Qazaqstanda psihologtarǵa arnalǵan kásibi standart engizý josparlanyp otyr. Bul norma «Psihologiialyq qyzmet týraly» zań jobasyna engizilgen, dep habarlaidy Dalanews.kz.
Depýtat Aina Musralimova psihologiialyq qyzmetke suranys artyp kele jatqanyn atap ótti. Alaida onyń aitýynsha, bul sala áli tolyq rettelmegen: búginde kez kelgen adam tiisti bilimi men jaýapkershiligi bolmasa da ózin psiholog retinde tanystyra alady.
Zań jobasynda mynadai talaptar qarastyrylǵan:
– mamandardyń biliktiligi men bilimine naqty talaptar engiziledi;
– jeke tájiribemen ainalysatyn psihologtar klientpen mindetti túrde kelisimshart jasasýy tiis;
– psihologiialyq kómek kórsetý formalary (oflain, onlain jáne aralas) eriktilik jáne kelisim qaǵidattaryna negizdeledi;
– psihologtardy memlekettik reestrge mindetti túrde tirkeý engiziledi;
– klient derekteriniń qupiialyǵy saqtalady;
– psihologtarǵa dári-dármek arqyly em júrgizýge tyiym salynady.
Qujat qazir Parlamentte birinshi oqylymda maquldanǵan. Sonymen qatar, kámeletke tolmaǵandarmen ata-anasynyń kelisiminsiz jumys isteýge tyiym salý usynylǵan. Bul talap tek mektepter men daǵdarystyq jaǵdailarǵa qatysty qoldanylmaidy.
