Esterińizge sala keteiik, 2021 jyldyń 3 naýryzynda Óskemen qalasyndaǵy «Arman» balabaqshasynyń ata-anasy tárbieshi tarapynan balalarǵa qatygezdik kórsetý týraly ótinishpen Shyǵys Qazaqstan oblysynyń bilim basqarmasyna júgingen bolatyn.
Jinalysqa QR Bilim jáne ǵylym ministrliginiń, oblystyq prokýratýranyń, ShQO boiynsha politsiia departamentiniń ókilderi, kámeletke tolmaǵandar isteri jónindegi qalalyq jáne aýdandyq komissiialardyń tóraǵalary men hatshylary, qalalar men aýdandardyń bilim berý bólimderiniń basshylary, sondai-aq «Arman» balabaqshasy tárbielenýshileriniń ata-analary qatysty.
Komissiia tóraǵasy-oblys ákiminiń orynbasary Álisher Marhabattyń aitýynsha, oqiǵa 17 aqpanda bolǵan. Alaida balabaqsha ákimshiligi tarapynan der kezinde tiisti sharalar qabyldanbaǵan.
– Osy sebepti, «Arman» balabaqshasynyń ákimshiligi tarapynan buzýshylyqtar esh kúmán týdyrmaidy. Videoda muǵalim balany eki ret edenge laqtyratyny jáne munyń bári basqa balalardyń, sondai-aq mekeme qyzmetkerleriniń kóz aldynda bolǵandyǵy kórsetilgen. Oqiǵa 17 aqpanda boldy, biraq bizge bul jaǵdai keshe ǵana belgili boldy. Balabaqsha ákimshiligi eshkimdi habardar etpedi. Osyǵan bailanysty, keshe bizdiń tarapymyzdan shuǵyl sharalar qabyldanyp, osy jaǵdai boiynsha barlyq derekter quqyq qorǵaý organdaryna berildi.
3 naýryzda QR QK 140-baby 2-bóligi boiynsha sotqa deiingi tergeý bastaldy. Búgin balabaqsha direktory men tárbieshi atqaryp otyrǵan qyzmetterinen bosatyldy. Jaǵdai oblys ákiminiń jeke baqylaýynda ekenin atap ótkim keledi. Bilim berý, mektepke deiingi, arnaiy mekemelerdegi balalarǵa mundai kózqarasqa jol berilmeidi, – dedi Álisher Marhabat.
Búgin balabaqsha ata-analarymen kezdesý ótti. Ata-analar kúni boiy arnaiy kelip, beinebaqylaý júiesi arqyly basqa toptardaǵy jaǵdaidy tekserýde. Helga Zaritovskaia balabaqsha ata-analarynyń atynan otyrysta sóz sóilep, osy jaǵdaiǵa bailanysty mekemeniń barlyq qyzmetkerleri ádil jaza alsyn degen tilegin bildirdi.
– Eń aldymen barshańyzǵa alǵys aitqym keledi. Shynynda da, bizdiń isimizge barlyǵy, sonyń ishinde oblys basshylyǵy da qosyldy. Bizde bir tilek bar, osy balalar mekemesin tolyq tekserseńizder. Biz direktorǵa, tárbieshige jáne onymen birge jumys istegen basqa tárbieshige, sondai-aq kútýshiler men medbikelerge qatysty barynsha sharalar qabyldanǵanyn qalaimyz. Sonymen qatar, videodan oqiǵanyń kýási bolǵanyn kórýge bolatyn, alaida esh shara qabyldamaǵan hatshyda jaýapkershilikke tartylýy kerek, – dep atap ótti Helga Zaritovskaia.
Komissiianyń barlyq músheleri ata-anany qoldap, bolashaqta mundai oqiǵalarǵa jol bermeý úshin tiisti sharalar qabyldaý qajettigin atap ótti.
– Biz sizder siiaqty balalarymyzdyń sapaly bilim jáne laiyqty tárbie alýyna, eń bastysy olardyń qaýipsiz jaǵdaida bolýyna múddelimiz. Bul balanyń fizikalyq jáne psihologiialyq densaýlyǵyna da qatysty. Bul iske qatysty eshqandai erekshe kózqaras bolmaýy kerek. Bizdiń tarapymyzdan barynsha qoldaý bolady, – dedi ShQO ákiminiń orynbasary Álisher Marhabat.
Aita keteiik, oblys ákimi Danial Ahmetovtiń tapsyrmasy boiynsha komissiia óńirdegi bilim berý uiymdarynyń beinebaqylaý júiesin Ishki ister organdarynyń jedel basqarý ortalyǵyna shyǵarý máselesin qarady. Komissiianyń sheshimi boiynsha jumys toby quryldy.
Bilim basqarmasynyń aqparatyna sáikes, qazirgi ýaqytta bilim berý uiymdarynyń beinebaqylaý júielerin ishki ister organdarynyń jedel basqarý ortalyǵyna shyǵarý jumysy qoldanystaǵy standarttarǵa sáikes kezeń-kezeńimen júrgizilýde.
Búgingi tańda Shyǵys Qazaqstan oblysynda barlyq balabaqshalar men mektepter beinebaqylaýmen jabdyqtalǵan.
Komissiia, sondai-aq aiyna bir ret monitoringtik top jumysynyń qorytyndysyn qaraýǵa shyǵarý týraly sheshim qabyldady. Atalmysh top óz kezeginde oblystyń mektepke deiingi uiymdarynyń beinebaqylaý júieleriniń barlyq jazbalaryn apta saiyn zerdeleitin bolady.
