ShQO-da eńbek qatynastaryn retteitin kelisimge qol qoiyldy
Bul qujat ekonomikalyq turaqtylyqty nyǵaitýǵa, eńbek qatynastaryn, daýly máselelerdi retteý, jumyspen qamtý jáne eńbekaqy tóleýdiń tiimdi jaǵdailaryn jasaýǵa óz septigin tigizedi. Memorandým Shyǵys Qazaqstan ákimdigi, oblystyq kásipodaqtar birlestikteri men jumys berýshilerdiń ózara yntymaqtastyǵyna negizdelgen. Búginde 2018-2020 jyldar aralyǵynda jasalǵan kelisim-sharttyń merzimi aiaqtalǵan. Osyǵan bailanysty, áleýmettik áriptestik taraptary aldaǵy úsh jyldyq kezeńge arnalǵan oblystyq úshjaqty kelisimniń jobasyn daiyndady.
ShQO ákiminiń orynbasary Shákárim Buqtuǵutovtyń aitýynsha, ótken jyldary kelisim aiasynda óńirdegi negizgi ekonomikalyq kórsetkishter boiynsha oń dinamikaǵa qol jetkizildi. 2018 jyldan bastap komissiianyń 21 otyrysy ótkizildi. Onda turaqty negizde jalaqy boiynsha qyzmetkerlerdiń aldyndaǵy bereshekti óteý jáne boldyrmaý máselesi talqylandy. Qabyldanǵan sharalardyń nátijesinde úsh milliard teńgege jýyq borysh ótelip, oblystyń 760 kásipornynda 18 200 jumysshynyń quqyǵy qorǵaldy.
– Birneshe jyl boiy respýblikada «Eńbek» memlekettik baǵdarlamasy, sondai-aq "Jumyspen qamtýdyń jol kartasy" iske asyrylyp keledi. Oblysta 140 myńǵa jýyq turǵyn «Jumyspen qamtýdyń jol kartasy» memlekettik baǵdarlamasyna qatysty. Tek 2020 jyly óńirde 22 myńnan astam jumys orny ashyldy. Búginde Shyǵys Qazaqstan oblysynda jumyssyzdyq deńgeii 4,9 paiyzdy qurap otyr, – deidi Shákárim Buqtuǵutov.
Aita keteiik, úkimet 2021 jyldyń 12 naýryzynda jumys berýshilerdiń respýblikalyq birlestikteri men kásiptik odaqtar arasynda 2021-2023 jyldarǵa arnalǵan kelisim-shartqa qol qoidy. Osylaisha, oblystyq úshjaqty kelisimniń jobasy ázirlenip, eńbekaqyny, áleýmettik jáne zeinetaqy aýdarymdaryn ýaqytyly tóleýge qoǵamdyq baqylaýdy kúsheitýge basa nazar aýdaryldy.
«ShQO kásipodaq ortalyǵy» Aýmaqtyq kásipodaqtar birlestiginiń tóraǵasy Temirbek Qasymjanov atalǵan memorandým aiasynda 2023 jyldyń sońyna qarai oblys kásiporyndary qyzmetkerleriniń jalaqysyn keminde 30 paiyzǵa ósirý josparlanǵanyn aitty. Sonymen qosa, úshjaqty komissiianyń odan arǵy jumysy áleýmettik áriptestikti nyǵaitýǵa jáne áleýmettik-eńbek qatynastaryn retteýge baǵyttalatyn bolady.
– Oblystyq kelisim-shart 8 bólim, 120 tarmaqtan turady. Jeńildikter deńgeiiniń belgili bir ósýin, aýyldyq eldi mekenderde turatyn densaýlyq saqtaý, bilim berý, áleýmettik qamsyzdandyrý, mádeniet jáne sport salalarynyń jáne veterinariialyq qyzmetterdiń mamandaryna kómek kórsetýdi kózdeidi. Qaýipsiz eńbek jaǵdailaryn qamtamasyz etýge qoǵamdyq baqylaýdy júzege asyratyn tehnikalyq inspektorlardy materialdyq yntalandyrý tetigi aiqyndaldy, – dedi Temirbek Qasymjanov.
Sondai-aq, onyń aitýynsha, ózgerister "Semei iadrolyq synaq poligonyndaǵy iadrolyq synaqtardyń saldarynan zardap shekken azamattardy áleýmettik qorǵaý týraly" zańǵa da qatysty boldy. Memorandým aiasynda kýáliktiń bar-joǵyna qaramastan qosymsha aqshalai ótemaqy alýǵa quqyǵy bar tulǵalar anyqtaldy.
Memorandýmǵa qol qoiý rásimine oblystyń atqarýshy bilik organdarynan ShQO ákiminiń orynbasary Shákárim Buqtuǵutov, oblys kásipodaqtarynan – aýmaqtyq kásipodaqtar birlestiginiń tóraǵasy Temirbek Qasymjanov, «AMANAT» Qazaqstan kásipodaqtar Dostastyǵy» respýblikalyq kásipodaqtar birlestigi aýmaqtyq kásipodaqtar birlestiginiń tóraǵasy Mihail Aizenberg, jumys berýshiler tarapynan ShQO boiynsha orman, aǵash óńdeý jáne jihaz ónerkásibi kásiporyndary óńirlik qaýymdastyǵynyń tóraǵasy Vitalii Chernetskii qatysty.
