"Kezinde ózinen 25 jasqa kishi qyzdy áiel etken edi. Tuńǵyshbai ata taǵy ne búldirdi?
Tuńǵyshbai — teatrdyń tý-talaqaiyn shyǵarýda. Ártister, kinematografister men teatr salasynyń maitalmandary «Teatr qairatkerleri odaǵynyń» tóraǵasy Tuńǵyshbai Jamanqulovqa qatysty «Bizdiń Odaqta bylyq kóp!» degen ujymdyq hat jazǵan eken.
Masqara-hattyń mátini mynadai:
«Bizdiń Odaqta bylyq kóp, al tóraǵamyz Tuńǵyshbai Qadyruly Jamanqulovtyń ne istep, ne qoiyp júrgeni bir Qudaiǵa málim. Iá, Tuńǵyshbai aǵa ataqty adam, kópshilik aldynda óziniń teatr salasyna sińirgen eńbegin ádemilep jetkizedi. Ásirese, «Eńlik gúl» premiiasyn tabystaý keshinde kóp kósiledi, eldiń «úzdik akterlerine» konvertke salynǵan «milliondardy» ustatady. Áp-ádemi, árine. Biraq osy zalda talai jyldan beri otyrǵan biz nege ol «úzdik akterlerdi» tanymaimyz? Olardy nege buryn kórip-estimegenbiz?
Joǵa, biz ol akterlerdiń premiiasyn qyzǵanyp otyrǵan joqpyz. Ol akterler Tuńǵyshbai Jamanqulovtyń ózi maqtanysh tutatyn bul premiiaǵa laiyq eken, onda nege Jamanqulov saltanatty keshten keiin álgi «úzdikterdi» umytyp ketedi. «Eńlik gúl» premiiasyn alǵan ul-qyzdar qazaq teatrynyń «brendine» ainalýy tiis emes pe? Olardy elge nege tanytpasqa, nege maqtanysh tutpasqa?
Aita bersek, janǵa batatyn jara kóp. Jamanqulov «bastyq» bolǵaly sońǵy 8 jylda jas akterler men rejisserlerge arnalǵan eshbir festival, eshbir konkýrs ótken joq. (tek Tarazda Tuńǵyshbai Jamanqulov atyndaǵy bir festivaldiń ótkeni bar). Bul qalai?
Eldegi teatrlar qaýymdastyǵynyń jumysyn jandandyrady, teatrdy kúsheitedi dep sailaǵan Tuńǵyshbaiymyz ónerdi alǵa súireýdiń ornyna qaidaǵy bir synshylar men «apparatchikterdi» qaptatyp qoidy.
Qoiar suraǵymyz kóp: jyldyń úzdik akterlerin kimder tańdap júr, bizge kúshtep jazdyrtatyn «Teatr» degen qiqy-jiqy jýrnaldan kim tabys kórip otyr?
Tuńǵyshbai Jamanqulovtyń tusynda áli bir ret te qaiyrymdylyq kontserti, qaiyrymdylyq spektakli uiymdastyrylmady. Qaiyrymdylyq demekshi, Odaq qiyn jaǵdaida qalǵan kei áriptesterimizge kómek berýge de jarymaidy.
Qysqasy, Tuńǵyshbai Jamanqulovtyń óz Odaǵy bir bólek, teatr qyzmetkerleri bir bólek álemde júr. Jamanqulovqa elimizdegi myńdaǵan teatr qyzmetkerleriniń kúndelikti qamyn oilaýdan góri jylyna on-shaqty adamnyń qolyna premiia ustata salǵan ońai eken.
«Aýrýyn jasyrǵan óledi» demekshi, biz budan ári únsiz otyra almaimyz! Biz qordalanǵan bar máseleni talqylaý úshin osy qyrkúiek aiynda Odaq Prezidiýmynan kezekten tys sezd shaqyrýdy talap etemiz! Teatrdyń bolashaǵyn bárimiz birlese talqylaiyq!".
