Sonyń biri Amina Okýeva. Sheshen qyzy. Ózi snaiper. «Kiev» polkiniń quramynda. Osynda óz erkimen kelgen Djohar Dýdaev batalonynyń beldi múshesi. Al Ýkrainaǵa qarsy soǵysyp júrgen sheshenniń jaýyngerlerin Amina «qadyrovshylar» dep ataidy eken.
– Amina, aitshy Ýkraina áskeriniń sapynda Reseige qarsy soǵysyp júrgen qansha sheshen bar?
– Naqty sanyn atai almaimyn. Eriktiler kóp. Shamalap alǵanda qazir Donbassta júzden asa sheshen Kremlge qarsy soǵysyp júr.
– Al Resei áskeriniń qatarynda Ýkrainaǵa qarsy soǵysyp jatqan sheshenderdiń sany qansha, bilesiń be?
– Asa kóp emes. Qadyrov ózine qarasty jaýyngerlerdi Donbasstan shyǵaryp áketkenine bir jyl toldy. Alaida «qadyrovshylar» tolyq ketip tynǵan joq. Áli de bar.
– Donbasstaǵy qaqtyǵys kezinde «qadyrovshylarmen» betpe-bet kelgen sátterińiz boldy ma?
— Joq. Biraq, qazirgi kúni Ýkraina jerinde júrgen «qadyrovshylar» týraly túrli aqparattar jinaý ústindemiz. Olardy kezdestirsek aiamaimyz. Bular sheshen emes, «qadyrovshylar». Olar bizge jaý. Meniń bilýimshe, bular adam qany tógiletin keskilesken urystarǵa qatysa bermeidi. Orystar basyp alǵan Donetsk, Lýganskide urlyq-qarlyq, tonaýmen ainalysady.
– Ýkrainanyń jaǵynda soǵysyp júrgen sheshender reseilik batalonnyń tutqynyna túsip qalǵan kezderi boldy ma?
– Bizdiń Dýdaev batalonynda mundai jaǵdai bolǵan joq. Bolmai-aq qoisyn.
– Qalai oilaisyz bul soǵysta kim jeńedi?
– Másele tek soǵysta jatqan joq. Diplomatiialyq qysymdy, sanktsiiany kúsheite túsý kerek. Osyndaǵy sheshender Ýkrainanyń saiasatyn jaqtaidy. Sol sebepti sizder jaqta soǵysyp júr. Resei agressor. Ol eshqashan ózgermeidi. Agressordy sabasyna túsirý úshin onyń ózindei áreket etý kerek. Basqynshylardyń Ýkrainanyń ishine qarai enip ketýine jol bermeý qajet.
– Aityńyzshy, Donbasstaǵy aiqas alańynda Ramzan Qadyrovty kezdestirip qalsańyz ne ister edińiz?
– Ái, bul múmkin emes-aý. Qadyrov bul jaqqa soǵysýǵa ólse de kelmeidi. Sebebi, óte qorqaq adam. Onyń korteji tup-týra júz kólikten turady. Qadyrov bulardyń qaisysynda otyrǵanyn ajyratyp bolmaisyń. Ol tipti Sheshenstannyń óz ishinde osylai júredi. Emin-erkin qozǵala almaidy. Qorqady. Mundai adamnyń Ýkrainaǵa kelýi múmkin be? Joq, árine.
– Iá, ol Pýtinge ynta-shyntasymen berilgen. Qadyrov asa qatigez adam. Qatigezdigi patologiialyq aýrýǵa ulasqan. Biraq Pýtin Qadyrovqa táýeldi emes. Pýtin ne aitady, qalai buiyrady Qadyrov solai júredi. Pýtin aldyna qoiǵan maqsatynan eshqashan bas tartpaityn adam. Muny Qadyrov oryndai almasa, erteń onyń ornyna keletin adamǵa júkteidi.
– Al Pýtinniń biligi qulasa, Qadyrov qaitpek?
– Ne isteýshi edi? Eshteńe de. Ol Pýtinniń qolyndaǵy qolbala. Pýtinsiz, Pýtinniń kómeginsiz Qadyrov eshkim emes. Pýtinniń biligi qulasa Qadyrovty it ólim kútip tur. Ol Kaddafidiń taǵdyryn qaitalaidy. Pýtinniń qoldaýynan, Kremldiń aqshasynan aiyrylǵan Qadyrov eki kún de ómir súre almaidy.
– Sonda Qadyrovty sheshen halqynyń ózi unatpai ma?
– Unatpaidyńyz óz aldyna, ittiń etinen jek kóredi. Árine, onyń qol astyndaǵy azdaǵan adam oǵan adaldylyǵyn saqtar. Biraq bul da ýaqytsha.
–Eger búgingi Resei biliginde Pýtin bolmasa, Donbasstaǵy daý da týyndamas edi dep oilaisyz ba?
– Bilmeimin. Pýtindi týǵyzǵan orys halqy. Pýtin búgingi orys halqynyń shyn keipi. Basshysynyń piǵyly qandai bolsa, halyqtyń paiymy da sondai. Pýtindi bilikke ákelgen orys halqynyń ózi.
Dál qazirgi Resei Stalin dáýirin elestetedi.
– Ýkraina Qyrymdy qaitara ala ma, qalai oilaisyz?
– Bilmeimin. Qaitararyna senim az. Alaida álemdegi bir de bir memlekettiń Qyrymdy Resei jeri dep moiyndamaǵany úmit otyn óshirmei otyr. Menińshe Resei ózin-ózi qurdymǵa ketiredi. Mine, sol kezde Qyrymdy da qaitarasyzdar. Budan keiin Soltústik Kavkaz aimaǵy da táýelsizdik alady.
Daiyndaǵan, Dýman BYQAI
