Forým uiymdastyrýshylary ShQO ákimdigi, «Jasyl» ekonomika jáne G-Global-dy damytý Koalitsiiasy», «EXPO&WOMEN» halyqaralyq uiymy men QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiiasynyń qoldaýymen Coca-Cola halyqaralyq qory.
Forýmnyń saltanatty jiynyn oblys ákiminiń orynbasary Ásem Núsipova ashty.
– Sharanyń basty maqsaty aýyl-aimaqtaǵy áielderdiń áleýetin anyqtap, olarǵa qoldaý kórsetý, túrli baǵyttar boiynsha damytyp, ál-aýqatynyń artýyna jaǵdai jasaý bolyp tabylady.
Búginde óńirimizdegi 3300-den astam aýyl sharýashylyǵy baǵytyndaǵy kásiporyndardy, 795 shaǵyn jáne orta kásipkerlik nysandy áiel azamatshalar basqaryp otyr.
Sondai-aq Borodýliha aýdanyn Olga Býlavkina esimdi azamatsha tizgindegen. Budan bólek, oblysymyzdaǵy 24 aýyldyq okrýgtiń ákimderi názikjandylar. Aýdandyq, qalalyq máslihattardyń 57 depýtaty áiel qaýymynan bolsa, 372 memlekettik organdy osy jandar basqaryp otyr, – dedi oblys ákiminiń orynbasary Ásem Núsipova.
Búgingi tańda oblystaǵy áleýmettik saiasattyń negizgi baǵyty áielderdi, onyń ishinde kópbalaly analardy qoldaýǵa baǵyttalǵan. 1 qyrkúiekke qarai kópbalaly otbasylardan shyqqan balalar oblystyq biýdjet tarapynan mektep formasymen, mekteptegi ystyq tamaqpen qamtylatyn bolady.
Kópbalaly otbasylardan shyqqan jáne múmkindigi shekteýli balalar balabaqshaǵa tegin baratyn bolady.
11 maýsym kúni óńirdiń aýyldy jerlerinde turyp jatqan 230 kópbalaly ana biýdjettik emes qarajat tarapynan turǵynúimen qamtyldy.
Odan keiin Ásem Núsipova óz mamandyǵyna ómir boiy adal bolǵan birneshe áiel azamatshaǵa oblys ákiminiń atynan arnaiy gramotalar men aqshalai syiaqylar tabystady.
Marapattalýshylar qatarynda 77 jasqa kelse de qoi baǵý kásibin tastamaǵan 8 bala, 16 nemere, 12 shóbere tárbielep otyrǵan katonqaraǵailyq Sábilá Qurmanova bar.
Erlik pen kúsh-jigerdiń aiqyn dáleli dep Zýlfiia Erqasymovany aitýǵa bolady. Traktorshy-kombainshy bolyp jumys istep júrip eki aiaǵynan aiyrylǵan rýhy biik áiel protezge turyp, búginde Katonqaraǵai aýdanynda ashana meńgerýshisi.
Aýyl áielderi aldynda QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiiasynyń múshesi Asiia Hairýllina sóz aldy.
- Shyǵys Qazaqstan búginde bul el óńirleriniń arasynda áielderdiń múddeleri men quqyqtaryn ilgeriletý, genderlik teńdik máseleleri boiynsha kósh bastap tur. Basty maqsat-aýyl áielderiniń mártebesi men ómir súrý sapasyn, bilimge, meditsinaǵa, mádenietke degen qol jetimdiligin arttyrý. Bul oqshaýlaýǵa basty nazar aýdarylǵan onjyldyq jospardy júzege asyrýǵa óte qolaily.
Iaǵni, árbir azamat jergilikti jerde eldiń damýyna óz úlesin qosýy tiis. Eger respýblikada áielderdiń 52 paiyzy aýyldarda turatynyn eskersek, olar úshin mańyzdy aqparat, qoldaý alý, tájiribe almasý múmkindigi óte qajet.
Sóz kezegin «Jasyl» ekonomika jáne G-Global-dy damytý Koalitsiiasy» basqarmasynyń basshysy, QR Prezidenti janyndaǵy jasyl ekonomikaǵa kóshý Keńesiniń múshesi Saltanat Rihimbekova jalǵastyrdy. Saltanat Rahimbekova Respýblika boiynsha bul ekinshi ret ótkizilip otyrǵan forým ekenin aityp, kásipkerlik ashýdyń naqty úlgileri men múmkindikterin atap ótti.
– Aýyl áielderin ózderi siiaqty jandardyń tabysqa jetý úlgileri ǵana jigerlendiredi. Sondyqtan biz osyndai pikir men tájiribe almasý alańdaryn uiymdastyramyz. Elbasymyz osydan birneshe jyl buryn respýblikada kem degende aýylsharýashylyǵy kooperativterine birikken 500 myń jeke aýyl sharýashylyqtary bolý keregin atap ótken. Osy rette biz aýyl áielderine qoldaý kórsetip, óz kásibin dóńgeletýge múmkindik beremiz – dedi Saltanat hanym.
Aýyldyq aimaqtardy damytýdaǵy áielderdiń róli týraly Borodýliha aýdanynyń ákimi Olga Býlavkina aityp ótti. Sonymen qatar, qatysýshylar «Eńbek» jumyspen qamtý jáne «Biznestiń jol kartasy -2020» baǵdarlamalary, memlekettik-jeke menshik áriptestik jobalaryn júzege asyrý arqyly aýylsharýashylyq sýbektilerin qarjylandyrý týraly aqparat aldy.
Forýmnyń ereksheligi «Meniń jetistigimniń tarihy» sherýiniń uiymdastyrylýy. Ony «Aika» sharýa qojalyǵynyń jetekshisi, «Meniń jetistigimniń tarihy - 2018 jyl» nominatsiiasynyń laýreaty Aelita Ahmetsálimqyzy júrgizdi. Ol jastar arasynda júlde qory 1 mln. teńge bolatyn eko-týrizmdi nasihattaý boiynsha baiqaý uiymdastyrýdy usyndy.
Forým sońynda aýyldyq aýmaqtardy damytýǵa zor úles qosqan áielderge alǵys hattar tabys etildi.
