Búgin oblys ákiminiń orynbasary Nurbol Turashbekov Saıram aýdanyna baryp, birqatar nysandardy aralady. Aýdan ákimi Arman Sábıtov oblys ákiminiń tapsyrmasyna sáıkes agroaımaqqa bólingen 90 ga boıynsha atqarylatyn jumys josparyn usynyp, jobalardy tanystyrdy, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Aralaý barysynda oblys ákiminiń orynbasary «Gen Group Kazakhstan» JSHS jylyjaı keshenin keńeıtý baǵytynda atqarylǵan tirliktermen de tanysty. Banan ósirýdi jolǵa qoıǵan seriktestik qosymsha 6 gektarǵa jylyjaı salyp, qyzanaq jáne qulpynaı ósirýdi qolǵa almaq.
«Joba tolyq iske asqan jaǵdaıda jylyna 3 myń tonnadan astam qyzanaq, 130 tonnadan astam qulpynaı jınalady deıdi JSHS basshysy», Tımýr Ýteshev.
«Korkem» saýda belgisimen tanymal «Naýryz-5» JSHS kásipornyn aralaý barysynda seriktestik basshysy Djýrat Igambekov jemis qabyldaý, kókónisterdi óńdeý, qalbyrlaý jáne naryqqa shyǵarý barysynda kezdesetin ózekti máselelerdi jetkizdi.
«Kaz Eco Meat» JSHS iri qara mal bordaqylaý jáne mal soıý kesheniniń qurylysyn 2025 jyly aıaqtaýdy josparlap otyr. Qazirgi tańda Belarýs, Qytaı jáne Túrkıa elderinen arnaıy qondyrǵylar satyp alynǵan. Al «Nurym Group» jaýapkershiligi shekteýli seriktestigi qurama jem óndiretin zaýytty jyl sońyna deıin iske qospaq.
Nurbol Turashbekov kásipkerlerge máseleleri men usynystarynyń zań aıasynda zerdelenetinin atap ótti. Ákimdik tarapynan atqarylatyn jumystar kezeńimen júzege asatynyn aıtyp, jaýaptylarǵa naqty tapsyrmalar júktedi.
