Birikken Arab Ámirlikteri izdeýde júrgen úsh adamdy Qazaqstanǵa ustap berdi, dep habarlaidy dalanews.kz.
Buǵan deiin habarlanǵandai, Qazaqstan Respýblikasy Bas Prokýrorynyń orynbasary Ashat Jumaǵali bastaǵan Bas prokýratýra delegatsiiasy Birikken Arab Ámirlikterinde ótken Qylmystyń aldyn alý men qylmystyq sot tóreligi jónindegi BUU-nyń 15-shi Kongresiniń jumysyna qatysty.
Sapar barysynda BAÁ Ádilet ministri jáne Bas prokýrorymen kezdesýler ótkizilip, qylmysqa qarsy kúres pen izdeýde júrgen adamdardy ekstraditsiialaý salasyndaǵy ózara is-qimyldy nyǵaitý máseleleri talqylandy.
Qol jetkizilgen atalǵan ýaǵdalastyqty iske asyrý sheńberinde Bas prokýratýra, Ulttyq qaýipsizdik komitetiniń Sybailas jemqorlyqqa qarsy qyzmeti men Ishki ister ministrliginiń Interpol Ulttyq Ortalyq Biýrosymen birlesip, Qazaqstannyń Birikken Arab Ámirlikterindegi Elshiliginiń qoldaýymen qylmystyq jaýaptylyqqa tartý úshin atalǵan elden Qazaqstannyń úsh azamatyn ekstraditsiialady.
Olardyń bireýi 2019–2020 jyldary sybailasymen birge Astanada halyqaralyq ortalyq salýǵa arnalǵan jer ýchaskesin alýǵa járdemdesýge ýáde berip, aldaý jolymen jábirlenýshiniń jalpy somasy 368 myń AQSh dollary qarajatyn iemdengen.
Taǵy bir figýrant densaýlyqqa qasaqana aýyr ziian keltirý, tonaý menbuzaqylyq jasaǵany úshin izdeýde bolǵan. Ol 2021 jyly Almaty qalasynda adamdar toby bolyp jábirlenýshige shabýyl jasap, onyń densaýlyǵyna aýyr ziian keltirgen jáne jalpy somasy 100 myń teńgeden asatyn jeke múlkin ashyq túrde iemdengen.
Úshinshi kúdikti osy jylǵy jazda Astana qalasynda Qytai azamatynyń 24 200 AQSh dollaryn urlady degen kúdikke ilingen, bul asa iri mólsherge jatady. Atalǵan tulǵalar qylmys jasaǵannan keiin qylmystyq qýdalaý organdarynan jasyrynǵan, osyǵan bailanysty halyqaralyq izdeýge jariialanǵan.
Keiinnen olardyń Birikken Arab Ámirlikteriniń aýmaǵynda júrgeni anyqtalyp, Qazaqstan Respýblikasy Bas prokýratýrasynyń suraý salýy boiynsha elge ekstraditsiialandy.
Qazirgi ýaqytta barlyq kúdiktiler tergeý izoliatoryna qamaldy, sotqa deiingi tergep-tekserý qaita bastaldy.
