Jol keńeiip, qatynas jaqsarady
Ryskeldi Ahmetqaliuly óziniń Feisbýk áleýmettik jelisindegi paraqshasynda mańyzdy jańalyqtaryn halyqqa udaiy jetkizip otyratyn ákim. Taiaýda ol «Almaty – Talǵar» tasjolynyń boiynda qurylys jumystary bastaldy depti.
– Qazirgi tańda jol jóndeý eń ózekti máselelerdiń biri. Bul baǵyttaǵy jumystar qarqyndy túrde júrip jatyr. Biyl Almaty oblystyq jol basqarmasyna bizdiń tarapymyzdan aýdan boiynsha jol jóndeý jumystaryna 2 mlrd 154 mln teńgege ótinim bergenbiz. Búgingi kúnge deiin sonyń 546 mln teńgesi bólindi. Bul qarajatqa kóshelerge aǵymdaǵy jóndeý jumystaryn júrgizetin bolamyz. Jóndeý jumystary mamyr aiynan bastalady. Sonymen qatar «Almaty – Talǵar» trassasyn keńeitý máselesi de árdaiym baqylaýda. Jobasy daiyn, ekspertizadan ótken. Endi qarjynyń bólinýin kútýdemiz, – dep jazypty ákim.
«Almaty – Talǵar» trassasynyń boiynda iri jeti aýyldyq okrýg ornalasqany belgili. Ondaǵy jurttyń basym bóligi Almatyǵa qatynap jumys isteitinin eskersek, tańerteń eki arada kólik keptelisi paida bolyp, taiaq tasam jerde turǵan qalaǵa jetý muńǵa ainalady.
Budan basqa, joldyń eki qaptalyna ornalasqan aýyldardy mekendeitin jurttyń joldy kesip ótýi de biraz qiynshylyq týdyryp otyrǵany jasyryn emes. Ryskeldi Ahmetqaliuly gazetimizge bergen suhbatynda osy olqylyqtyń ornyn toltyrý úshin «Almaty – Talǵar» tasjolyn keńeitip, qarapaiym halyqtyń ary-beri ótýin qamtamasyz etý úshin arnaiy ótkelder salýdyń mańyzdylyǵy jaiynda aitqan edi.
Biyl «Almaty – Talǵar» trassasyn keńeitý isi qolǵa alynbaqshy. Bir táýlikte 40 myńnan astam kólik ary-beri júitkitin eki jolaqty shaǵyn jol aldaǵy ýaqytta keńeiip, avtobanǵa ainalady. Osydan jarty ǵasyr buryn salynǵan jolda júretin kólikterdiń sany osy ýaqyt aralyǵynda júz esege óskenin eskersek, Talǵar aýdany ákimi Ryskeldi Ahmetqaliulynyń bul máseleni jedel túrde qolǵa alyp, iske kiriskenin quptaýǵa bolady.
Nurlan ÁÝBÁKIR
