رىسكەلدى احمەتقالي ۇلى ءوزىنىڭ فەيسبۋك الەۋمەتتىك جەلىسىندەگى پاراقشاسىندا ماڭىزدى جاڭالىقتارىن حالىققا ۇدايى جەتكىزىپ وتىراتىن اكىم. تاياۋدا ول «الماتى – تالعار» تاسجولىنىڭ بويىندا قۇرىلىس جۇمىستارى باستالدى دەپتى.
– قازىرگى تاڭدا جول جوندەۋ ەڭ وزەكتى ماسەلەلەردىڭ ءبىرى. بۇل باعىتتاعى جۇمىستار قارقىندى تۇردە ءجۇرىپ جاتىر. بيىل الماتى وبلىستىق جول باسقارماسىنا ءبىزدىڭ تاراپىمىزدان اۋدان بويىنشا جول جوندەۋ جۇمىستارىنا 2 ملرد 154 ملن تەڭگەگە ءوتىنىم بەرگەنبىز. بۇگىنگى كۇنگە دەيىن سونىڭ 546 ملن تەڭگەسى ءبولىندى. بۇل قاراجاتقا كوشەلەرگە اعىمداعى جوندەۋ جۇمىستارىن جۇرگىزەتىن بولامىز. جوندەۋ جۇمىستارى مامىر ايىنان باستالادى. سونىمەن قاتار «الماتى – تالعار» تراسساسىن كەڭەيتۋ ماسەلەسى دە ءاردايىم باقىلاۋدا. جوباسى دايىن، ەكسپەرتيزادان وتكەن. ەندى قارجىنىڭ ءبولىنۋىن كۇتۋدەمىز، – دەپ جازىپتى اكىم.
«الماتى – تالعار» تراسساسىنىڭ بويىندا ءىرى جەتى اۋىلدىق وكرۋگ ورنالاسقانى بەلگىلى. ونداعى جۇرتتىڭ باسىم بولىگى الماتىعا قاتىناپ جۇمىس ىستەيتىنىن ەسكەرسەك، تاڭەرتەڭ ەكى ارادا كولىك كەپتەلىسى پايدا بولىپ، تاياق تاسام جەردە تۇرعان قالاعا جەتۋ مۇڭعا اينالادى.
بۇدان باسقا، جولدىڭ ەكى قاپتالىنا ورنالاسقان اۋىلداردى مەكەندەيتىن جۇرتتىڭ جولدى كەسىپ ءوتۋى دە ءبىراز قيىنشىلىق تۋدىرىپ وتىرعانى جاسىرىن ەمەس. رىسكەلدى احمەتقالي ۇلى گازەتىمىزگە بەرگەن سۇحباتىندا وسى ولقىلىقتىڭ ورنىن تولتىرۋ ءۇشىن «الماتى – تالعار» تاسجولىن كەڭەيتىپ، قاراپايىم حالىقتىڭ ارى-بەرى ءوتۋىن قامتاماسىز ەتۋ ءۇشىن ارنايى وتكەلدەر سالۋدىڭ ماڭىزدىلىعى جايىندا ايتقان ەدى.
بيىل «الماتى – تالعار» تراسساسىن كەڭەيتۋ ءىسى قولعا الىنباقشى. ءبىر تاۋلىكتە 40 مىڭنان استام كولىك ارى-بەرى جۇيتكيتىن ەكى جولاقتى شاعىن جول الداعى ۋاقىتتا كەڭەيىپ، اۆتوبانعا اينالادى. وسىدان جارتى عاسىر بۇرىن سالىنعان جولدا جۇرەتىن كولىكتەردىڭ سانى وسى ۋاقىت ارالىعىندا ءجۇز ەسەگە وسكەنىن ەسكەرسەك، تالعار اۋدانى اكىمى رىسكەلدى احمەتقالي ۇلىنىڭ بۇل ماسەلەنى جەدەل تۇردە قولعا الىپ، ىسكە كىرىسكەنىن قۇپتاۋعا بولادى.
نۇرلان اۋباكىر
