Qazaqstannyń bochcha federatsiiasynyń qoldaýymen túsirilgen «Erekshe» filmi kórermenderdiń joǵary qyzyǵýshylyǵyn týdyrdy. Kinopark Theatres jelisinde prokat kezinde jinalǵan 165 mln teńge múmkindigi shekteýli balalardy qoldaý endaýment-qoryna aýdaryldy, dep habarlaidy dalanews.kz.
Film ideiasy 2021 jyldan beri elimizde paralimpiadalyq bochcha sportyn damytyp kele jatqan Qazaqstannyń bochcha federatsiiasynda paida bolǵan. Kinopark Theatres bastamany qoldap, túsirilimdi qarjylandyrdy. Seriktesterdiń ortaq maqsaty – erekshe sportshylardyń ómirin keń aýditoriiaǵa tanystyryp, qazaqstandyq qoǵamdaǵy inkliýziia taqyrybyna nazar aýdartý.
“Qazirgi ýaqytta biz filmdi Mońǵoliia kinoteatrlarynda kórsetý máselesin pysyqtap jatyrmyz, sondai-aq Qyrǵyzstan, Ózbekstan, Resei jáne Japoniia distribiýtorlarymen kelissózder júrgizilýde. Mońǵoliia tarapymen naqty ýaǵdalastyqtarǵa qol jetkizildi: qazirgi tańda týyndyny mońǵol tiline dybystaý protsesi júrip jatyr jáne jaqyn arada film osy eldiń ekrandaryna shyǵady”, – dedi Kinopark Theatres ókili Erlan Buqarbaev.
Filmge bochcha sportyn jai ǵana sport emes, álemge ashylǵan jalǵyz tereze, ózin dáleldeýdiń múmkindigi dep qabyldaityn sportshylar qatysty. Olar fizikalyq shekteýler úlken armanǵa kedergi emes ekenin kórsetip keledi. Al taiaýda qazaqstandyq bochchashylar Astanada ótetin bedeldi halyqaralyq týrnirge qatysady.
“Maýsym aiynda Qazaqstan astanasy Astana 2026 World Boccia Cup týrnirin qabyldaidy. Jarysqa 24 elden 90 parasportshy men 140 erip júrýshi keledi. Týrnir «Qazaqstan» jeńil atletikalyq sport kesheninde ótedi. Bul biz úshin mańyzdy kezeń. Ótken jyly Astana 2025 World Boccia Challenger týrnirin joǵary deńgeide uiymdastyrǵanymyzdy Halyqaralyq bochcha federatsiiasy (BISFed) resmi túrde atap ótti. Osyndai aýqymdy jarystardy ótkizý Qazaqstannyń jahandyq parasporttyq is-sharalarǵa daiyn ekenin kórsetip, inkliýzivti sport pen halyqaralyq yntymaqtastyqty damytýdaǵy mańyzdy qadamǵa ainalyp otyr”, – dedi Qazaqstan bochcha federatsiiasynyń bas hatshysy Nurgúl Uljekova.
Uiymdastyrýshylar el namysyn qorǵaityn otandyq sportshylardy daiyndaýǵa da erekshe nazar aýdaryp otyr. Qazaqstandyq bochchashylardyń sheberlik deńgeiiniń ósip kele jatqanyn halyqaralyq arenadaǵy jetistikter de dáleldeidi.
“Qazirgi tańda bochcha ulttyq quramasynyń sapynda shamamen 50 sportshy bar. Osy ýaqytqa deiin bizdiń atletter halyqaralyq jarystarda 4 altyn, 5 kúmis jáne 6 qola medal jeńip aldy”, – dedi Qazaqstan bochcha federatsiiasynyń vitse-prezidenti Nazym Janǵazinova.
Film týraly
«Erekshe» filmi mahabbat pen adaldyq, satqyndyq, rýh kúshi, jeńiske degen jiger jáne álemdi ózgertýdiń joly aldymen ózińdi ózgertýden bastalatyny týraly baiandaidy. Siýjet ortasynda – bochcha sportymen ainalysatyn tserebraldy sal aýrýyna shaldyqqan jasóspirimmen tanysqannan keiin ómiri ózgeretin Arman esimdi jigit. Ortaq synaqtar, jattyǵýlar men jeńis jolyndaǵy kúres arqyly keiipker rýhani qundylyqtaryn qaita taýyp, ómirdiń jańa mánin tabady.
Basty rólderdi Jasulan Kópbergen, Aqerke Nazarbekova jáne Rasýl Baýyrjan somdaǵan. Stsenarii avtory – Serjan Serikbai, rejisseri – Ernar Nurǵaliev.
«Erekshe» filminiń premerasy 2026 jylǵy 19 naýryzda Qazaqstannyń barlyq óńirinde ótti jáne kórermen tarapynan joǵary baǵasyn aldy. kino.kz bilet satý servisiniń málimetinshe, film júzdegen oń pikir jinap, 8,5 reitingke ie bolǵan.
Anyqtama:
Bochcha 1984 jyldan beri Paralimpiada oiyndarynyń baǵdarlamasyna engen. Bul sport túri aýyr formadaǵy múgedektigi bar adamdarǵa, sonyń ishinde tserebraldy sal aýrýy men bulshyqet distrofiiasyna shaldyqqan jandarǵa qoljetimdi. Qazirgi tańda Qazaqstannyń bochcha federatsiiasy 13 óńirdegi 250-den astam sportshyny biriktiredi. Onyń 47-si halyqaralyq jarystarda el namysyn qorǵap júr.
