Onda oblys ákimi Danial Ahmetov jumystyń birinshi kezeńin aiaqtap, aýyldaǵy 230 otbasyna baspana kiltin tabystaitynyn aitqan bolatyn.
Aita ketsek, aimaq basshysynyń tapsyrmasy boiynsha 88 aýyldyq okrýgter men 4 aýdan ortalyǵynda jumys toby qurylǵan bolatyn.
Quramynda qoǵamdyq uiym ókilderi men kópbalaly analar bar arnaiy top baspana alý maqsatynda úilerdi aralap, qolailysyn tańdap aldy. Baspana tańdaý kezinde mal ósirýge, baqsha egýge jáne sharýashylyq júrgizýge tiimdi bolatyndyǵyna zor kóńil bólindi.
Sonymen aýyldyq okrýgterde 196 úi men aýdan ortalyqtarynda 34 baspana tańdap alyndy. Olardyń jalpy biýdjettik emes somasy 558,5 mln teńgeni qurap otyr.
Sonymen, Shyǵys Qazaqstan oblysy aýyldaryndaǵy 230 otbasy kópten kútken baspana kiltterine ie boldy. Aimaq basshysy Danial Ahmetov Glýbokoe aýdanynda bolyp, 13 otbasyn jańa baspanalarymen quttyqtady. - Kópbalaly otbasylar - elimizdiń basty igiligi.
Biz aýyldardaǵy kópbalaly otbasylarǵa baspana berip, áleýmettik mańyzdy máseleni sheshtik. Úiler úkimettiń qalaýymen emes, kópbalaly analardyń ózderimen tańdap alynýy meni qatty qýantady. Barlyq otbasylar qýanyshty.
Aldaǵy ýaqytta qalalar men aýdan ortalyqtarynda baspana máselesin sheshetin bolamyz,- dedi Danial Ahmetov. Tórt balanyń anasy Ainur Toqtarbaeva óziniń qýanyshyn jasyra almai, jańa úige kóshken baqytymen bólisti.
- Endi meniń otbasymda barlyq qurylys nysandary qarastyrylǵan úlken úi bar ekenine sene alar emespin. Aldaǵy ýaqytta sharýashylyq ashý oiymda bar. Úlken qoldaý kórsetip otyrǵan memleketimizge rizashylyǵym sheksiz,- deidi baqytty ana.
Sondai-aq bir mezette oblystyń ózge aýdandarynda da kiltter tabystaldy.
Eń kóp Borodýliha aýdanynda-37, Kókpektide-34, Tarbaǵatai aýdanynda-27, Ulanda-23, Úrjarda -20.
Endi jobanyń ekinshi kezeńi júzege asyrylyp, aýdan ortalyqtaryndaǵy 300 otbasyǵa baspana berý jospary tur.
Qazirgi ýaqytta qala jáne aýdan ákimderimen Qazaqstan Turǵyn úi qurylys jinaq banki arqyly "Baqytty otbasy" kópbalaly otbasylarǵa jeńildetilgen ipotekalyq nesie berý baǵdarlamasynyń barysy qarastyrylýda.
