Resei Kievtegi úsh kópirge soqqy berdi: Ýkrainada segiz adam qaza tapty

Resei Kievtegi úsh kópirge soqqy berdi: Ýkrainada segiz adam qaza tapty
ashyq derekkóz

Resei áskeri Ýkrainaǵa zymyrandar men 400-den astam ushqyshsyz ushý apparatyn qoldanyp, jappai shabýyl jasady. Saldarynan keminde segiz adam qaza taýyp, ondaǵan adam jaralandy. Kievtegi Dnepr ózeni arqyly ótetin úsh kópir zaqymdanyp, eldiń birqatar óńirinde elektr jaryǵy óshti, dep habarlaidy dalanews.kz.

Ýkraina áýe kúshteriniń málimetinshe, shabýyl kezinde Resei 84 qanatty zymyran, ballistikalyq zymyrandar jáne 400-den astam shabýyldaýshy dron qoldanǵan. Qanatty zymyrandardyń basym bóligi áýe shabýylyna qarsy qorǵanys júieleri arqyly joiylǵan.

Kiev qalasynyń meri Vitalii Klichkonyń habarlaýynsha, Podolsk-Voskresenskii, Darnitskii jáne Ońtústik kópirler zaqymdanǵan. Olardyń keibirinde kólik qozǵalysy tolyq toqtatylyp, qalǵandarynda shekteýler engizilgen. Qala biligi turǵyndardy jeke kólikpen júrýdi shekteýge jáne múmkindiginshe qashyqtan jumys isteýge shaqyrdy.

Shabýyl saldarynan Kievte alty adam qaza taýyp, birqatar turǵyn jaralanǵan. Sonymen qatar sý sharýashylyǵy nysanyna jasalǵan soqqydan kommýnaldyq kásiporynnyń úsh qyzmetkeri kóz jumǵan. Qaladaǵy birneshe aýdanda sý qysymy tómendep, keibir turǵyn úilerde sý berý ýaqytsha toqtaýy múmkin.

Lvov oblysyndaǵy Sknyliv temirjol stantsiiasyna jasalǵan shabýyldan taǵy eki adam qaza tapqan. Dnepropetrovsk oblysynda turǵyn úiler zaqymdanyp, Harkov qalasynda aýrýhanaǵa dron soqqysy tigen. Bul óńirlerde de jaralanǵandar bar.

Ýkrainanyń energetikalyq operatory Ukrenergo shabýyldardan keiin elektr júiesindegi jaǵdaidy óte kúrdeli dep baǵalady. Lvov, Zakarpat jáne Ivano-Frankovsk oblystarynda shuǵyl elektr qýatyn ajyratý sharalary engizildi. Kievtiń birneshe aýdanynda da jaryq óshken.

Reuters agenttiginiń habarlaýynsha, Resei prezidenti Vladimir Pýtin buǵan deiin Qyrym kópirine jasalǵan ýkrainalyq shabýyldarǵa jaýap qaitarýǵa ýáde bergen. Onyń aitýynsha, Máskeýdiń jaýaby Ýkraina tarapynan jasalǵan áreketterden áldeqaida aýyr bolýy múmkin.

Osy jaǵdaidan keiin Polsha áskeri ushaqtaryn áýege kóterip, Ýkrainamen shekaralas ońtústik-shyǵys aýmaǵynda belgisiz nysandardyń qulaýyna qatysty tekserý bastaǵan.

Aita keteiik, Ýkraina men Resei arasyndaǵy soǵysty toqtatýǵa baǵyttalǵan diplomatiialyq kelissózder ázirge aitarlyqtai nátije bergen joq. Ótken aptada Abý-Dabide AQSh-tyń araǵaiyndyǵymen ótken kezdesýde aýmaqtyq máseleler boiynsha ilgerileýshilik bolmaǵan.