Serikjan Beskempirov jumys sapary barysynda Shymyr aýylynda ornalasqan «NAM» sharýa qojalyǵynda bolyp, ondaǵy atqarylyp jatqan jumystyń barysymen tanysty.
Bul Eskeldi aýdanyndaǵy iri sharýashylyq ekeni belgili. Ótken jyly sharýashylyq basshylary aýyl sharýashylyǵy jumystarynyń ónimdiligin arttyrý maqsatynda Eýropanyń tehnikalaryn aldyrǵan bolatyn. Sharýashylyq basshysy German Nam ákim orynbasarymen kezdesýinde 100 gektar jerge júgeri ósirip otyrǵanyn alǵa tartty.
– Qazirgi tańda bizder Úkimet pen oblystyq ákimdiktiń aýyl sharýashylǵy eńbekkerlerine qoldaýyn aitarlyqtai sezinip otyrmyz. Memlekettiń qoldaýynyń arqasynda ótken jyly kúzde Germaniiada qurastyrylatyn «CLAAS» traktoryn alý múmkindigine ie boldyq. Quny 60 myń dollar turatyn bul tehnikany memlekettiń qoldaýynyń arqasynda qol jetkizdik. Budan basqa Finliandiiada shyǵarylatyn «HORSCH – Tiger» keshendi tirkemesin aldyq. Aldaǵy ýaqytta bul tehnikalar jumystyń ónimdiligin arttyryp, tabysty jumys isteýimizge septesetinine senimdimin. Jańa tehnikalardy ózge sharýalardyń egis jumystaryna da paidalanýdy kózdep otyrmyz. Bul – tehnikalar ózgelerge qaraǵanda janarmaidy az tutynady, – dep jer emgen sharýa satyp alǵan sý jańa aýyl sharýashylyǵy tehnikalarynyń múmkindigi jaiynda Serikjan Beskempirovke áńgimelep berdi.
Óz kezeginde oblys ákiminiń orynbasary sharýalar biyl kóktemgi egis jumystaryn oidaǵydai aiaqtaýy úshin 21 myń tonna jeńildetilgen janarmai bólingenin aityp, qarapaiym eńbekkerlerdi qýantyp tastady.
Búginde Almaty oblysyna qarasty barlyq aýdandarǵa janarmai jetkizilgen. Sonymen qatar sharýalarǵa qajetti tuqym qory da jetkilikti ekenin ákimniń orynbasary tilge tiek etti. Bul baǵyttaǵy jumystardy shashaý shyǵarmai atqarý isi «Jetisý» áleýmettik-kásipkerlik korporatsiiasyna júktelipti.
Serikjan Beskempirov aýyl sharýashylyǵy tehnikalaryn jańartý isine qatysty da óz oiyn ortaǵa saldy.
Almaty oblysynyń aýyl sharýashylyǵy óndiristik keshenin damytýǵa «QazAgroQarjy» AQ 21,4 mlrd teńge investitsiia salǵanyn aita ketýimiz kerek. «QazAgroQarjy» oblys aýmaǵynda 18 jyldyq qyzmetinde fermerlerge 2518 birlik aýyl sharýashylyǵy tehnikasyn tabystap, 868 astam sharýa qojalyǵyn qarjylandyrǵan.
Sońǵy 3 jyl ishinde «QazAgroQarjy» AQ-nyń filial jyl saiyn 2 mlrd teńge deńgeiinde qarjylandyrý boiynsha eń joǵary kórsetkishke jetken. Sondai-aq «QazAgroQarjy» AQ qoldaýynyń arqasynda Almaty oblysynda et baǵytyndaǵy jalpy sany 7 350 bas iri qara maly bar 6 asyltuqymdy reprodýktor sharýashylyǵy qurylǵanyn da atap ótken jón.
Bular aimaqta alǵashqylardyń biri bolyp 5 134 bas elitaly «Angýs» tuqymynyń jáne 2 214 bas «Gereford» tuqymynyń asyltuqymdy iri qara maldaryn satyp alǵan «Arharly Maibúirek» JShS, «Naǵashybek» ShQ, «Bimuratov A.E.» ShQ, «Alataý Deiri» JShS, «Altyn Arpa» ShQ siiaqty sharýashylyqtardy ataýǵa bolady.
Ótken jyly Jetisýdyń fermerleri arasynda «Senimdi fermer» jáne «Óz jem-shóbimiz» dep atalatyn jańa qarjylandyrý jobalary iske asyp, oblystaǵy aýyl sharýashylyǵy salasynyń damýyna tyń serpilis bergen-di.
Bir ǵana «Senimdi fermer» baǵdarlamasy boiynsha «QazAgroQarjy» AQ fermerlerge jiyntyq quny 105, 8 mln teńgege aýyl sharýashylyǵy tehnikasyn lizingke tabys etken bolatyn. Al «Óz jem-shóbimiz» baǵdarlamasy boiynsha otandyq agrarshylar 84,4 mln teńgege aýyl sharýashylyǵy tehnikasyn endigi lizingke aldy.
«Senimdi fermer» baǵdarlamasy aýyl sharýashylyǵy tehnikasyn lizingke avanstyq tólem tólemei alý múmkindigin beredi. Bul baǵdarlamany «QazAgroQarjy» AQ-nyń qoldanystaǵy klientterimen qatar, buryn qarjylandyrylǵan klientteri de paidalana alady. Klientterge qoiylatyn jalǵyz ǵana talap – bul adal nietti qaryz alýshy ólshem sharttaryna sáikes kelý.
«Óz jem-shóbimiz» baǵdarlamasy boiynsha otandyq jem-shóp óndirisin damytýdy qarjylandyrý júzege asyrylady. Jańa baǵdarlamanyń sheńberinde qazaqstandyq fermerler qajetti aýyl sharýashylyǵy tehnikasyn 10 jylǵa deiingi merzimmen, mólsheri 10% quraityn tómendetilgen avanstyq tólemmen satyp alý múmkindigine ie bolady.
