baǵdarlama aiasynda júzege asyrylyp jatqan iri jobalardyń jumys barysymen tanysqan Qul-Muhammed bul tarapta óńirde nátijeli isterdiń atqarylyp jatqanyn tilge tiek etti.
Búginde aimaqtaǵy sońǵy jyldardyń bederinde ashylǵan kásiporyndardyń kópshiligi tikelei memlekettiń qarjylai qoldaýynyń arqasynda turaqty jumys istep, sapaly ónim óndirýge múmkindik alǵan. Kópshiligi zamanaýi qondyrǵylarmen jaraqtandyrylǵan. Mundaǵy mamandar jańa tehnologiianyń qyr-syrymen tolyqtai tanys.
Aitalyq, Atyraýdaǵy zaýytta shyǵarylyp jatqan polietilen jáne metall-plastik qubyrlar men armatýra ónimderiniń qoldaný merzimi 50 jylǵa jetedi eken. Al ónimine jarty ǵasyrǵa kepildik beretin kompaniialar kemde-kem eken.
Óńirdegi kásiporyndardyń óndiristik qýatymen tanysqan «Nur Otan» partiiasynyń birinshi orynbasary olardyń muń-muqtajyna da qulaq asty.
Muhtar Qul-Muhammed atap ótkenindei, budan bylai elimizdiń bas partiiasy otandyq ónim óndirýshilerdi ádeii tómendetý sekildi ádiletsiz básekeden qorǵap, máseleni túbegeili sheshý úshin zańdy qujat qabyldaý jóninde usynys ázirleitin bolady.
– Atyraý – munaily ólke. Degenmen, Memleket basshysy elimiz osy munaiǵa táýeldi bolyp qalmaý úshin ár oblys, ásirese munaily oblystar óziniń ekonomikasyn ártaraptandyrý, iaǵni diversifikatsiialaý kerektigin únemi aityp kele jatyr. Ol úshin bizge osyndai kásiporyndar kóptep kerek. Atyraýdaǵy zaýyttardyń kópshiligi Qazaqstannyń ǵana emes, Táýelsiz memleketter dostastyǵynyń ǵana emes, Batys Eýropanyń eń biik talaptaryna jaýap beretin óte qajet qural-jabdyqtar shyǵarýda. Elbasymyz aitatyn básekege qabilettilik osy, – dedi bul rette Qul-Muhammed.
Atyraýdaǵy Úkimettiń qoldaýymen ashylǵan taǵy bir kásiporyn – optikalyq kabel shyǵarý zaýyty. Qazirgi tańda bul zaýyt ishki naryqtaǵy suranystyń 40 paiyzyn qamtamasyz etip otyr.
Kásiporynnyń taǵy bir ereksheligi jergilikti kásibi-tehnikalyq bilim ordalarymen birigip, dýaldyq oqytý jobasyn da júzege asyryp jatyr.
Kásiporyn jumysshylarynyń jartysynan kóbi – jergilikti kolledjderdiń túlekteri eken.
Aitalyq, Darhan Matrekov, Atyraý kabel zaýytynyń operatory qyzmetine biylǵy jyldyń mamyrynda ornalasqan. Oqýyn da qatar alyp júr.
«Meniń jumysym osy zaýytqa unaǵan soń, meni jumysqa alyp qaldy. Men osy jumysqa Elbasymyzdyń dýaldyq baǵdarlamasy arqyly kirdim» deidi ol.
