Qazaqstannyń robototehnika ulttyq quramasy 2025 jylǵy Panama-Siti qalasynda ótken FIRST Global Challenge Álemdik olimpiadasynda tórtinshi ret qatarynan jeńiske jetti. Almaty qalasyndaǵy NIS mektebiniń oqýshylar komandasy absoliýtti chempion atanyp, 190 eldiń qatysýshylarynan ozyp shyqty, dep habarlaidy Dalanews.kz.
Qazaqstandyqtar týrnirdiń eń joǵarǵy eki júldesin jeńip aldy: Grand Challenge Award — jarystyń basty kýbogy jáne Albert Einstein Award — kórnekti injenerlik sheshimder, innovatsiialar jáne komandalyq jumys úshin beriletin syilyq.
Ulttyq quramanyń sapynda 9–10 synyp oqýshylary Rashat Dosymjan, Daýlet Iliias, Alihan Orynbasarov, Madiar Ásetuly jáne Nýrasyl Týrsymbaev synǵa tústi. Olardy daiyndaǵan bapkerler: Dýlat Baitýlenov, Nýrdaýlet Dosmagambet jáne Asylbek Mýrzahmetov.
Panamadaǵy jeńis Qazaqstannyń buǵan deiingi jeńisti jolynyń dástúrli jalǵasy boldy. Elimizdiń daryndy jastary Jenevada (2022), Singapýrda (2023) jáne Gretsiiada (2024) jeńiske jetken. Osylaisha, Qazaqstan FGC tarihynda tórt márte chempion atanǵan jalǵyz memleketke ainaldy.
Biylǵy jarystyń taqyryby — «Eco-Equilibrium» — biologiialyq ártúrlilikti saqtaý jáne ekologiialyq tepe-teńdik. Qazaqstandyq robot rekordtyq dáldik pen tiimdilikti kórsetti, eldiń jahandyq STEM arenasynda ósip kele jatqan tehnologiialyq áleýetin tanytty.
