Búgin Óskemen qalasynda Shyǵys Qazaqstan oblysynyń ınvestısıalyq áleýeti forýmy óz jumysyn bastady. Alań iri, shaǵyn jáne orta bıznes ókilderin, halyqaralyq uıymdar men dıplomatıalyq korpýs múshelerin biriktirdi. Forýmnyń ashylýyna oblys ákimi Nurymbet Saqtaǵanov tikeleı qatysty,- dep habarlaıdy Dalanews.kz
Forým aımaqtyń jańa jobalar men strategıalyq áriptestikke ashyq ekendiginiń sımvolyna aınaldy. Shyǵys Qazaqstan – bul jerde sapaly agroóndiris qurýǵa, týrızmdi, kólik-logıstıka jáne ónerkásip klasterlerin damytýǵa barlyq múmkindik bar ekenin senimdi túrde kórsetip otyr. Sonymen qatar, munyń bárin turaqty ósimge, ekologıalyq tazalyqqa jáne eksportqa baǵyttalýǵa súıene otyryp júzege asyrý joldary naqty anyqtalǵan.
Forýmnyń mańyzdy qonaqtarynyń qatarynda – Koreıa Respýblıkasynyń Qazaqstandaǵy Tótenshe jáne Ókiletti Elshisi Chjo Te-ık, Belarýs Respýblıkasynyń Tótenshe jáne Ókiletti Elshisi Alekseı Bogdanov, Ózbekstan Respýblıkasynyń Tótenshe jáne Ókiletti Elshisi Bahtıór Ibragımov, Qyrǵyz Respýblıkasy Tótenshe jáne Ókiletti Elshisi Dastan Dúshekeev boldy.
Sonymen qatar, Qytaı, Belgıa jáne Shvesıa elderiniń dıplomatıalyq mısıalarynyń keńesshileri men ókilderi, sondaı-aq Dúnıejúzilik bank delegattary da forýmǵa qatysty.
Forýmdy ashqan oblys ákimi Nurymbet Saqtaǵanov aımaqtyń qýatty ónerkásiptik, ǵylymı jáne tabıǵı áleýetke ıe ekenin, ári turaqty damý, tehnologıalyq jańǵyrý jáne halyqaralyq yntymaqtastyqty keńeıtý baǵytynda júıeli jumys júrgizilip jatqanyn atap ótti:
«Biz úshin dostas elderdiń dıplomatıalyq mısıa ókilderin qabyldaý – úlken mártebe. Shyǵys Qazaqstan tabıǵı resýrstarǵa baı, qorǵasyn, myrysh, tıtan, altyn, kúmis óndirýde kósh bastap tur. Biz tantal ónimderin jáne atom energetıkasyna arnalǵan biregeı ýran otynyn shyǵaramyz, sondaı-aq berılı jetkizýde álem boıynsha úzdik úshtikke kiremiz. Búginde áriptestik joǵary qosylǵan quny bar joǵary tehnologıalyq salalarǵa – óńdeýden bastap tereń ındýstrıalandyrýǵa deıin baǵyttalyp otyr. Biz qolaıly jáne boljamdy iskerlik orta qalyptastyryp, ınfraqurylymdy damytyp, árbir ınvestorǵa jeke kózqaras usynamyz», – dedi oblys basshysy.
Plenarlyq sesıada aımaq kelbetin túbegeıli ózgertip, damýdyń qozǵaýshy kúshine aınalýǵa qabiletti jobalar tanystyryldy:
•Óskemen qalasynda (Sogra aýdany) goland tehnologıasy boıynsha 10 gektar jylyjaı keshenin salý. Negizinen qyzanaq ósirý, ári qaraı eksporttaý josparlanǵan.
•Zaısan aýdanynda talqan men tary óndirý sehy – salaýatty tamaqtaný trendterine baǵyttalǵan. Aýdan qajetti daqyldardy ósirýge qolaıly agroklımattyq jaǵdaılarǵa ıe.
•Et jáne jumyrtqa baǵytyndaǵy qus fabrıkasy – jylyna 122 mıllıon jumyrtqa men 260 tonna et. Jobanyń barlyq negizi bar: jemshóp bazasy, alań, logıstıka jáne memlekettik qoldaý.
•Eksportqa baǵyttalǵan et kombınaty – AÓK salasyndaǵy óńdeýdi damytý basty basymdyqtardyń biri bolyp otyr.
•Kýrorttyq ınfraqurylymdy damytý: Rıdderde SPA-ortalyq, Marqakólde saýyqtyrý kesheni, Katonqaraǵaıda taý shańǵysy kýrorty, Óskemende qonaq úıler men akvaparkter. Bul jobalar ekotýrızm, densaýlyq jáne joǵary sapaly qyzmetke suranysqa saı keledi.
•Qurylys salasyn damytý – kirpish, temir-beton buıymdary jáne qurǵaq qurylys qospalary zaýyttaryn iske qosý.
•Qaldyqtarmen keshendi jumys: plasık pen óndiristik qaldyqtardy óńdeý kásiporny, qoqys túsirý stansıalary.
•Infraqurylymdyq joba – Tuǵyl ózeninde port salý. Bul kólik, logıstıka jáne saýda úshin jańa múmkindikter ashady.
Aımaq ınvestorlarǵa tek ıdeıalardy ǵana emes, daıyn bazany da usynady: jer, resýrstar, logıstıka jáne basqarylatyn táýekelder. Shyǵys Qazaqstan ınvestısıa qabyldaýǵa ǵana emes, eki tarap úshin de tıimdi áriptestikke daıyn ekenin kórsetip otyr.
Forým paneldik sesıalar serıasymen jalǵasady, onda ınvestorlar jobalarǵa qatysý sharttaryn egjeı-tegjeıli talqylaı alady.
