Batys Qazaqstan oblysynda biyl Indýstriialandyrý kartasy aiasynda 7,7 mlrd teńgege 7 investitsiialyq joba júzege asyrylýda.
Oblys ákimi Altai Kólginovtiń aitýynsha, bul 440 jumys ornyn ashýǵa múmkindik beredi. Sonyń ishinde 926 mln teńgege qosymsha úsh joba iske qosylmaqshy. Atap aitqanda, «Steklo Servis» JShS 350 mln teńgege aldaǵy jeltoqsan aiynda tereze jáne esik shyǵarý óndirisin bastamaqshy. Sol sekildi «Asar» JShS jyl sońyna deiin 376 mln teńgege aiaqkiim tigý fabrikasyn ashpaqshy. Al «Evraziia Trend» JShS 200 mln teńgege esikter shyǵarýdy jolǵa qoimaq.
Jalpy, ekinshi besjyldyq (2015-2019) barysynda óńirde 82,4 mlrd teńgege 22 investitsiialyq joba (1196 jumys orny) júzege asyrylýda. 2018-2019 jyldary 1,6 mlrd teńgege úsh joba iske qosylmaqshy.
Biylǵy on aida ónerkásip kásiporyndary 1,5 trln teńge ónim óndirdi, bul ótken jylǵydan 7,1 paiyzǵa kóp. Al eksport kólemi toǵyz aida 3,4 mlrd AQSh dollaryna jetip, 41 paiyzǵa artty. Aita ketelik, sońǵy jyldary Batys óńiriniń óndiriske qatysty kórsetkishteri jaqsaryp keledi. Aitalyq, aimaqta shaǵyn jáne orta biznestiń ekonomikadaǵy úlesi 42 paiyzǵa jetken. Bul elimiz boiynsha Astanadan keiingi ekinshi kórsetkish eken.
Mundaǵy et zaýytynyń ónimderi ishki naryqtan bólek Resei men Iranǵa eksporttalýda. Qazirdiń ózinde 60 tonna et Iranǵa jóneltilgen. Suranys kún sanap ósýde.
Al Oraldaǵy «Stekloservis» áinek zaýyty shyǵaratyn termotózimdi shynylar tek Batys óńirge emes, kórshiles Resei oblystaryna jiberilip jatyr. Qýat jáne jylý únemdeýshi áinekter Eýropadan ákelingen aldyńǵy qatarly qondyrǵylarda óńdeledi.
Al bir jyldary bul zaýyt tek ǵana áinek kesýmen ainalysatyn. Indýstriialandyrý baǵdarlamasy qolǵa alynǵaly beri óndiris orny áinektiń birneshe túrin, ásirese teń jarymyn ónimderiniń eksportqa shyǵaratyn deńgeige deiin jetken.
