Májilis «Janýarlarǵa jaýapkershilikpen qaraý týraly» zańǵa engiziletin túzetýlerdi qabyldady, dep habarlaidy Dalanews.kz.
Qujat osy saladaǵy zańnamany jetildirýge, azamattardyń qaýipsizdigin arttyrýǵa jáne janýarlarǵa izgilikpen qaraýǵa baǵyttalǵan.
Atap aitqanda, ustalǵan janýarlardy qaita jiberýdi boldyrmaý úshin olardy ýaqytsha ustaý pýnktterine mindetti túrde tapsyrý usynylady. Sondai-aq iesiz janýarlardy memlekettik biýdjet esebinen vaktsinatsiialaý normasy alyp tastalady.
Budan bólek, qaraýsyz júrgen janýarlardyń sanyn retteý kózdelgen. Onyń ishinde jurtshylyqtyń densaýlyǵyn qorǵaý jáne aýrýlardyń taralýynyń aldyn alý úshin evtanaziia qoldaný múmkindigi de qarastyrylady. Bul fýnktsiialar janýarlardy aýlaýmen ainalysatyn jergilikti atqarýshy organdarǵa bekitilip, olardyń ókilettikteri keńeitiledi.
Qujat úi janýarlaryn esepke alý júiesin damytýdy da qarastyrady. Atap aitqanda, chipteýdi mindetti túrde engizý, sondai-aq janýarlardy tek tirkeý bolǵan jaǵdaida ǵana kóbeitý talaptary belgilenedi.
Sonymen qatar qoǵamdyq baqylaý quqyǵy bekitiledi, sóitip qoǵam ókilderi janýarlardyń panajailary men ýaqytsha ustaý pýnktterine barýǵa múmkindik alady.
Zańdy qaraý barysynda depýtattar «Jergilikti memlekettik basqarý jáne ózin-ózi basqarý týraly», «Veterinariia týraly» zańdarǵa da ózgerister engizdi. Túzetýler jergilikti organdardyń janýarlar sanyn retteý, janýarlarǵa arnalǵan panajailardy qoldaý jáne olardy jańa ielerine berý baǵytyndaǵy áleýmettik jarnamany damytý jónindegi ókilettikterin naqtylaidy.
