Ádettegidei, Uzyn ata aýylynyń diqandary da kúrish oraǵyna belsene kirisip ketken. 20 gektar kúrishtik alqabynyń jartysyna jýyǵyn oryp úlgergen «Aitkúl – Ataqonys» fermerlik sharýashylyǵynyń tóraǵasy Rahymberdi Aitmyrzaev pen osy aýyldyń aýylsharýashylyǵy salasynda uzaq jyldar qajyrly eńbek etip, zeinetkerlikke shyqqan el aǵalary Perdebai Qapparov, Murat Nurpeiisov, búgingi tańda «Qazmaqta» ǵylymi-zertteý institýtynyń» aýdandyq filialynyń bas agronomy Jumahan Dúisenov syndy azamattar iilip turǵan kúrish masaqtaryn aialai sipap, bitik shyqqan dánderine súisine qaraidy.
Keńestik kezeńde Uzyn ata aýylynda 3-3,5 myń gektar alqapqa kúrish egilgen. Keiin jekeshelendirý bastalyp, árkim óz betinshe kún kórip ketken soń bul daqyldy egýshiler de kúrt azaiyp ketken-di. Endi sońǵy 4-5 jyl bederinde kúrishke qaita den qoiýshylar qatary kóbeiip keledi. Qojalyq tóraǵasy Rahymberdi Aitmyrzaevtyń aitýynsha bul aýyldaǵy kúrish ekologiialyq jaǵynan eń taza kúrishterdiń qatarynan sanalǵan.
– Umytpasam, 1988 jyldary bolsa kerek, keńshar direktorynyń tikelei bastamasymen halyqqa taza ónim usynamyz dep 500 gektarǵa eshqandai gerbitsid paidalanbai kúrish tuqymyn ósirýge kiristik. Sol kezde bizdiń kúrishimiz ekologiialq taza kúrish bolyp tanyldy. Oǵan memleketten qoldaý retinde 20-30 paiyzdai ústeme aqy tólenetin. Iaǵni, bizdiń sharýashylyqta ósirgen kúrishtiń baǵasy ózge aimaqta ósirilgen kúrishten qymbat júretin edi. Men sol tásil boiynsha qazir de gerbitsidsiz ónim óndirip kelemin. Ekologiialyq taza ónim retinde buǵan memleket tarapynan baiaǵydaǵydai jeńildikter berilý jaǵyn qarastyrýymyz kerek. Sonda aýdanymyzda kúrishpen shuǵyldanýshylar qatary molaia túseri sózsiz, – deidi Rahymberdi Aitmyrzaev.
42 jyl aýylda jemisti eńbek etip, zeinetkerlikke jýyrda ǵana shyqqan Murat Nurpeiisov jergilikti kúrishtiń basqa aimaqtaǵy kúrishterge qaraǵanda birneshe ese artyqshylyǵy baryn aýdan men oblystarda ótken jiyndarda naqty dáleldermen aityp júrgen bilikti mamannyń biri. Áý basta kúrish ósirýge jer tanaptaryn arnaiy daiyndaǵan aýdandaǵy 6 keńshardyń biri osy Uzyn ata aýyly. Sol jer tanaptary aýylda sol kúii saqtalyp tur, kúrish ósirýge daǵdylanǵan kánigi diqandar da kóp. Sý tas tóbeden quiylyp tur, aýa-raiy kúrish ósirýge asa qolaily.
Qazirgi aýa-raiynyń sharýalarǵa qarasyp turǵanyn aitqan Rahymberdi Aitmyrzaev osy bir jaqsy kezdi paidalanyp, ónimdi jaýyn-shashynǵa uryndyrmai jinap alý úshin bar kúshti jumsaý kerek deidi. Biylǵy gektar túsimi de oidaǵydai – 75-80 tsentnerden ainalyp otyr. Byltyrǵy jyly 26 gektarǵa ekken kúrish salysyn kórshi Alataý batyr aýylyndaǵy belgili kásipker Erjan Qarabaevtyń diirmeninde tartqyzypty. Alynǵan ónimniń 40 paiyzyn qoljetimdi baǵamen, iaǵni 150 teńgeden aýdan kólemine satylymǵa shyǵarsa, qalǵan 60 paiyzy Aýǵanstan memleketine eksportqa shyǵarylǵan. Aýyldaǵy turmysy tómen otbasylaryna, balabaqshalarǵa kúrishten qarasyp jatqan qaiyrymdylyq sharalaryn talai márte aityp kelemiz.
Aýyl turmysy men jer jaǵdaiyn jetik biletin utymdy uiymdastyrýshy, bilikti basshy, qaiyrymdylyq sharalardyń bel ortasynda júretin darhan peiildi azamattyń qyrmanyna bereke tilep qoshtastyq.
