Qazaqstanda memlekettik qarjyny tsifrlandyrý biýdjetke qosymsha 410 mlrd teńge túsim qamtamasyz etip, 2027–2029 jyldarǵa arnalǵan biýdjet qalyptastyrý kezinde 1,5 trln teńge kólemindegi tiimsiz shyǵyndardyń aldyn alýǵa múmkindik berdi, dep habarlaidy dalanews.kz.
Bul týraly Qarjy ministrliginiń basshylyǵy Úkimet otyrysynda baiandady.
Qarjy ministrligi memlekettik qarjyny biryńǵai tsifrlyq kontýrǵa kóshirý jumysyn júrgizip jatyr. Negizgi maqsat – jekelegen protsesterdi avtomattandyrýmen shektelmei, biýdjet qarajatyn josparlaýdan bastap naqty paidalanýǵa deiin baqylaýǵa múmkindik beretin biryńǵai júie qalyptastyrý.
Digital Qazaqstan strategiiasy aiasynda bul tásildi 2029 jylǵa deiin memleket, biznes jáne azamattarǵa qatysty negizgi baǵyttardyń barlyǵyna engizý josparlanǵan.
Salyqtyq ákimshilendirý salasynda tsifrlandyrý aýqymy da aitarlyqtai ósken. Qazir júie arqyly 3,9 mlrd operatsiia júrgizilip, 1,8 mlrd elektrondyq shot-faktýra rásimdelgen. Al táýekelderdi basqarý júiesi 17,7 mlrd qujatty óńdegen.
Smart Data Finance júiesi arqyly 99 myń habarlama jiberilip, 2,9 mln tranzittik deklaratsiia shyǵarylǵan.
Ministrliktiń málimetinshe, tsifrlandyrýdyń naqty qarjylyq nátijesi de bar. Onyń esebinen biýdjetke qosymsha 410 mlrd teńge túsim qamtamasyz etilgen.
Ekonomikalyq belsendilikti kóleńkeden shyǵarý baǵytynda da tsifrlyq quraldar qoldanylyp jatyr. 2026 jyldan bastap ózin-ózi jumyspen qamtyǵan azamattarǵa arnalǵan arnaiy salyq rejimi engizildi. Bul rette áleýmettik tólemderdi tsifrlyq platforma salyq agenti retinde 4 paiyz mólsherinde ustaidy.
Bastapqyda «Iandeks» platformasynan bastalǵan júiege qazir 38 platforma qosylǵan. Olardyń qatarynda inDrive, Wolt jáne Glovo bar.
Nátijesinde ózin-ózi jumyspen qamtyǵandardyń sany 14,5 myńnan 805 myń adamǵa deiin ósken. Áleýmettik tólemder kólemi 1,4 mlrd teńgeden 16,1 mlrd teńgege deiin artqan. Sonymen qatar 600 myńnan astam buryn tirkelmegen azamat resmi ekonomikalyq ainalymǵa tartylǵan.
Memlekettik shyǵyndardy tsifrlandyrý da negizgi baǵyttardyń biri bolyp otyr. Qazir biýdjet qarajatynyń qozǵalysy biýdjetti josparlaýdan jáne memlekettik satyp alýlardan bastap qazynashylyq atqarý men onlain-monitoringke deiin biryńǵai tsifrlyq kontýrda baqylanady.
Tek biýdjet josparlaý kezeńinde fiskaldyq derekterdi paidalaný arqyly jylyna 200 mlrd teńgege deiin únemdeýge múmkindik bar.
Al 2027–2029 jyldarǵa arnalǵan biýdjet qalyptastyrý kezinde 1,5 trln teńge kólemindegi shyǵynnyń aldyn alǵan. Osylaisha tsifrlyq júie tiimsiz shyǵyndardy keiin anyqtap qana qoimai, olardyń bastapqyda paida bolýyna jol bermeýge múmkindik beredi.
Memlekettik qoldaý sharalary da tsifrlyq baqylaýǵa alynǵan. Biryńǵai júiede jyl saiyn 1 trln teńgeden astam qarajatty qamtityn 150 memlekettik qoldaý sharasy baqylanady.
Salyqtyq ákimshilendirýde «Salyq servis retinde» qaǵidatyna kóshý kózdelip otyr. 2026 jyldyń qańtarynan bastap QQS deklaratsiiasyndaǵy 13 jol avtomatty túrde toltyrylady, memlekettik qyzmetshilerdiń deklaratsiialary aldyn ala jasalady, al múlik salyǵy avtomatty túrde esepteledi.
«Kontragentter» servisi kásipkerge mámile jasamas buryn seriktesin tekserýge múmkindik beredi. Sonymen qatar shaǵyn jáne orta bizneske arnalǵan jeńildetilgen eseptilik nysandary men jalaqydan túsetin salyqtardy avtomattandyrý tetikteri engizilip jatyr.
Kelesi kezeńde jasandy intellektini salyqtyq baqylaýǵa keńinen engizý josparlanǵan. Qazirdiń ózinde II kameraldyq baqylaýdan bólek 672 qosymsha táýekeldi anyqtaǵan.
Ministrliktiń aitýynsha, maqsat tekserýler sanyn kóbeitý emes, baqylaýdy naqty ári nysanaly etý. Anyqtalǵan táýekelderdiń bir bóligi eGov Business pen jeke kásipkerdiń kabineti arqyly kórsetilmek. Bul bizneske yqtimal máseleni tekserý bastalǵanǵa deiin anyqtap, zań buzýshylyqty aldyn ala túzetýge múmkindik beredi.
2029 jylǵa qarai Qarjy ministrligi kóleńkeli ekonomikanyń deńgeiin 13,8 paiyzǵa deiin tómendetýdi, shaǵyn jáne orta biznestiń salyqtyq mindettemeleriniń keminde 80 paiyzyn II arqyly aldyn ala toltyrýdy jáne adal salyq tóleýshilerge júrgiziletin tekserýler sanyn 50 paiyzǵa qysqartýdy josparlap otyr.
