Qazaqta «kóresini kórmei kórge kirmeisiń» dep aýyrlaý aitylǵan sóz bolýshy edi. Teginde osy ras sóz eken. Jaqynda osyǵan taǵy bir márte kózim jetti.
Oqiǵany álqissasynan taratyp aitaiyn. Ótken jyldyń shilde aiynda buqaralyq aqparat quraldarynda Qyzylorda oblysy, Syrdariia aýdany, Besaryq aýyly ákiminiń para alyp ustalǵany jaiynda habar tarady. Oqiǵa keiipkeri Qazbek Smaǵulovpen aýyl ákimi bolmai turyp mektep direktory qyzmetinde júrgende «Máńgilik bilim ordasy» degen atpen mektep ómiri týraly kitabyn shyǵarý barysynda tanys bolǵan edim. Oqiǵa oryn alǵannan keiin Qazbek Smaǵulov tórtinshi bilik ókili retinde maǵan habarlasyp «aǵa, men naqaqtan kúiip bara jatyrmyn, istiń aq-qarasyn ashyp, ádiletsizdiktiń oryn almaýy úshin aralasyńyzshy» dep ótinishin aitty. Bes jyl mektep direktory qyzmetin jaqsy atqarǵanyn, aýyl ákimdigine de kóptiń ótinish-usynysy arqyly kelgenin biletinmin. Ózi bir aiaǵy joq, úshinshi toptyń múgedegi, tórt ul, bir qyz ben kári anasyna qarap otyrǵan azamattyń taǵdyry shynyn aitsam meni bei-jai qaldyra almady. Onyń ústine jumysyna kiriskenine eki-úsh aidyń ǵana júzi bolǵan. Qyzmetine kiriser aldyna ǵana júregine ota jasatqan eken. Sonda osy birer aidyń ishinde ózim biletin atpal azamat «sybailasyp neni búldire qoidy eken» degen saýal da meni mazalady. Sonymen istiń basy-qasynda bolyp aralasýyma týra keldi. Is qalai órbidi, Qyzylordada ózim kýá bolǵan jailardy baian eteiin.
«Jaz edi dep eń, qys boldy, bul bir bitpes is boldy» degendei, jazda bastalǵan is saǵyzdai sozylyp, qarashanyń sońynda qara núktesi qoiyldy. Qara núkte degennen-aq onyń kimderdiń paidasyna sheshilgenin ańǵaryp otyrǵan bolarsyzdar.
[caption id="attachment_23778" align="alignright" width="276"]
Qazbek Smaǵulov[/caption]
Sál sheginis jasap, oqiǵaǵa oralaiyq. Jaz bastalǵaly Qyzylorda qalasynyń turǵyny Z. Mýminova jeke turǵyn úi salý úshin jer telimin surap aýyl ákimdigine birneshe márte keledi. Jer berý quqyǵy aýdandyq jer qatynastary bólimine qaraityndyqtan, aýyl ákimi ony birneshe márte keri qaitarady. Mýminovaǵa zańgerge baryp aryz jazyp, tirkelýi kerektigin aitady. ( Bul sát beinekóriniste de bar) Keiin belgili bolǵandai, tórt túliktiń túrin ázer ajyratatyn qala turǵyny Z. Mýminovanyń aýylǵa kelip úi soǵyp, mal sharýashylyǵymen ainalysatyndai esh muhtajdyǵy bolmaǵan. Onyń ústine Z. Mýminova osy ýaqyt ishinde kórshiles ornalasqan «Qoǵalykól», «Amangeldi» aýyldaryna da baryp jer telimin suraǵany anyqtaldy. Osy jerden-aq, azamatshanyń áldeqandai bir tapsyrmamen júrgeni baiqalyp qalady. Demek, bastapqy maqsat ta jer alyp, sharýashylyqty dóńgeletý bolmaǵany anyq. Mundai oqiǵalardyń ókinishke qarai qoǵamda jii oryn alyp jatqany belgili. Sol sebepti oqyrmanǵa istiń túp-tuqiianyna deiin táptishtep jatpai, naqty mán-jaiǵa oralaiyn.
Aýyl ákimi Qazbek Smaǵulov shilde aiynyń 20-y kúni Qyzylorda qalasynda júrgende Z. Mýminova oǵan qońyraý shalyp kezdeskisi keletinin aitady. Ekeýi ýádelesken ýaqytta qala kósheleriniń birinde kezdesedi. Sol jerde Mýminova artqy oryndyqta jatqan qujattar arasyna 180 myń teńge aqsha tastap ketedi. Osy sátte daiyn turǵan sybailas jemqorlyqqa qarsy qyzmet ókilderi «stsenarii» boiynsha tarpa bas salady. Beinetaspadan halyqaralyq terroristi qolǵa túsirip jatqandai betperde kigen arnaiy jasaqtyń «ábjil» áreketi men «jigitter, mynalaryń arnaiy arandatý ǵoi» dep shyryldaǵan Smaǵulovtyń zaryn kórý ońai emes. Sondai-aq, onda aýyl ákiminiń aqshany qolymen ustamaǵany anyq baiqalyp tur. Oqiǵa barysynda «mynalaryńyz masqara ǵoi, el-jurttan uiat boldy-aý, kári anama ne deimin» degen sharasyz Smaǵulovty kóresiń.
Sot protsesi kezinde aýyl ákimi Qazbek Smaǵulov jer telimin «talmai» surap qoimaǵan Z. Mýminovaǵa «Men oǵan qazaqtyń bir qyzy ǵoi dep kómek jasaǵym keldi» dep aitty. Aiyptalýshynyń aqtyq sózine senýge tolyqtai negiz bar. Óitkeni sol Besaryq aýylynan 10 sotyq jerdi sol «paraǵa» usynylǵan teńgege-aq satyp alýǵa bolady. Ár sózdi óz atymen atar bolsaq, «ustaý operatsiiasy» óte sátsiz, ári saýatsyz jasalǵan. Bolmasa, sol aqshany aýyl ákimine qýalap júrip tyqpalamai, «ádettegidei» óz kabinetinde otyryp «shytyrlatyp» sanap jatqanda nege ustamaǵan? Tym quryǵanda, ákimniń qolynda aqshanyń izderi qalar edi ǵoi. Kezekti sot protsesteriniń birinde kúdikti Qazbek Smaǵulov ózine tańylǵan aiyptardy moiyndamai, óziniń Mýminovadan sybailasý arqyly aqsha almaǵanyn, oǵan tek kómekteskisi kelgenin kúiinip turyp jetkizdi. Tipti sol sot protsesi kezinde qulap qalyp, jedel járdem shaqyrýǵa týra keldi. Osynyń ózinen-aq azamattyń jazyqsyz ekeni ańǵarylmai ma?
Bul iste áý bastan-aq zańsyzdyqtarǵa jol berilgen. Oqiǵa shilde aiynyń 20 kúni bolǵanyna qaramastan, tamyz aiynyń basynda Syrdariia aýdany ákiminiń orynbasary Baqytjan Lekerov Besaryq aýylyna kelip, aýyl aqsaqaldary men ardagerlerin jinap aiyptaý aktisimen tanystyryp, aýyl ákiminiń syrtynan aiyptaý sózder aitady. Mundai sheksiz quqyqty oǵan kimniń berip otyrǵany belgisiz. Onyń qolynda «aiyptaý aktisi» qaidan júr. Qansha jerden bilik qysyp bara jatsa da ákim orynbasary zańǵa baǵynýy kerek emes pe? Zańǵa sáikes, sottyń úkimi shyqpai jatyp eshkimniń de aiyptaýǵa quqysy joq. Bes jyldan astam ýaqyt mektep direktory qyzmetin abyroimen atqaryp, eldiń tilegine orai ákimdik qyzmetke kelgen Qazbek Smaǵulov osylaisha sol el-jurtynyń aldynda masqaralandy. Jamandyqtyń beti aýlaq, osy jaǵdaidan keiin aýyl ákimi áldeqandai baqytsyz jaǵdaiǵa dýshar bolsa, kim kináli bolar edi. Ony elestetýdiń ózi qiyn.
Joǵaryda aityp ótkenimizdei, tamyz aiynan bastalǵan sot protsesi qarashanyń sońyna deiin ulasty. Qyzylorda qalalyq sotynda da is birneshe márte qaraldy. Sot barysynda qorǵaýshy tarapynan keltirilgen eshbir dáleldeme qaperge alynbady. Osy iske qatysty zańnyń óreskel buzylyp otyrǵanyn qansha ret dáleldemek bolǵan qorǵaýshy Aqmaral Buralqievanyń ózi «Qyzylordada zań jumys istemeidi eken» degen sózin óz aýzynan estidim. Nátijesinde qalalyq sottyń sýdiasy B. Jańabaev sottalýshy Qazbek Smaǵulovqa QR-niń 366 babynyń 2-bóligimen kináli dep tanyp, múlkin tárkilep, ómir boiyna memlekettik organdarda qyzmet atqarý quqyǵynan aiyra otyryp, paranyń eselengen somasy mólsherinde 12 000 000 teńge aiyppul arqalatty da jiberdi. Sonymen, aqshany qolyna ustamai, Z. Mýminovanyń oǵan qaita-qaita baryp, qyr sońynan qalmai qýalap, kóligine tastap ketkeni, qorǵaýshynyń qorǵaýyndaǵy Qazbek Smaǵulovtyń qylmysyn moiyndamaýy, qorǵaýshynyń osy dáiekti dálelderdi naqty keltirýi, bár-bárisi jelge ushty.
Aityp otyrǵan sózimiz dáleldi bolýy úshin sot kezinde Qazbek Smaǵulovtyń qorǵaýshysy Aqmaral Buralqievanyń keltirgen dálelderine qulaq túreiik.
Kýá Z. Mýminovadan 20. 07.2016 jyly Qyzylorda oblysynyń Sybailas jemqorlyqqa qarsy qyzmetiniń tergeýshisi A. Dildabekov jaýap alǵan. Bul protsestik qujat, qylmystyq is boiynsha dáleldeme retinde jaramsyz ekenine tómendegi negizder sebep bolady.
QPK-niń 199 baby 3-bólimine sáikes,-Tergeý hattamasy tergeý áreketin júrgizý barysynda nemese ol aiaqtalǵan boida jasalady. Hattamada: tergeý áreketin júrgizý orny men kúni; onyń bastalý jáne aiaqtalý ýaqyty minýtyna deiingi dáldikpen; tergeý áreketin júrgizgen adamnyń laýazymy men tegi, tergeý áreketine qatysqan árbir adamnyń tegi, aty, ákesiniń aty kórsetiledi.
Tergeýshi A. Dildabekov, 20.07.2016 j. Z. Mýminovadan jaýap alǵan hattamasynda, jaýap alýdy 16 saǵat 30 minýtta bastap, sol kúni 16 saǵat 30 minýtta bitirdi dep kórsetken. Bul ne sonda, adamnyń shaitan bolyp ketkeni me? Álde tergeýshi A. Dildabekov bárin kózdi-ashyp jumǵansha oryndai alatyn erekshe qabiletke ie tergeýshi me? Osynyń ózi-aq Z. Mýminovadan jaýap alynbaǵanyn kórsetedi. Sonymen qatar, tergeýshi A. Dildabekov, Z. Mýminovadan kórsetilgen ýaqyt aralyǵynda jaýap alýy múmkin emes, sebebi atalǵan tergeýshi men kýá Mýminova atalǵan sol kúni, saǵat 13:56-dan bastap, saǵat 18: 25-ke deiin basqa protsestik is-sharalarda, iaǵni oqiǵa ornynda bolǵany anyq.
QPK-niń 112 baby 1 bólimi, 5-tarmaǵyna sáikes,-Naqty derekter, eger olar osy Kodekstiń talaptary buzyla otyryp alynsa, alynǵan naqty derekterdiń anyqtylyǵyna sotqa deiingi tergep-tekserý nemese isti sotta qaraý kezinde protseske qatysýshylardy zańmen kepildik quqyqtarynan aiyrý nemese quqyqtaryna qysym kórsetý arqyly nemese qylmystyq protsestiń ózge de erejelerin buzý arqyly yqpal etse nemese yqpal etýi múmkin bolsa, sonyń ishinde protsestik áreketti júrgizý tártibin eleýli túrde buzý arqyly.
Sotta qorǵaýshy osy kórsetilgenderdi negizge ala otyryp, QPK-niń 99 babyna sáikes sottan QR QK-niń 366 baby 2 bólimimen Q. Smaǵaulovqa qarsy qozǵalǵan qylmystyq is boiynsha 20.07.2016 j. Kýá Z. Mýminovadan protsestik áreketti júrgizý tártibin eleýli túrde buzý arqyly alynǵan jaýap hattamasyn dáleldemeler retinde paidalanýǵa jol bermeýin surady.
Sot protsesi barysynda qorǵaýshynyń suraqtaryna Z. Mýminova: «ýaqyttary esimde joq» dep jaltarma jaýap berýmen shekteldi. Keiingi sot protsesteriniń eshbirine de qatysqan joq. Osynyń ózi kúmándi oilarǵa jetelemei me?
Aýyl ákimi Qazbek Smaǵulovtyń qorǵaýshysy keltirgen myna dáleldemelerge de nazar salaiyq.
Kýálar B. Baimahanov pen J. Moldabaevtan, 20.07.2016 jyly Qyzylorda oblysynyń sybailas jemqorlyqqa qarsy qyzmetiniń tergeýshisi A. Dildabekov jaýap alǵan. Osy protsestik qujattardyń da qylmystyq is boiynsha dáleldeme retinde jaramsyz ekenine tómendegi negizder sebep bolady.
QPK-niń 199 baby 3-bólimine sáikes,-Tergeý hattamasy tergeý áreketin júrgizý barysynda nemese ol aiaqtalǵan boida jasalady. Hattamada: tergeý áreketin júrgizý orny men kúni; onyń bastalý jáne aiaqtalý ýaqyty minýtyna deiingi dáldikpen; tergeý áreketin júrgizgen adamnyń laýazymy men tegi, tergeý áreketine qatysqan árbir adamnyń tegi, aty, ákesiniń aty kórsetiledi.
Tergeýshi A. Dildabekovpen 2016 jyldyń 20-shildede B. Baimahanov pen J. Moldabaevtan jaýap alǵan hattamalarynda, jaýap alǵan ýaqyttary bir mezgilde alynǵany kórsetilgen. Iaǵni, tergeýshi A. Dildabekov J. Moldabaevtan jaýap alýdy 18 saǵat 35 minýtta bastap, 19 saǵat 40 minýtta bitirgen. Al kýá B. Baimahanovtan jaýap alýdy sol tergeýshi, sol kúni 18 saǵat 30 minýtta bastap 19 saǵat 30 minýtta bitiredi. Sóitip, tergeýshi A. Dildabekov eki adamnan bir ýaqytta «jaýap alǵan» kórinedi...
Sonymen qatar, QPK-niń 210 baby 2 bóliminde, jaýap alýdy júrgizýdiń jalpy qaǵidalary kórsetilgen, iaǵni-Bir is boiynsha shaqyrylǵan adamdar basqa jaýap alynatyn adamdardan bólek jaýap beredi. Sotqa deiingi tergep-tekserýdi júzege asyratyn adam bir is boiynsha jaýap alýǵa shaqyrǵan adamdardyń jaýap alý bastalǵanǵa deiin bir-birimen sóilese almaýy úshin sharalar qoldanady.
Biraq, osy zań erejeleri, kýálar J. Moldabaev pen B. Baimahanovtan jaýap alý kezinde, tergeýshi A. Dildabekovpen buzylǵan. Sebebi, 14.09. 2016 jyly ótken sot májilisinde, kýá J. Moldabaev bylai jaýap berdi: -20.07. 2016 jyly tergeýshi A. Dildabekov odan jaýap alý kezinde, ekinshi kýá B. Baimahanovty sol bir kabinetke otyrǵyzyp odan jaýap alyp otyrdy.
QPK-niń 112 baby 1 bólimi, 5-tarmaǵyna sáikes,-Naqty derekter, eger olar osy Kodekstiń talaptary buzyla otyryp alynsa, alynǵan naqty derekterdiń anyqtylyǵyna sotqa deiingi tergep-tekserý nemese isti sotta qaraý kezinde protseske qatysýshylardy zańmen kepildik quqyqtarynan aiyrý nemese quqyqtaryna qysym kórsetý arqyly nemese qylmystyq protsestiń ózge de erejelerin buzý arqyly yqpal etse nemese yqpal etýi múmkin bolsa, sonyń ishinde protsestik áreketti júrgizý tártibin eleýli túrde buzý arqyly.
Sotta qorǵaýshy A. Buralqieva osy kórsetilgenderdi negizge ala otyryp, QPK-niń 99 babyna sáikes sottan QR QK-niń 366 baby 2 bólimimen Q. Smaǵaulovqa qarsy qozǵalǵan qylmystyq is boiynsha 20.07.2016 j. Kýálar B. Baimahanov pen J. Moldabaevtan protsestik áreketti júrgizý tártibin eleýli túrde buzý arqyly alynǵan jaýap hattamalardy dáleldemeler retinde paidalanýǵa jol bermeýin surady.
Eki jaǵdaida da qorǵaýshy sotqa zań talabynyń buzylýyna bailanysty hattamalardy dáleldemeler retinde paidalanýǵa jol bermeýdi suraidy. Munan ózge is materialdarynda sol kúni oqiǵa bolǵan jerdi qaraý, kúdikti Q. Smaǵulovtan jaýap alý, Q. Smaǵulovty kúdikti retinde taný, qorǵaýshy taǵaiyndaý týraly hattamalar bar.
Osy atalǵan protsestik qujattar, Qyzylorda oblysynyń Sybailas jemqorlyqqa qarsy Qyzmetiniń tergeýshisi N. Qosmuratov qurastyryp shyǵarǵan. Biraq atalǵan tergeýshi N. Qosmuratov, osy qaralyp jatqan qylmystyq iske eshqandai qatysy joq, ol tergeý tobyna kirmegen. Qylmystyq is materialdarynda, tergeýshi Dildabekovtyń, qylmystyq isti óz óndirisine qabyldaý týraly 15.07.2016j. shyǵarylǵan qaýlysy bar. Sonymen qatar, Qyzylorda oblysynyń Sybailas jemqorlyqqa qarsy Qyzmetiniń tergeý bóliminiń bastyǵy R. Qojanovtyń 21.07.2016 j. Shyǵarylǵan, tergeý tobyn qurylý qaýlysyna sáikes, tergeý tobyna tergeýshiler A. Dildabekov pen N. Diýsebaev kirgeni anyq. Atalǵan qaýlyda tergeýshi N. Qosmuratov týraly málimet joq.
QPK-niń 180 baby 1-bólimi 4-tarmaǵyna sáikes,-sotqa deiingi tekserýdi júzege asyrýǵa sebep bolǵan kezde anyqtaýshy, anyqtaý organy, tergeý bóliminiń bastyǵy, tergeýshi, prokýror óz quzireti sheginde jáne osy Kodekste belgilengen tártippen óz qaýlysymen qylmystyq isti is júrgizýge qabyldaidy.
Sondai-aq, qylmystyq is materialdarynda tergeýshi N. Qosmuratovtyń atalǵan qylmystyq isti óz óndirisine qabyldaý týraly qaýlysy joq ekendigi anyqtaldy. Qylmystyq isti tergeý úshin tergeý tobyna kirgeni týraly qujat joq.
QPK-niń 112 baby 1 bólimi 3 tarmaǵyna sáikes,-Naqty derekte, eger olar osy Kodekstiń talaptary buzyla otyryp alynsa, alynǵan naqty derekterdiń anyqtyǵyna sotqa deiingi tergep-tekserý nemese isti sotta qaraý kezinde protseske qatysýshylardy zańmen kepildik berilgen quqyqtarynan aiyrý nemese quqyqtaryna qysym kórsetý arqyly nemese qylmystyq protsestiń ózge de erejelerin buzý arqyly yqpal etse nemese yqpal etýi múmkin bolsa, sonyń ishinde osy qylmystyq is boiynsha is júrgizýdi júzege asyrýǵa quqyǵy joq adamnyń protsestik áreketti júrgizýine bailanysty.
Joǵaryda aitylǵan zań talaptaryna sai qorǵaýshy A. Buralqieva tergeýshi N. Qosmuratovtyń qylmystyq iske eshqandai qatysy joqtyǵyna bailanysty, ol shyǵarǵan protsesstik qujattar dáleldemelerdi paidalanýǵa múmkin emes dep sotqa narazylyq túsiredi. Ókinishke qarai, qorǵaýshy zań talaptarynyń óreskel buzylýyn naqty dáleldermen keltirse de isti qaraǵan sýdia B. Jańabaev barlyǵyn da qaperge almai, qanaǵattandyrýsyz qaldyrdy.
«Qarǵa qarǵanyń kózin shuqymaidy» degen máteldi áldebir ádiletsizdik oryn alǵanda jii qoldanatynymyz bar. Sol sekildi, áý basta-aq, tergeý tobynyń jetekshisi N. Diýsebaev jasaǵan aiyptaý aktisin shildeniń 30-y kúni Qyzylorda oblysy prokýrorynyń orynbasary Qairat Bóribaevqa tapsyrady. Oblys prokýrorynyń orynbasary isti asa «yjdaǵattylyqpen» qarap kelesi kúni, iaǵni 1-shi tamyzda qol qoiady. Bizder joǵaryda keltirgen zań buzýshylyqtar qadaǵalaýshy organ tarapynan «baiqamai» ótip ketip solaiymen sotqa jol tartady. Al ádiletti sottyń qandai úkim shyǵarǵanyn aityp óttik. Is keiinnen oblystyq sotta qylmystyq ister jónindegi sot alqasy quramynda tóraǵalyq etýshi B. Qalymbet, sýdialar A. Narimov, A. Kýjaniiazov bolyp, prokýror E. Quttybaevtyń jáne qarsy taraptyń qatysýymen appeliatsiialyq shaǵym qaralyp, qanaǵattandyrýsyz qaldyryldy.
Oqiǵa osy jyldyń shilde aiynda boldy. Jýrnalist retinde azamattyń quqyn qorǵap Qazaqstan Respýblikasynyń Bas Prokýrory J. Asanovqa máseleni jan-jaqty túsindirip hat joldadym. Onda ózi jarymjan, úshinshi top múgedegi Qazbek Smaǵulovtyń isin tergep, tekserý barysynda qandai da bir shalalyqtyń baryn túsindirýge tyrystym. Sol oqiǵaǵa bailanysty eldegi bolyp jatqan dúrbeleńdi, aýyl ákimin jaqtap jinalǵan myńǵa tarta qoldy qosa joldadym. Bul hatymdy keiinnen sot protsesi kezinde sýdia B. Jańabaev oqyp berdi. Alaida meniń bul janaiqaiym da dalaǵa ketti. Tek meniń sanamdy «Qyzylorda oblysynda talai is osylai qaralyp, talai jazyqsyz jan temir torda otyrǵan shyǵar, sońǵy jyldardaǵy isterdi qaita qarar ma edi» degen saýaldar mazalap turyp aldy.
Bul oqiǵadan taǵy bir uqqanym, Qazaqstanda turatyn kez-kelgen memlekettik qyzmetshini túrli aila-sharǵy arqyly qaqpanǵa túsirýge bolady eken. Bolmasa, aýyl ákimi qyzmetine kiriskenine eki-úsh ai ǵana bolǵan adamdy birden jemqor bola qaldy deý qisynǵa kele me? Bul jerde adam faktoryna bas qatyryp jatqan eshkim baiqalmaidy. Sybailas jemqorlyqqa qarsy qyzmet úshin kórsetkish kerek. Jii estitinimiz, aýyl ákimderiniń para alyp jatqany týraly «jańalyqtar». Álde olarda tek aýyl ákimderin ǵana ustaý jóninde arnaiy tapsyrma bar ma? Bul oqiǵa meni kelesi oilarǵa jeteledi. Áýelde sybailas jemqorlyqqa qarsy qyzmet ókilderi jarymjan aýyl ákiminiń qyr sońynan qalmai júrip ustaidy. Onan keiin isti zań talaptaryn buza otyryp júrgizip, osy saýatsyz hattamalaryn oblys prokýrorynyń orynbasaryna tapsyrady. Al ol bolsa adam taǵdyryna bei-jai qarap, qolyn qoiyp sotqa joldai salady. «Bir apam bir apamnan soraqy» demekshi, sońǵy úkimdi aitqan sottyń sheshimi belgili. Is boiynsha aýyl ákimine QPK-366 baby 2 bóligimen aiyptalady. Sybailasyp qylmys jasaǵany úshin. Sonda ózińiz oilańyzshy, bul jerde sybailasyp otyrǵandar kimder ózi...
Táýelsizdigimizge shirek ǵasyr toldy. Osy jyldar jas memleketimiz úshin ońai bolǵan joq. Jetistikterimizge el ishindegi saiasi turaqtylyq pen aýyzbirshiliktiń arqasynda jettik. El tizginin qolǵa alǵan Memleket basshysynyń syndarly saiasaty qazaq kóshin talai tar jol taiǵaq keshýden súrindirmei alǵa súirep keledi. Dei tursaq ta, kúni keshegi Aqtóbe men Almaty qalalarynda bolǵan qandy oqiǵalardyń túbinde qoǵamnyń kei músheleriniń óz qyzmetterine salǵyrt qaraýynan halyqtyń ashý-yzasyn týdyrǵany jasyryn emes.
Almatydaǵy qandy oqiǵany jasaǵan Rýslan Kúlikbaevtyń sottaǵy sózin dálme-dál keltirer bolsam, ... «Almaly aýdandyq sotyna bardym. Sol jerde prokýrorlar men sottardy atqym keldi. Biraq qarapaiym adamdardyń kirip-shyǵyp júrgenin kórip atpadym...Ekinshi qabatqa kóterildim, seiftiń artynda bireý tur eken, ony atyp edim timedi. Ol qashyp ketti. Artynan barsam, ol terezeden sekirip ketken eken. Ony atpadym, qarapaiym adamdarǵa tiip keter dep...» deidi. Qylmysker nelikten sot pen prokýratýra qyzmetkerlerin óltirgisi kelgen. Osynyń sebebine úńilgen jan bar ma?
Elbasy árbir keleli jiynda quqyq qorǵaý oryndarynyń saýatsyz áreketterin synap, búgingi basty bailyq el ishindegi turaqtylyq ekenin aitýmen keledi. Muny keshegi ótken Qazaqstan sýdialarynyń VII sezinde túrli derektermen naqtylap atap ótti. Laiyqty sýdialardyń korpýsyn qalyptastyrý máselesin kóterdi.
Degenmen, zaiyrly memleket quryp, Qazaqstandy tórtkúl dúniege tanytqan Prezidenttiń eńbegine osyndai jaittar kóleńkesin túsiretini ókinishti. Bul ózi, Elbasy saiasaty men onyń bedeline qarsy jasalyp otyrǵan sharýa emes pe? Álde Elbasy senim artyp, eńbegin oń baǵalap otyrǵan memleketimizdiń bas prokýrory J. Asanovqa astyrtyn jasalyp otyrǵan qysastyq pa? Óitkeni sońǵy ýaqytta Bas prokýror el-eldi aralap, talai zańsyzdyqtardyń betin ashyp, birqatar zańdy attaǵan qyzmetkerlerdi ornynan aldy. Erteli-kesh munyń báriniń de syry ashylary anyq. «Birińdi, qazaq, biriń dos, Kórmeseń istiń bári» bos dep Qunanbaidyń balasy zarlap ótken zar zamannyń túk ózgermegeni me sonda...
Qultas Dostanov, jýrnalist
Derekkóz: Abai.kz
