Ordabasy aýdanynda qysqy mal azyǵyn daıyndaý máselesi qarqyndy júzege asýda. Osy rette aýdan  ákimi Azat Oralbaev qysqy mal azyǵyn daıyndaý boıynsha aýyldaǵy sharýa qojalyqtardy aralap, sharýalardyń qysqa daıyndyǵyn pysyqtady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Bıyl aýdanda mal basyna qajetti 322,9 myń tonna mal azyǵyn daıyndaý josparlanyp, búgingi tańda 341 myń tonna mal azyǵy jınaldy.

Aýdan basshysy sapar barysynda Badam óndiristik koperatıviniń, «Mýsaev Mýhan» sharýa qojalyǵynyń jumysymen tanysty. Kezdesýde sharýalardy mal, egin sharýashylyǵy boıynsha memlekettik baǵdarlamalarǵa qatysýǵa shaqyrdy.

Ári jyl ótken saıyn jaıylymdyq alqaptyń tarylýyna baılanysty mal basyn arttyrý, baǵýda dástúrli tásilden zamanaýı ádiske kóshý týraly aıtyp ótti.

Jalpy aýdanda 280 birlik mal ustaý obektileri bar bolsa, tórt túlikke qajetti azyq túrinen saban – 34 myń tonna, pishendeme – 13,5 myń tonna, tabıǵı shóp – 107,6 myń tonna, jońyshqa – 171,6 myń tonna jáne súrlemdik júgeri  14 myń tonnany qurap otyr.

Aıta keteıik, aýdanda 9 aıdyń qorytyndysymen iri qara mal 82 204 bas, ýaq mal 447 383 bas, jylqy 32 345 bas,  túı 930 basty qurap otyr.