قازاقستاندا پسيحولوگتارعا ارنالعان كاسىبي ستاندارت ەنگىزۋ جوسپارلانىپ وتىر. بۇل نورما «پسيحولوگيالىق قىزمەت تۋرالى» زاڭ جوباسىنا ەنگىزىلگەن، دەپ حابارلايدى Dalanews.kz.

دەپۋتات اينا مۇسراليموۆا پسيحولوگيالىق قىزمەتكە سۇرانىس ارتىپ كەلە جاتقانىن اتاپ ءوتتى. الايدا ونىڭ ايتۋىنشا، بۇل سالا ءالى تولىق رەتتەلمەگەن: بۇگىندە كەز كەلگەن ادام ءتيىستى ءبىلىمى مەن جاۋاپكەرشىلىگى بولماسا دا ءوزىن پسيحولوگ رەتىندە تانىستىرا الادى.

زاڭ جوباسىندا مىناداي تالاپتار قاراستىرىلعان:
– مامانداردىڭ بىلىكتىلىگى مەن بىلىمىنە ناقتى تالاپتار ەنگىزىلەدى؛
– جەكە تاجىريبەمەن اينالىساتىن پسيحولوگتار كليەنتپەن مىندەتتى تۇردە كەلىسىمشارت جاساسۋى ءتيىس؛
– پسيحولوگيالىق كومەك كورسەتۋ فورمالارى (وفلاين، ونلاين جانە ارالاس) ەرىكتىلىك جانە كەلىسىم قاعيداتتارىنا نەگىزدەلەدى؛
– پسيحولوگتاردى مەملەكەتتىك رەەسترگە مىندەتتى تۇردە تىركەۋ ەنگىزىلەدى؛
– كليەنت دەرەكتەرىنىڭ قۇپيالىعى ساقتالادى؛
– پسيحولوگتارعا دارى-دارمەك ارقىلى ەم جۇرگىزۋگە تىيىم سالىنادى.

قۇجات ءقازىر پارلامەنتتە ءبىرىنشى وقىلىمدا ماقۇلدانعان. سونىمەن قاتار، كامەلەتكە تولماعاندارمەن اتا-اناسىنىڭ كەلىسىمىنسىز جۇمىس ىستەۋگە تىيىم سالۋ ۇسىنىلعان. بۇل تالاپ تەك مەكتەپتەر مەن داعدارىستىق جاعدايلارعا قاتىستى قولدانىلمايدى.