Aimaq basshysy Nurlan Noǵaev aýdan ákimine shaǵyn jáne orta kásipkerlikti, otandyq ónimdi damytý baǵytynda kásipkerlerge qoldaý kórsetýdi tapsyrdy jáne biznes-jobalar men investitsiia tartýǵa kómektesý qajet ekenin aitty.
Óńir basshysy is-sapar aiasynda tigin tsehyn, munai servistik kompaniiany, oiyn alańdaryn shyǵaratyn tsehty, sondai-aq penoplast pen matratstar shyǵaratyn mekemelerdi qosa alǵanda, birneshe kásiporynda boldy.
Óńir basshysynyń sapary «Caspian Safety Group» JShS jańa tigin tsehynda bastaldy. Kásiporyn aiyna 2 myńnan astam óndiristik tiptegi kiim shyǵarýmen ainalysady jáne qazirgi tańda 50-den astam adamdy jumyspen qamtyp otyr. Óńir basshysy tseh ǵimaratyn jalǵa alyp otyrǵanyna bailanysty, kásipkerge jer alyp, óz ǵimaratyn salý úshin ákimdik tarapynan barlyq qoldaý bolatynyn aitty.
Tigin tsehynan soń ákim Qyzyltóbe aýylyndaǵy «Shliýmberje Lodjelko Ink» munai servistik kompaniiasynyń jumysymen tanysty. Óndiristik baza aimaqtyń munai óndirýshi kompaniialaryna munai barlaý, burǵylaý, geofizikalyq barlaý jumystaryn júrgizý qyzmetterin usynady. Aita keteiik, qazir kásiporynda 150-den astam adam qyzmet atqarady.
Sondai-aq, óńir basshysy Baiandy aýylyna qarasty balalar alańyna arnalǵan oiyn jáne sporttyq keshender shyǵaratyn «SEM» tsehynyń jumysymen tanysty. Munda jylyna 200-den astam balalar alańy ázirlenedi. Kásiporyn búginde Aqtaý qalasymen aýdandaryn qamtyp otyr. Sońǵy ýaqytta basqa óńirlerden de suranys kóbeigen.
Sapar odan ári Atameken aýylyndaǵy penoplast jabdyqtaryn shyǵaratyn «Ádil Fasad» kásiporynda jalǵasty. Mekeme «Nur Kapital baǵdarlamasy» aiasynda 22 mln, «Damý» qory arqyly 20 mln.tg nesie alǵan. Qazir aiyna 30 tonna penoplast blogy, 30 myń sharshy metr termo panel, 50 myń sh/m penoplast jabdyqtaryn jáne 6 myń sh/m jyly beton ónimin óndiredi. Aldaǵy ýaqytta kásiporynnyń óndiristik qýatyn ulǵaitý josparlanǵan.
Kásipkerlik obektilerimen tanysyp bolǵan soń Nurlan Noǵaev shaǵyn jáne orta biznes ekonomikanyń qozǵaýshy draiveri ekenin jáne biznesti odan ári damytý kerektigin aitty.
– Memleket basshysynyń tapsyrmasyn júzege asyrý maqsatynda jergilikti atqarýshy organdar kásipkerlerdi turaqty negizde qoldaýdy qamtamasyz etedi. Munaily aýdanynda qazirgi ýaqytta shaǵyn kásipkerlikpen ainalysatyndar sanynyń jáne ónerkásip ónimindegi óndiris kóleminiń ulǵaiyp keledi. Bizge kásipkerlerdi qoldaý jónindegi jumysty kúsheitý, barynsha qolaily biznes ortany qurý qajet, bul saiyp kelgende oblystyń áleýmettik-ekonomikalyq damýyna oń mýltiplikativtik áser etedi. Sondai - aq, shaǵyn jáne orta biznes nysandarynyń sanynyń artýy halyqtyń jumyspen qamtý máselelerin sheshýge oń áser etedi, – dedi Nurlan Noǵaev.
Jumys saparynyń sońynda Nurlan Noǵaev kásipkerlerge shaǵyn jáne orta biznesti damytýǵa jáne investitsiia tartýǵa qoldaý kórsetý boiynsha jaýapty tulǵalarǵa birqatar tapsyrmalar berdi.
