Almatydaǵy ál-Farabı dańǵylyndaǵy jol apaty týraly vıdeo jarıalaǵan tanymal bloger, zańger Ádilethan Moldahandy qamaýda ustaý merzimi uzardy, dep habarlaıdy Dalanews.kz.
"Ádilethan Moldahan inimniń qamalýy 2 aıǵa ne úshin sozyldy? Ádiletti Qazaqstanda ádildik qaıda? Bostandyqty talap etemin", - dep jazdy zańger Dáýlethan Ahmetov bul týraly.
Aıta keteıik, buǵan deıin ol 10 táýlikke qamaldy. Bul týraly Almaty qalalyq Polısıa departamenti málimdegen edi. Vedomstvo málimetinshe, Almaty qalasy Polısıa departamenti kórineý jalǵan aqparat taratý deregi boıynsha sotqa deıingi tergep-tekserý júrgizip jatyr.
Eske salaıyq, buǵan deıin Almatyda zańger Ádilethan Moldahan qamaýǵa alynǵany habarlandy. Bul týraly zańgerdiń kómekshileri málimdedi. Olar zańgerdiń qamalýyn ál-Farabı dańǵylyndaǵy jol apatyna qatysty aıtqan pikirimen baılanystyrdy.
Keıinirek polısıa zańger ustalǵanyn rastady.
