Qaraǵandy oblystyq soty Temirtaýda egde jastaǵy adamdy uryp-soǵyp, qorlaǵan jáne tonaǵan toǵyz adamǵa qatysty apelliatsiialyq shaǵymdardy qarady. Sot birinshi satydaǵy úkimge ózgeris engizip, sottalǵandardyń birine túpkilikti 6 jyl bas bostandyǵynan aiyrý jazasyn belgiledi, dep habarlaidy dalanews.kz.
Qaraǵandy oblystyq sotynyń baspasóz qyzmetiniń málimetinshe, qylmystyq ister jónindegi sot alqasy prokýrordyń ótinishhaty men sottalǵandardyń jáne olardyń qorǵaýshylarynyń apelliatsiialyq shaǵymdaryn qaraǵan.
Sot alqasy birinshi satydaǵy sottyń aiyptalýshylardyń kinási dáleldengeni týraly qorytyndysymen kelisken. Sonymen qatar úkimniń negizdeý bóligi Qylmystyq kodekstiń talaptaryna sáikestendirilgen.
Sottalǵandardyń biri F.-ǵa burynǵy úkim boiynsha ótelmegen jaza merziminiń bir bóligi qosylyp, túpkilikti 6 jyl bas bostandyǵynan aiyrý jazasy taǵaiyndaldy.
Budan bólek, memleket kirisine óndiriletin protsestik shyǵyndar men jábirlenýshilerge ótemaqy qoryna tólenetin mindetti tólemderge qatysty ózgerister engizildi.
Úkimniń qalǵan bóligi ózgerissiz qaldyryldy. Prokýrordyń apelliatsiialyq ótinishhaty ishinara qanaǵattandyrylyp, sottalǵandar men olardyń qorǵaýshylarynyń shaǵymdary qanaǵattandyrylmady.
Zeinetkerdi uryp, qorlaǵan sátterdi videoǵa túsirgen
Sot anyqtaǵandai, 2025 jylǵy 14 jáne 21 aqpanda aiyptalýshylar egde jastaǵy adamnyń páterine eki ret zańsyz kirgen. Jábirlenýshiniń qarsylyq kórsete almaitynyn paidalanǵan olar ony birneshe ret uryp, betine túkirip, ar-namysy men qadir-qasietin qorlaǵan. Qylmystyq áreketterin uialy telefonǵa túsirgen.
Saldarynan jábirlenýshiniń densaýlyǵyna ortasha aýyrlyqtaǵy ziian keltirilip, materialdyq shyǵyn kelgen.
Budan bólek, 2025 jylǵy 24 naýryzda kámeletke tolmaǵan sottalýshylardyń biri basqa adamdarmen birge taǵy bir turǵynnyń páterine kirip, ony uryp-soqqan. Jábirlenýshiniń densaýlyǵyna jeńil ziian keltirilip, 95 myń teńgeniń múlki urlanǵan.
Is qoǵamda úlken rezonans týdyrǵan
Buǵan deiin Qaraǵandy oblysynyń kámeletke tolmaǵandar isteri jónindegi mamandandyrylǵan aýdanaralyq soty aiyptalýshylardy kináli dep tanyp, 5 jyldan 7 jylǵa deiin bas bostandyǵynan aiyrý jazasyn taǵaiyndaǵan.
Eske salaiyq, 2025 jyly Temirtaýda 67 jastaǵy er adamdy qorlaǵan jasóspirimderdiń videosy áleýmettik jelilerde taralyp, qoǵamda úlken narazylyq týǵyzǵan.
Keiin kúdiktilerdiń keibirin basqa jastar soqqyǵa jyǵyp, ony da videoǵa túsirgen. Bul oqiǵa qoǵamda óz betinshe jazalaý áreketi retinde baǵalanǵan.
Oqiǵadan keiin Temirtaý ákiminiń áleýmettik máseleler jónindegi orynbasaryna qatań sógis jariialanǵan. Sondai-aq kúdikti jasóspirimder oqyǵan bilim berý uiymdary direktorlarynyń orynbasarlary tártiptik jaýapkershilikke tartylǵan.
Qaraǵandy oblystyq sotynyń málimetinshe, apelliatsiialyq satynyń sheshiminen keiin úkim zańdy kúshine endi.